Lipesalema 104 - Setswana 1970

Go baka Modimo ka ditiro tsa tlholego

¹ Baka Morena, mowa wa me! Morena, Modimo wa me, o mogolo thata; o apere kgalalelo le borena.

² O ikapesa lesedi jaaka kobo, o phutholola legodimo jaaka lesela la tente.

³ O aga maago a gago a bogodimo mo metsing, o ntsha maru koloi ya gago, o tsamaya ka diphuka tsa phefo.

⁴ O dira diphefo barongwi ba gago le dikgabo tsa molelo badiredi ba gago.

⁵ O beile lefatshe mo metheong ya lone gore le se ka la tshikinyega ka motlha ope go ya bosakhutleng.

⁶ O no o le khurumeditse ka morwalela jaaka ka seaparo, metsi a ne a eme godimo ga dithaba,

⁷ a tshaba kgalemo ya gago, a thibogela lentswe la tumo ya maru ya gago.

⁸ Dithaba tsa tlhatloga, mekgatsha ya itshetlela; metsi a ya kwa felong fa o a laoletseng gona.

⁹ O beile molelwane o a sa ka keng a o tlola gore a se boe a khurumetsa lefatshe gape.

¹⁰ O eledisa metsi a metswedi mo melapong, a ba a ela fa gare ga dithaba.

¹¹ A nowa ke diphologolo tsotlhe tsa naga, dipitse tsa naga di itima lenyora.

¹² Dinonyane tsa legodimo di agile godimo ga ona, di letsa melodi mo dikaleng.

¹³ O nosa dithaba metsi a a tswang maagong a bogodimo a gago; lefatshe le kgora maungo a ditiro tsa gago.

¹⁴ O tlhogisetsa dikgomo bojang, le motho dimela go mo thusa le go ntsha dijo mo lefatsheng,

¹⁵ le weine go itumedisa pelo ya motho, le lookwane go phatsimisa sefatlhego, le senkgwe go tiisa pelo ya motho.

¹⁶ Ditlhare tsa Morena di a kgora, le mesetere ya Lebanone e o e tlhomileng,

¹⁷ mo dinonyane di agang dintlhaga teng; le lekololwana sentlhaga sa lone se mo ditlhareng tsa mesiperese.

¹⁸ Dithaba tse dikgolo ke botshabelo jwa diphele; jwa dipela ke mafika.

¹⁹ O dirile ngwedi gore o supe dipaka; letsatsi le itse go phirima ga lone.

²⁰ Fa o tsisa lefifi, go nna bosigo, diphedi tsotlhe tsa sekgwa di tsamaya mo go jona.

²¹ Ditawana di dumela se di ka se bolayang, di batla dijo tsa tsona mo Modimong.

²² Fa letsatsi le tlhaba, di a boa, di ye go botha mo dikutleng tsa tsona.

²³ Motho a tswele kwa tirong ya gagwe le kwa matsapeng a gagwe go ya maitsiboeng.

²⁴ Ditiro tsa gago, Morena, kana di methalethale jang! O dirile tsotlhe ka botlhale; lefatshe le tletse ditlhodiwa tsa gago.

²⁵ Fa e le lewatle le legolo, le atlhametse ntlheng tsotlhe; go saila diphedi mo go lone tse di se nang palo, diphedi tse dinnye le tse dikgolo.

²⁶ Mekoro e tsamaya teng, le leruarua le o le bopileng gore le tshameke mo go lone.

²⁷ Tsotlhe di lebeletse wena gore o di fe dijo tsa tsona ka nako ya teng.

²⁸ Fa o di fa, di a sela; fa o huporolola seatla, di kgora tse di molemo;

²⁹ fa o bipa sefatlhego, di a tshoga; fa o tlosa mewa ya tsona, di a swa, di boela loroleng lwa tsona;

³⁰ fa o roma mowa wa gago, di a tlholega; o tlhabolola sefatlhego sa lefatshe.

³¹ A kgalalelo ya Morena e nnele ruri; a Morena a itumelele ditiro tsa gagwe,

³² ene yo e a reng a leba lefatshe, le rorome; e re a ama dithaba, di kue musi.

³³ Ke tla opelela Morena fa ke sa phedile; ke tla baka Modimo wa me ke sa le yo.

³⁴ A dikakanyo tsa me di o natefele; nna ke tla itumela mo go Morena.

³⁵ A baleofi ba nyelediwe mo lefatsheng; a baikepi ba se tlhole ba nna teng. Mowa wa me, baka Morena. Haleluya!