Lipesalema 109 - Setswana 1970

Go ithapelela kgololo le go eleletsa baba petso

¹ Pesalome ya ga Dafita e e kwaletsweng moopedisi. Modimo o ke o bakang, se didimale.

² Gonne ba nkatlhamoloseditse melomo ya boikepo le ya tsietso, ba bua le nna ka diteme tsa maaka.

³ Ba ntikanyeditse ka mafoko a letlhoo, ba ntlhabantsha ka bomo.

⁴ Lorato lwa me ba lo duela ka go ntlhabantsha, etswe nna ke nnetse go rapela.

⁵ Ba ntebogile ka bosula boemong jwa molemo, le ka letlhoo boemong jwa lorato lwa me.

⁶ Mo tsosetse moikepi go mo laola; a yo o mo sekisang a eme fa letsogong le le jang la gagwe.

⁷ Fa a sekisiwa, a a tswe a bonywe molato; a thapelo ya gagwe e fetoge boleo.

⁸ A malatsi a gagwe a ngotlege, tirelo ya gagwe e tsewe ke yo mongwe.

⁹ A bana ba gagwe ba nne masiela le mosadi wa gagwe a nne motlholagadi.

¹⁰ A bana ba gagwe ba kgarakgatshegele kwa le kwa, ba kope ba batle dijo, ba le kgakala le matlotla a bona.

¹¹ A yo o mo adimileng a lalele tsotlhe tse o nang natso; a baeng ba thukhuthe tse a di fufuletseng.

¹² A a se fitlhele ope yo o ka mo tlhomogelang pelo ka gope; a go se nne ope yo o utlwelang masiela a gagwe botlhoko.

¹³ A bana ba gagwe ba nyelediwe, a leina la gagwe le phimolelwe ruri, e sa le mo losikeng lwa ntlha.

¹⁴ Molato wa borraagwe a o gopolwe fa Moreneng, le boleo jwa ga mmaagwe a bo se phimolwe.

¹⁵ A di nne fa pele ga Morena ka gale gore a nyeletse go gopolwa ga bona mo lefatsheng,

¹⁶ ka a se ka a gopola go dira ka lorato, mme a bogisa motho wa tlalelo le wa khumanego, le yo o kaeleletsweng gore a mmolaele ruri.

¹⁷ O ne a rata khutso, a e mo wele; o ne a sa rate tshegofatso, a e nne kgakala nae!

¹⁸ O ne a apara khutso jaaka kobo, a e tsene mo teng ga gagwe jaaka metsi le mo marapong a gagwe jaaka lookwane.

¹⁹ A e nne mo go ena jaaka seaparo se a se aparang le jaaka moitlamo o a itlamang ka ona ka gale.

²⁰ A tseo e nne tuelo ya baganetsi ba me e e tswang mo Moreneng, le ya bona ba ba buang bosula ka ga me.

²¹ Mme wena, Morena, Mongwaka, ntirele ka ntlha ya leina la gago; a e re ka bopelonomi jwa gago bo le molemo, o nkgolole.

²² Gonne ke tlaletswe, ke bile ke humanegile, pelo ya me e tlhabilwe mo teng ga me.

²³ Ke ikela jaaka moriti o o otlologang maitsiboa, ke tlhotlhorilwe jaaka tsie.

²⁴ Mangole a me a kgwetlhisiwa ka go itima dijo, nama ya me e otile, ga e tlodiwe setlolo.

²⁵ Ke bile ke dule yo o kgobiwang ke bona; e a re fa ba mpona, ba thukhuthe ditlhogo.

²⁶ A o ko o nthuse, Morena, Modimo wa me. A o ko o nkgolole ka fa bopelonoming jwa gago

²⁷ gore ba lemoge, fa tseo e le letsogo la gago, fa wena, Morena, o dirile jalo.

²⁸ Bona ba ka hutsa, mme wena o tshegofatse. A ba ba ntsogetseng ba tlhajwe ke ditlhong, mme a motlhanka wa gago a itumele.

²⁹ A baganetsi ba me ba apesiwe nyatsego, a ba iphuthe ka ditlhong tsa bona jaaka ka kobo.

³⁰ Ke tla leboga Morena gagolo ka molomo wa me ke tla mmoka mo bontsing jwa batho.

³¹ Gonne o eme mo ntlheng ya le le jang la mohumanegi gore a mo golole mo go ba ba mo atlholang.