Lipesalema 103 - Setswana 1970

Go lebogela Modimo boitshwarelo jwa ona

¹ Pesalome ya ga Dafita. Baka Morena, mowa wa me, le tsotlhe tse di mo teng ga me, bakang leina la gagwe le le boitshepo!

² Baka Morena, mowa wa me; se lebale sepe sa ditiro tse di molemo tsa gagwe!

³ O itshwarela maleo a gago otlhe, o fodisa makoa a gago otlhe.

⁴ O golola bophelo jwa gago mo tshenyegong, o go rwesa bopelotlhomogi le mautlwelo-botlhoko mo tlhogong.

⁵ O go kgorisa tse di molemo gore o busediwe bokaung jaaka ntsu.

⁶ Morena o direla botlhe tshiamo le katlholelo ba ba patikwang.

⁷ O ne a itsise Moše ditsela tsa gagwe le Baiseraele ditiro tsa gagwe.

⁸ Morena o kutlwelo-botlhoko le boitshwarelo; o bopelotelele, o bopelontle jo bogolo.

⁹ Ga a nke a nna bogale ka metlha, le e seng go galefela ruri.

¹⁰ Ga a re direla ka fa maleong a rona, le e seng go re busolosa ka fa ditshiamololong tsa rona.

¹¹ Gonne bopelotlhomogi jwa gagwe bo bogolo mo go ba ba mmoifang jaaka legodimo le okame lefatshe.

¹² O tlosetsa ditlolo tsa rona kgakala, jaaka botlhabatsatsi bo le kgakala le bophirimatsatsi.

¹³ Morena o utlwela ba ba mmoifang botlhoko, jaaka rra-bana a utlwela bana ba gagwe botlhoko.

¹⁴ Gonne ena o itse popego ya rona, o gopola, fa re le lorole.

¹⁵ Motho ena, malatsi a gagwe a tshwana le bojang; o thunya jaaka sethunya sa naga.

¹⁶ Fa phefo e se fokile, ga se yo, mme felo ga sona ga go tlhole go se itse.

¹⁷ Mme bopelotlhomogi jwa Morena bo mo go bona ba ba mmoifang, go tswa bosenang-tshimologo go ya bosakhutleng, le tshiamo ya gagwe mo baneng ba bana,

¹⁸ e leng ba ba bolokang kgolagano ya gagwe, ba ba gakologelwang ditaelo tsa gagwe gore ba di dirise.

¹⁹ Morena o tlhomamisitse sedulo sa bogosi sa gagwe kwa magodimong; bogosi jwa gagwe bo busa ntlheng tsotlhe.

²⁰ Bakang Morena, lona baengele ba gagwe, lona dinatla tse di thata, ba lo dirafatsang lefoko la gagwe ka go utlwa lentswe la lefoko la gagwe.

²¹ Bakang Morena, lona masomosomo otlhe a gagwe, lona badiredi ba gagwe, ba lo dirang ka fa thatong ya gagwe.

²² Bakang Morena, lona ditiro tsotlhe tsa gagwe mo mafelong otlhe a puso ya gagwe; baka Morena, wena mowa wa me!