Lipesalema 10 - Setswana 1970

Thapelo ya gore Modimo o thuse kgatlhanong le boikgodiso jwa baba

¹ Morena, o emetseng kgakala, o iphitlhetseng mo metlheng ya pitlagano?

² Motlalelwi o pitlagantswe ka ntlha ya boikgantsho jwa baikepi. A ba tshwarwe ke maano a ba a logileng a boferefere.

³ Gonne moikepi o ikgantsha ka keletso ya gagwe; mmapadi wa tsietso o tshegofatsa ke go re o kgala Morena.

⁴ Moikepi, mo boikgodisong jwa gagwe ga a batle Modimo; o ithaya a re: “Ga go na Modimo.” Ke yona megopolo yotlhe ya gagwe.

⁵ Ditsela tsa gagwe di na le botswelelopele ka gale, dikatlholo tsa gago di kwa godimodimo, kgakala le ena; baganetsi botlhe ba gagwe o a ba budula.

⁶ Mo pelong ya gagwe o ithaya a re: “Ga ke na go tshikinyega, ke mongwe yo ke se kitlang ke wela mo tlalelong go ya bokhutlong.”

⁷ Molomo wa gagwe o tletse khutso le tsietso le patiko; fa tlase ga loleme lwa gagwe go na le letshwenyo le tshenyo.

⁸ O bataletse mo talelong ya metse; yo o se nang molato o mmolaela mo sephiring; matlho a gagwe a tlhomilwe mo go yo o tlhokang letlhogonolo.

⁹ O lalela mo sephiring jaaka tau mo sekhung sa yona, o laletse mmogisegi gore a mo tshware; o tshwara motlalelwi ka go mo goga ka letloa la gagwe.

¹⁰ O a boba, a batalale, mme ba ba tlhokang letlhogonolo ba wele mo maroong a gagwe.

¹¹ O ithaya mo pelong a re: “Modimo o lebetse, o ipipile sefatlhego, ga o kitla o go bona ka gope.”

¹² Morena, nanoga, Modimo, tsholetsa letsogo, se lebale batlalelwi!

¹³ Kana moikepi o kgalelang Modimo, a ithaya mo pelong a re: “Ga o ne o busolosa”?

¹⁴ Wena o bonye; gonne o lebile tapisego le tshwenyego gore di beiwe mo seatleng sa gago. Yo o itlhokang o di neetse wena, o mothusi wa dikhutsana.

¹⁵ Robaganya letsogo la moikepi; yo o bosula o busolose boikepo jwa gagwe, gore o se ka wa tlhola o bo bona.

¹⁶ Morena ke Kgosi ka gale le ka bosakhutleng, baheitane ba nyeletse mo lefatsheng la gagwe.

¹⁷ Morena, o utlwile keletso ya baikokobetsi, o tiisa dipelo tsa bone, o tlhwaya tsebe go utlwa,

¹⁸ go tla o siamisetsa khutsana le mopatikwi, gore motho wa lefatshe a se ka a tlhola a ba tlhorisa.