Lipesalema 107 - Setswana 1970

KAROLO YA BOTLHANO, DIPESALOME 107 – 150 Tebogo ya ba ba golotsweng

¹ Lebogang Morena, gonne o molemo; gonne bopelontle jwa gagwe ke jo bo sa khutleng.

² A ba ba golotsweng ke Morena ba bue jalo, ba o ba golotseng mo seatleng sa mopatiki,

³ a ba phutha kwa mafatsheng, kwa botlhabatsatsi le kwa bophirimatsatsi, kwa bokone le kwa lewatleng.

⁴ Ba ba neng ba kgarakgatshega kwa sekakeng mo gare ga naga, ba sa bone tsela e e yang kwa motseng o ba ka agang mo go ona;

⁵ ba tshwerwe ke tlala le lenyora, mewa ya bona e felelwa mo teng ga bona,

⁶ mme ba goela Moreneng, ba le mo tlalelong, mme a ba golola mo dipitlaganong tsa bona,

⁷ a ba tsamaisa mo tseleng e e leng yona gore ba fitlhe mo motseng o ba ka agang mo go ona:

⁸ Bona bao a ba lebogele Morena bopelotlhomogi jwa gagwe le dikgakgamatso tsa gagwe tse a di diretseng bana ba batho,

⁹ ka a kgalolositse mowa o o nyorilweng, a jesa mowa o o tshwerweng ke tlala tse di molemo.

¹⁰ Ba ba neng ba dutse mo lefifing le mo moriting wa loso ba golegilwe ka tlalelo le tshipi,

¹¹ ka ba ne ba rukhutlhegetse mafoko a Modimo, ba nyatsa kgakololo ya Mogodimodimo;

¹² ba o neng a kokobetsa dipelo tsa bona ka tapisego, ba kgopiwa go se na mothusi;

¹³ ya baa gona ba goelang Moreneng, ba le mo tlalelong, mme a ba golola mo dipitlaganong tsa bona;

¹⁴ a ba ntsha mo lefifing le mo moriting wa loso, a kgaola dikgole tsa bona:

¹⁵ A bao ba lebogele Morena bopelotlhomogi jwa gagwe le dikgakgamatso tsa gagwe tse a di diretseng bana ba batho,

¹⁶ ka a thubile ditswalo tsa kgotlho, a roba mephakarego ya tshipi.

¹⁷ Ba e neng e le masilo ka ntlha ya tsamao ya bona mo ditlolong, ba bogisiwa ka ntlha ya melato ya bona,

¹⁸ mo ba neng ba tenwa ke dijo tsotlhe, ba le gaufi le go swa;

¹⁹ ya baa gona ba goelang Moreneng, ba le mo tlalelong, mme a ba golola mo dipitlaganong tsa bona;

²⁰ a romela lefoko la gagwe, a ba fodisa, a pholosa maphelo a bona mo mabitleng:

²¹ A bao ba lebogele Morena bopelotlhomogi jwa gagwe le dikgakgamatso tsa gagwe tse a di diretseng bana ba batho;

²² a ba tsise ditlhabelo tsa tebogo, ba bolele ditiro tsa gagwe ka tuduetso.

²³ Ba ba neng ba tsamaya mo lewatleng ka dikepe, ba bapala mo metsing a magolo,

²⁴ ke bona ba ba bonyeng ditiro tsa Morena le dikgakgamatso tsa gagwe mo botennye.

²⁵ A laela, a fokisa phefo ya ledimo, la gogomosa dintelo tsa lewatle.

²⁶ Ba akgolelwa kwa godimo le kwa tlase, ba nyema moko mo tlalelong;

²⁷ ba ne ba theekela, ba kgokgweetsega jaaka letagwa, ba felelwa ke maano otlhe.

²⁸ Ba goela Moreneng, ba le mo tlalelong, mme a ba golola mo dipitlaganong tsa bona,

²⁹ a kokobetsa ledimo, la nna phefonyana fela, makhubu a lewatle a kokobela;

³⁰ mme ba itumelela go kokobela ga ona, mme a ba fitlhisa kwa bogorogelong jwa dikepe jo ba bo tlhologeletsweng:

³¹ A bao ba lebogele Morena bopelotlhomogi jwa gagwe le dikgakgamatso tsa gagwe tse a di diretseng bana ba batho;

³² a ba mo godise mo phuthegong ya morafe, ba mmoke mo pitsong ya bagolo.

³³ Dinoka o di fetotse sekaka, le metswedi ya metsi a e dira naga e e omileng.

³⁴ Lefatshe le le bogale o le fetotse magalaopa ka ntlha ya boikepo jwa baagi ba lone.

³⁵ Sekaka o se fetotse letsha la metsi, le naga e e omileng a e dira metswedi ya metsi.

³⁶ Ba ba bolawang ke tlala a ba baya teng, mme ba aga motse o ba ka nnang mo go ona.

³⁷ Ba jwala masimo, ba tlhoma ditlhare tsa moweine, ba fula maungo, ba kotula.

³⁸ Mme a ba tshegofatsa, ba be ba ntsifala thata; diruiwa tsa bona a se ka a di fokotsa.

³⁹ Ba boela ba fokotsega, ba kokobediwa ke bokete jwa botlhoko le khutsafalo.

⁴⁰ Yo o goromeletsang nyatsego mo batlotleging, a ba kgarakgatsha sekakeng mo go se nang tsela;

⁴¹ ene o ne a ntsha mohumanegi mo tlalelong, a mo godisa, a dira ditshika tse di tshwanang le difutshane ka bontsi.

⁴² Moo go bona ba ba nang le nnete, ba itumela; boikepo jotlhe bo ithibile molomo.

⁴³ Yo o botlhale ke mang? A a tlhokomele dilo tse, a ele ditiro tsa bopelotlhomogi jwa Morena tlhoko.