Likhutsahalelo 4 - Setswana 1970

Go lelelwa boikepo jwa Bajuta le tatlhego ya bone

¹ Malo-nna-wee! Gouta e fifetse jang, ga fetoga gouta e ntlentle! Mafika a a boitshepo a tshololwa kwa dikhutlong tsa mebila.

² Bomorwa Sione ba e leng dinatla, ba ne ba tlotlega jaaka gouta e ntlentle. Ijoo! Ba kailwe dinkgwana tsa letsopa fela, tse di dirwang ke diatla tsa mmopi.

³ Diphokojwe le tsona di ntshetsa diphokojwana mabele a tsona go di amusa. Mme morwadia morafe wa me o ne a le setlhogo jaaka bontšhwe mo nageng.

⁴ Loleme lwa lesea lo ne lwa kgomarela magalapa a lone ka lenyora; bana ba lelela bogobe, go se na yo o ba nathelang.

⁵ Baji ba tse di monate ba ne ba felelela mebileng; ba ba neng ba robadiwa maseleng a mahibidu ba lala kwa thutubudung.

⁶ Gonne molato wa morwadia morafe wa ga etsho o ne o feta boleo jwa Sotoma, ona motse o o ribegeditsweng ka ponyo ya leitlho, o sa amiwe ke diatla.

⁷ Baikiledi ba ona ba ne ba phatsima bogolo go semathana, ba phala mašwi ka bosweu; ba ne ba le mmele o mohibidu bogolo go matlapana a dikorala, ba bopegile jaaka a botala jo bowebu.

⁸ Ponalo ya bone e ntshofetse bogolo go mosidi, ga ba itsiwe mebileng; letlalo la bone le ngaparetse marapo a bone, ba omeletse jaaka dikgong.

⁹ Ba ba bolailweng ka tšhaka ba tlhogonolo bogolo go ba ba suleng ka tlala, ba ba feleletseng, ba bolawa ka go tlhoka dijo tsa masimo.

¹⁰ Basadi ba ba bonolo ba apaya bana ba bone ka diatla tsa bone; ya nna dijo tsa bone mo tatlhegong ya morwadia morafe wa ga etsho.

¹¹ Morena o dirafaditse kgalefo ya gagwe, a gorometsa bogale jwa gagwe jo bo tukang; a tshuba molelo mo motseng wa Sione o o jeleng metheo ya ona.

¹² Dikgosi tsa lefatshe le baagi botlhe ba lone ga ba a ka ba dumela, fa mopitlaganyi le mmaba ba ka tsena mo dikgorong tsa Jerusalema.

¹³ Mme ba tsenye ka ntlha ya dibe tsa baporofeti ba gagwe le ka ntlha ya maleo a baperesiti ba gagwe, ba ba neng ba tsholola madi a basiami teng.

¹⁴ Ba ne ba thekesela jaaka difofu mebileng, ba kgotlelegile ka madi; batho ba bile ba palelwa ke go ama diaparo tsa bone.

¹⁵ Ba goelana ba re: “Fapogang, yo o itshekologileng ke yo! Fapogang, fapogang, se mo ameng!” Ba bua mo ditšhabeng ba re: “Fa ba tshaba le go thekesela ga ba a tshwanela go nna mono.”

¹⁶ Morena ka esi o ba faladitse, ga a tlhole a ba tlhokomela. Baba ga ba a ka ba tlotla baperesiti, le e seng go tlhomogela baporofeti pelo.

¹⁷ Matlho a rona a ntse a itapisitse go lebelela thuso e e leng ya lefelafela; re ne re tlhola re le mo diraleng tsa rona, re letela setšhaba se se sa tleng go re thusa.

¹⁸ Ba ne ba lalela dikgato tsa rona, re sa kgone go tsamaya mo dipatlelong tsa rona. Bokhutlo jwa rona bo ne bo atametse, malatsi a rona a feleletse, ee, bokhutlo jwa rona bo ne bo tlile.

¹⁹ Ba ba re lateletseng ba ne ba le bobebe bogolo go bontsu ba legodimo; ba re tsoma mo dithabeng, ba re lalela mo sekakeng.

²⁰ Mowa wa bophelo jwa rona, e bong Motlodiwa wa Morena, o ne a tshwarwa mo digopong tsa bone; yo re buileng ka ga gagwe ra re: “Re tla phela mo moriting wa gagwe re le gare ga ditšhaba.”

²¹ Wena morwadia Etomo yo o agileng mo lefatsheng la Use, itumele o thabe. Le wena o tla tlelwa ke senwelo; o tla tagwa, o ikapola!

²² Kotlo ya gago e lekanye, wena morwadia Sione; ga a ka ke a go isa gape mo botshwarong. Mme wena morwadia Etomo o tla go beletsa molato wa gago, a ba a senola maleo a gago.