Lipesalema 105 - Setswana 1970

Ditiro tse Modimo o di diretseng Baiseraele

¹ Lebogang Morena, lo bitse leina la gagwe; lo itsise ditiro tsa gagwe mo merafeng!

² Mo opeleleng, lo mo leletse, lo bolele dikgakgamatso tsotlhe tsa gagwe!

³ Belafalang ka leina la gagwe le le boitshepo; a go itumele dipelo tsa ba ba batlang Morena!

⁴ Botsang ka ga Morena le ka ga thata ya gagwe; lo batle sefatlhego sa gagwe ka gale.

⁵ Gopolang dikgakgamatso tsa gagwe tse a di dirileng, le ditshupo tsa gagwe le dikatlholo tsa molomo wa gagwe,

⁶ lona losika lwa ga Aborahame, motlhanka wa gagwe; lona bomorwa Jakobe, baitlhaolelwi ba gagwe!

⁷ Ena Morena ke Modimo wa rona; dikatlholo tsa gagwe di mo lefatsheng lotlhe.

⁸ O gopola kgolagano ya gagwe ka gale, e bong lefoko le a le laetseng ditshika tse kete.

⁹ Kgolagano e o e dirileng le Aborahame le ikano e o e ikanetseng Isaka,

¹⁰ a e tlhomamisetsa Jakobe go nna molao le Iseraele go nna kgolagano e e sa khutleng,

¹¹ fa a re: “Wena ke tla go naya lefatshe la Kanana gore e nne kabelo ya boswa jwa lona,”

¹² jale fa palo ya bona e sa ntse e le nnye, mme e le ba se kae, e bile ba le baeng mo go lone,

¹³ ba tlhatlologanya dinageng, ba tswa setšhabeng ba ya setšhabeng, ba tlogela bogosi bongwe, ba ya kwa morafeng o mongwe.

¹⁴ A se ka a leseletsa motho ope go ba gatelela; le gona a betsa dikgosi ka ntlha ya bona a re:

¹⁵ “Se ameng batlodiwa ba me, lo se direle baporofeti ba me bosula.”

¹⁶ O kile a biletsa tlala mo lefatsheng, a senya tlamelo yotlhe ya dijo.

¹⁷ A roma monna go ba etelela pele, e bong Josefa, a rekisiwa go nna motlhanka.

¹⁸ Ba tsenya maoto a gagwe mo ditshiping, a ya go lala ka esi mo dikeetaneng

¹⁹ go ya go dirafale lefoko la gagwe, lefoko la Morena le mo supe a le mo nneteng.

²⁰ Kgosi ya roma go mmofolola, mmusi wa merafe a mo golola.

²¹ Ya mo dira morena wa ntlo ya yona le molaodi wa tsotlhe tse e nang natso

²² gore a laole dikgosana tsa yona ka fa a ratang ka teng le go ruta bagolo ba yona botlhale.

²³ Ke fa Iseraele a ya kwa Egepeto; Jakobe a jaka mo lefatsheng la ga Hame.

²⁴ Mme Morena a atisa morafe wa gagwe segolo, a o thatafatsa bogolo go baba ba ona.

²⁵ O ne a ba tlhanola dipelo gore ba tlhoe morafe wa gagwe, ba direle batlhanka ba gagwe ka bolotsana.

²⁶ A roma Moše, motlhanka wa gagwe, le Arone yo o neng a mo itlhaoletse.

²⁷ Bao ba dira ditshupo tsa gagwe mo go bona, le dikgakgamatso mo lefatsheng la ga Hame.

²⁸ A romela lefifi, a fifatsa; mme ba tlhokomologa lefoko la gagwe.

²⁹ A fetola metsi a bona madi, a bolaya ditlhapi tsa bona.

³⁰ Lefatshe la bone la ba la tlalatlala digwagwa, le mo matlwaneng a dikgosi tsa bone.

³¹ A laela, mme ga tla diboba le menang mo nageng yotlhe ya bone.

³² A dira pula ya bone sefako, a romela melelo ya dikgadima mo lefatsheng la bone.

³³ A itaya meweine ya bone le mefeie ya bone, a robaka ditlhare tsa naga ya bone.

³⁴ A laela, mme ga tla tsie ya segongwane le molome e e se nang palo.

³⁵ Ya ja botala jotlhe mo lefatsheng la bone, ya laila maungo a masimo a bone.

³⁶ Le gona a itaya maitibolo otlhe mo lefatsheng la bone, e bong matsalwapele a thata yotlhe ya bone.

³⁷ Ke fa a ba hudusa ba tshotse selefera le gouta, go se masalela ape mo ditsong tsa gagwe.

³⁸ Baegepeto ba itumelela khudugo ya bone, gonne ba ne ba wetswe ke letshogo ka ntlha ya bone.

³⁹ O ne a phutholola leru go nna tshireletso le molelo go bonesa bosigo.

⁴⁰ E rile ba lopa, a tsisa maphurrwana, a ba kgorisa senkgwe sa legodimo.

⁴¹ A phatlola lefika, metsi a phothometsega, a ela mo sekakeng jaaka noka.

⁴² Gonne o ne a gopola lefoko la gagwe le le boitshepo, le Aborahame, motlhanka wa gagwe.

⁴³ A bolotsa morafe wa gagwe ka boitumelo le baitlhaolelwi ba gagwe ka tuduetso.

⁴⁴ A ba naya mafatshe a ditšhaba gore ba rue tse merafe e di phuthileng ka matsapa,

⁴⁵ e le gore ba dirise ditaelo tsa gagwe le go tlhokomela melao ya gagwe. Haleluya!