Lipalo 15 - Setswana 1970

Kokeletso ya melao ya ditlhabelo

¹ Morena a bua le Moše a re:

² “Bua le Baiseraele o ba ree o re: ‘E re lo sena go fitlha kwa lefatsheng la maago a lona le ke tla le lo nayang,

³ mme lo rata go direla Morena tlhabelo ya molelo, le fa e le setlhabelo sa phiso gongwe setlhabelo se se jewang, le fa e le sa go dirafatsa maikano ka bolona gongwe sa bopelotshweu gongwe ka meletlo ya lona, go direla Morena monko o o nkgang monate wa dikgomo gongwe wa difutshane tsa lona:

⁴ Gona yo o tlisetsang Morena neo ya tlhabelo ya gagwe a tlise le tshupelo ya bupe jo bo boleta jwa karolo ya lesome ya efa, bo dubilwe ka lookwane lwa karolo ya bone ya hina .

⁵ Le gona o baakanye tshupelo ya noo ya karolo ya bone ya hina ya weine mmogo le setlhabelo sa phiso gongwe setlhabelo se se jewang sa kwana e le nngwe.

⁶ Fa e le phelehu e e tlhabelwang o baakanye tshupelo ya bupe jo bo boleta jwa dikarolo di le pedi tsa lesome tsa efa, bo dubilwe ka lookwane lwa karolo ya boraro ya hina;

⁷ o be o tlise karolo ya boraro ya hina ya weine ya tshupelo ya noo, e le tsa monko o o monate mo Moreneng.

⁸ Mme fa o baakanya setlhabelo sa phiso gongwe se se jewang sa poana, le fa e le sa go dirafatsa maikano ka bowena, gongwe sa go leboga Morena,

⁹ mmogo le poana o tlise tshupelo ya bupe jo bo boleta jwa dikarolo di le tharo tsa lesome tsa efa, bo dubilwe ka lookwane lwa bontlhanngwe jwa hina;

¹⁰ o be o tlise bontlhanngwe jwa hina ya weine ya tshupelo ya noo. Ke tsa tshupelo ya molelo ya monko o o monate mo Moreneng.

¹¹ “ ‘A kgomo nngwe le nngwe e direlwe jalo le phelehu nngwe le nngwe le sefutshane sengwe le sengwe, le fa e le sa nku gongwe sa podi.

¹² A palo ya ditshupelo tsa dijo le dino e lekane le palo ya diruiwa tse lo di tlhabelang.

¹³ Mongwe le mongwe yo e leng ngwana wa motse a baakanye dineo tseo ka mokgwa oo, fa a tlisa tshupelo ya molelo ya monko o o monate mo Moreneng.

¹⁴ Le moeng yo o lo agetseng, le fa e le ka sebaka sefe gongwe mo losikeng lofe, fa a baakanya tshupelo ya molelo ya monko o o monate mo Moreneng, a a dire jaaka lona lo dira.

¹⁵ Mo phuthegong go molao o le mongwe fela wa lona le wa moeng yo o lo agetseng. Ke molao o o nnetseng ruri mo ditshikeng tsa lona: Moeng o tshwana le lona fa pele ga Morena.

¹⁶ Molao o le mongwe fela le tshiamelo e le nngwe fela di tshwanetse lona le baeng ba ba lo agetseng.’ ”

¹⁷ Morena a ba a raya Moše a re:

¹⁸ “Bua le Baiseraele o ba ree o re: ‘E re lo sena go fitlha kwa lefatsheng le ke lo isang kwa go lone,

¹⁹ mme lo ja dijo tsa lefatshe leo, gona lo ntshetse Morena lekgetho.

²⁰ Lo ntshe kuku ya seabe, e le ya bupe jwa mabele a lona a a butswang pele. Lo e ntshe fela jaaka lekgetho la seboana.

²¹ Lo neele Morena seabe sa bupe jwa lona jwa mabutswapele mo tlhatlologanong yotlhe ya ditshika tsa lona.

²² “ ‘E re fa lo ka leofa ka go sa itse, lo sa dire ka fa ditaolong tsotlhe tseo tse Morena o di boleletseng Moše;

²³ e bong tsotlhe tse Morena o di lo laetseng ka Moše go tloga ka letsatsi le Morena o di laetseng ka lone le kwa pele mo tlhatlologanong yotlhe ya ditshika tsa lona:

²⁴ Jaanong fa go dirilwe jalo ke phuthego ka go sa itse, e sa itemoge, foo a phuthego yotlhe e baakanye poana e le nngwe ya setlhabelo sa phiso sa monko o o monate mo Moreneng le tshupelo ya dijo ya sona le tshupelo ya noo ya sona, ka fa di tshwanetseng ka teng, le phoko e le nngwe ya setlhabelo sa boleo.

²⁵ A moperesiti a direle phuthego yotlhe ya Baiseraele thuanyo jalo, foo ba tla itshwarelwa; gonne e ne e se ka bomo, e bile ba tsiseditse Morena tshupelo ya bone ya molelo, ba tsisa setlhabelo sa boleo sa bone fa pele ga Morena ka ntlha ya phoso ya bone.

²⁶ Phuthego yotlhe ya Baiseraele e tla itshwarelwa jalo mmogo le moeng yo o ba agetseng; gonne phoso e ne e le ya morafe otlhe.

²⁷ “ ‘Mme fa motho a le mongwe a leofa ka bokoa, a a tlise potsane e namagadi ya ngwaga o le mongwe ya setlhabelo sa boleo.

²⁸ Jaanong a moperesiti a direle motho yoo thuanyo yo o leofileng ka go sitega, e se ka bomo, fa pele ga Morena go mmatlela boitshwarelo, foo o tla itshwarelwa.

²⁹ Le fa e le ngwana wa motse wa Baiseraele gongwe moeng yo o ba falaletseng, lo nne le molao o le mongwe fela wa yo o dirang boleo ka go sa itse.

³⁰ “ ‘Fela motho yo o dirang boleo ka bomo, e ka nna ngwana wa motse gongwe moeng, ene o nyefola Morena. A motho yoo a nyelediwe mo morafeng wa ga gabo.

³¹ Gonne o nyaditse lefoko la Morena, a tlola molao wa gagwe. Motho yoo o tshwanetse go nyelediwa. Molato wa gagwe o mo wetse.’ ”

Petso ya yo o itshepolotseng Sabata

³² E rile Baiseraele ba ntse ba le kwa sekakeng ba fitlhela monna mongwe a rwalela dikgong ka letsatsi la Sabata.

³³ Jaanong ba ba mmonyeng a di rwalela ba mo isa kwa go Moše le Arone le kwa phuthegong yotlhe.

³⁴ Ba mo tsenya mo kgolegong; gonne go ne go ise go atlholwe gore o ka tweng.

³⁵ Ke fa Morena a raya Moše a re: “Monna yoo o tshwanetse go bolawa; a phuthego yotlhe e mo kgobotletse ka majwe kwa ntle ga bothibelelo!”

³⁶ Phuthego yotlhe ya ba ya mo ntshetsa kwa ntle ga bothibelelo, ya mo kgobotletsa ka majwe, mme a swa, jaaka Morena a laetse Moše.

Ditshupo mo diaparong go ba gopotsa melao ya Modimo

³⁷ Morena a ba a raya Moše a re:

³⁸ “Bua le Baiseraele o ba ree o re, ba itirele dikola mo mejeng ya diaparo tsa bone mo tlhatlologanong ya ditshika tsa bone, ba bofelele megala e mebududu mo dikoleng tsa meja.

³⁹ A e nne dikola tsa go re fa lo di leba, lo gakologelwe ditaolo tsotlhe tsa Morena, lo di dirise, mme lo se latele dipelo tsa lona le matlho a lona tse lo akafalang fa lo di sala morago;

⁴⁰ e le go re lo gakologelwe ditaolo tsotlhe tsa me, lo di dirise, lo nne ba ba boitshepo ba Modimo wa lona.

⁴¹ Ke nna Morena Modimo wa lona yo ke lo ntshitseng kwa lefatsheng la Egepeto gore ke nne Modimo wa lona; nna ke Morena Modimo wa lona.”