Lipesalema 108 - Setswana 1970

Go baka Modimo le go kopa thuso

¹ Sefela. Pesalome ya ga Dafita.

² Modimo, pelo ya me e etleetsegile; ke rata go opela le go letsa kwadi. Thanya, mowa wa me!

³ Tsogang harepa le katara, ke rata go tsosa mahube.

⁴ Morena, nte ke go leboge mo merafeng, ke go leletse mo ditšhabeng.

⁵ Gonne bopelontle jwa gago bo bogolo go feta legodimo; boammaaruri jwa gago bo fitlha kwa marung.

⁶ Modimo, itlhatlosetse kwa godimo ga magodimo; a kgalalelo ya gago e okame lefatshe lotlhe.

⁷ Thusa ka letsogo le le jang la gago, o nkutlwe gore baratwa ba gago ba pholosiwe.

⁸ Modimo o ne wa bua mo Felong-ga-Boitshepo ga ona wa re: “Ke tla ipela, ke kgaoganya Šegeme, ke lekanya mokgatsha wa Sukothe.

⁹ Gileate ke wa me, le Manase ke wa me; Eferaime ke phemelo ya tlhogo ya me; Juta ke thobane ya me ya bogosi.

¹⁰ Moabe ke mogopo o ke tlhapelang mo go ona; setlhako sa me ke se latlhela mo go Etomo, ke tla dudueletsa Felesita.”

¹¹ Ke mang yo o tla nkisang kwa motseng o o thata? Ke mang yo o tla nkgogelang kwa Etomo?

¹² A ga se wena, Modimo o o re latlhileng? Ee, Modimo, ga o bolole le mephato ya rona.

¹³ Re direle thuso ya go phologa mo mmabeng; gonne thuso ya batho ga se ya sepe.

¹⁴ Ka Modimo re tla dira ditiro tsa bonatla, mme ona o tla gataka baba ba rona.