Likhutsahalelo 5 - Setswana 1970

Selelo se khutla ka thapelo

¹ Gakologelwa, Morena, tse di re tletseng! Leba ò bone kgobego ya rona!

² Naga ya ga etsho e tserwe ke baeng; ba ditšhaba di sele ba nna mo matlong a rona.

³ Re fetogile masiela, re se na rraarona; e kete bommaarona ke batlholagadi.

⁴ Metsi a rona re a nwa re a lefetse ka madi; dikgong tsa rona re di bona ka go reka.

⁵ Ba ba re lateletseng ba mo thamong tsa rona; fa re lapile, ga re na go ikhutsa.

⁶ Re neelanye diatla le Baegepeto le Baasiria gore re tle re kgore bogobe.

⁷ Borraetsho ba leofile, mme ga ba tlhole ba le teng; ke rona ba re rweleng dipetso tsa melato ya bone.

⁸ Batlhanka ba a re busa, ga go na yo o re gololang mo diatleng tsa bone.

⁹ Dijo tsa rona re di tseela gae re le mo kotsing ya go bolawa; re tshaba tšhaka ya baagi ba sekaka.

¹⁰ Letlalo la rona le tuka bolelo jaaka sebeso ka ntlha ya mogote wa tlala.

¹¹ Go tlotlolotswe basadi mo Sione le makgarebe mo metseng ya Juta.

¹² Dikgosana di pegilwe, tsa kgangwa ke megala ya bone; go sa tlotlwe banna bagolo.

¹³ Makau a na le go kuka lolwala; basimane ba wa ba imetswe ke dikota.

¹⁴ Banna bagolo ga ba tlhole ba ya lekgotleng; makau a khutlile go letsa dirankure.

¹⁵ Boitumelo jwa dipelo tsa rona bo fedile; dipina di re fetogetse bohutsana.

¹⁶ Serwalo sa bogosi se ole mo ditlhogong tsa rona. A tatlhego ya rona wee, ka re leofile!

¹⁷ Tse di re lwatsang dipelo le go fifatsa matlho a rona

¹⁸ ke tsa thaba ya Sione e e fetogileng marope, e diphokojwe di sianang mo go yona.

¹⁹ Wena Morena o ntse o busa ka bosakhutleng; sedulo sa bogosi sa gago se tlhomame mo ditshikeng tsotlhe.

²⁰ Ke ka ntlhaang, fa o re lebalela ruri, o re tlogela sebaka se seleele?

²¹ Morena, re busetse kwa go wena gore re tle re tlhabologe; ntšhwafatsa malatsi a rona jaaka gale!

²² Kampo a o re latlhetse ruri? A o re galefetse thata thata?