Lipesalema 106 - Setswana 1970

Boikanyo jwa Modimo le boikanyologo jwa Baiseraele

¹ Haleluya! Lebogang Morena, gonne o molemo; gonne bopelotlhomogi jwa gagwe ke jo bo sa khutleng.

² Ke mang yo o ka bolelang ditiro tsa bonatla tsa Morena, a utlwatsa poko ya gagwe yotlhe?

³ Go tlhogonolo ba ba tlhokomelang molao, ba ba dirang tse di siameng ka metlha yotlhe.

⁴ Nkgopole, Morena, ka o kgatlhwa ke morafe wa gago; nketele ka thuso ya gago

⁵ gore ke jese matlho ka go leba letlhogonolo la baitlhaolelwi ba gago, ke be ke thabele boitumelo jwa setšhaba sa gago le go belafala mmogo le boswa jwa gago.

⁶ Re leofile mmogo le borraarona, ra siamolola, ra ikepa.

⁷ Borraarona ba ne ba sa tlhokomele dikgakgamatso tsa gago, ba sa gopole bogolo jwa bopelotlhomogi jwa gago, mme ba rukhutlhegela Mogodimodimo kwa Lewatleng la Motlhaka.

⁸ Mme o ne a ba thusa ka ntlha ya leina la gagwe gore a supe bonatla jwa gagwe.

⁹ A kgalemela Lewatle la Motlhaka, la ba la kgala; a ba kgabagantsha merwalela jaaka e kete ke sekaka.

¹⁰ A ba namolela mo seatleng sa yo o ba tlhoileng, a ba golola mo seatleng sa mmaba.

¹¹ Metsi a khurumetsa baganetsi ba bona, ga se ka ga sala ope wa bona.

¹² Ya baa gona ba dumelang mafoko a gagwe, ba opela pako ya gagwe.

¹³ Mme ba akofa ba lebala ditiro tsa gagwe, ba se ka ba letela taelo ya gagwe.

¹⁴ Ba tlala keletso mo sekakeng, ba raela Modimo kwa nageng e e senya.

¹⁵ Ke fa a ba naya ka fa topong ya bona, mme a tsenya tlhorego mo meweng ya bona.

¹⁶ Ba ne ba fufegela Moše mo bothibelelong le Arone, moitshepi wa Morena.

¹⁷ Lefatshe la atlhama, la metsa Dathane, la khurumetsa setlhopha sa ga Abirame.

¹⁸ Ga tuka molelo mo lekokong la bona, kgabo ya fisa baikepi.

¹⁹ Ba ne ba dira namane kwa Horebe, ba obamela setshwantsho se se bopilweng.

²⁰ Ba ananya Kgalalelo ya bona ka setshwantsho sa kgomo e e fulang bojang.

²¹ Ba lebala Modimo, mopholosi wa bona o o dirileng dilo tse dikgolo kwa Egepeto,

²² tse di gakgamatsang kwa lefatsheng la ga Hame le tse di boitshegang fa Lewatleng la Motlhaka.

²³ Ke fa o re, o tla ba nyeletsa. Mme go ka bo go dirafetse jalo, fa Moše, moitlhaolelwi wa ona, a ka bo a se ka a ba emela fa pele ga ona, a tima bogale jwa ona gore o se ka wa ba senya.

²⁴ Ba bile ba nyatsa lefatshe le le eletsegang, ba se ka ba dumela lefoko la ona;

²⁵ ba ngongorega mo metlaaganeng ya bona, ba se ka ba utlwa Morena.

²⁶ Ke fa a ba tsholeletsa letsogo, a ikana gore o tla ba diga mo sekakeng,

²⁷ le go falaletsa losika lwa bona kwa ditšhabeng le go ba phatlalatsa mo mafatsheng.

²⁸ Ba ne ba ikgomaretsa mo go Baale-Pheore, ba ja tse di tlhabetsweng baswi,

²⁹ ba gakatsa Morena ka ditiro tsa bona, mme ba welwa ke petso.

³⁰ Ke fa Phinehase a nanoga, a tsereganya, mme petso ya khutlisiwa.

³¹ Ke sona se a kailweng mosiami ka ntlha ya sona mo ditshikeng tsotlhe go ya go ile.

³² Le gona ba mo gakatsa fa metsing a Meriba, Moše a ba a tlhagelwa ke molato ka ntlha ya bona.

³³ Gonne ba ne ba ganetsanya le Mowa wa ona, mo Moše a bileng a bua ka molomo se se sa mo tshwanelang.

³⁴ Ga ba a ka ba nyeletsa merafe e Morena a e ba kaetseng.

³⁵ Mme ba ne ba itlhakanya le baheitane, ba ithuta ditiro tsa bona.

³⁶ Ba direla medimo ya bona ya diseto e e tlogileng ya nna serai mo go bona.

³⁷ Ba tlhabela mewa e e bosula bomorwaa-bone le bomorwadia-bone.

³⁸ Ba tsholola madi a a se nang molato, – madi a bomorwaa-bone le bomorwadia-bone, ba ba tlhabela medimo ya diseto ya Bakanana; – lefatshe la itshepololwa jalo ka polao eo.

³⁹ Ba ikgotlela ka ditiro tsa bona, ba akafala ka go dira ga bona.

⁴⁰ Foo Morena a tukela morafe wa gagwe bogale, a tenwa ke boswa jwa gagwe.

⁴¹ A ba neela mo diatleng tsa merafe ya baheitane, ba laolwa ke batlhoi ba bona.

⁴² Baba ba bona ba ba gatelela, mme ba na le go ikoba fa tlase ga diatla tsa bona.

⁴³ O ne a ba thusa gantsi, mme bona ba mo rukhutlhegela ka maikaelelo a bona. Ba nyelela jalo ka molato wa bona.

⁴⁴ Le fa go ntse jalo o ne a ba tlhokomela mo pitlaganong ya bona, ka a utlwa dilelo tsa bona.

⁴⁵ A gopola kgolagano ya gagwe ka ntlha ya bona, a busa bogale, ka a na le bopelontle jo bogolo.

⁴⁶ A dira gore ba tlhomogelwe pelo ke botlhe ba ba ba isitseng botshwarong.

⁴⁷ Re thuse, Morena, Modimo wa rona, o re phuthe, o re golole mo baheitaneng gore re bake leina la gago le le boitshepo, re ipoke ka go go tlotla.

⁴⁸ A go bakwe Morena, Modimo wa Iseraele go tswa bosenang-tshimologo go ya bosakhutleng. A morafe otlhe o re: “Amen!” Haleluya!