Likhutsahalelo 3 - Setswana 1970

Kgomotso pogisong

¹ Ke nna monna yo dipogo di mo dirafaletseng ka thupa ya bogale jwa gagwe.

² O nkgogile, a nkisa lefifing le le se nang lesedi.

³ Ee, o tlhola a tsholetsa letsogo ka metlha go nkotla gangwe le gape.

⁴ O otisitse nama ya me le letlalo la me, a nthoba marapo.

⁵ O nkageletse, a ntikanyetsa ka botlhole le tapisego,

⁶ a ntudisa lefifing jaaka baswi ba bogologolo.

⁷ A nkagelela ka dipota, ke sa kgone go tswa; a mpofa ka keetane e e makete.

⁸ Le fa ke goa, ke lelela thuso, thapelo ya me o a e gana.

⁹ A thiba tsela ya me ka mafika; a ntshenyetsa mebila ya me.

¹⁰ A ntalela jaaka bere, jaaka tau maiphitlhong.

¹¹ A faposa ditsela tsa me, a nkgarolaka, a ntira yo o reregang.

¹² A gagamatsa bora jwa gagwe, a nkemisa ke le yo o hulwang.

¹³ A ntlhaba mo diphilong ka metsu ya mokotlopo.

¹⁴ Ka tshegwa ke morafe otlhe wa ga etsho, ka tlhola ke sotlwa ka sefela sa bone.

¹⁵ A nkgorisa tse di galakang, a nnosa longana.

¹⁶ A nthoba meno ka go mphurisa lekgwarana, a nkatela moloreng.

¹⁷ Ò lelekile mowa wa me mo kagisong, ka lebala tsa letlhogonolo.

¹⁸ Ka ba ka re: “Tumiso ya me e fedile; Morena ke mo tlhobogile.”

¹⁹ Gopola pogisego ya me le ditimelo tsa me, le longana le botlhole.

²⁰ Mowa wa me o ntse o gopola tseo, o obegile mo teng ga me.

²¹ Selo se ke tla se tsenya mo pelong; ke gona ka moo ke solofelang ke re:

²² Ke mapelonomi a Morena, fa re ise re felele ruri; ee, mapelotlhomogi a gagwe ga a ise a fele.

²³ Nnyaya, a tsoga a le mašwa mosong mongwe le mongwe; boikanyego jwa gago bo bogolo.

²⁴ Pelo ya me e re: “Kabelo ya me ke Morena; ke ka moo ke solofelang mo go ene.”

²⁵ Morena o lorato le ba ba solofelang mo go ene; o lorato le pelo e e mmatlang.

²⁶ Go molemo, fa motho a leta thuso ya Morena a sa potlake.

²⁷ Ke se se molemo, fa monna a rwala joko a sa le monnana.

²⁸ A a nne a le esi, a didimetse, fa a e rwesitswe ke ene.

²⁹ A a ise molomo wa gagwe kwa loroleng; ka gongwe go teng se se solofelwang.

³⁰ Yo o mo itayang a a mo neele lesama, a kgore kgobo!

³¹ Gonne Morena ga a latlhele ruri.

³² Gonne fa a utlwisitse motho botlhoko, o tla mo tlhomogela pelo gape, jaaka a le mapelonomi a magolo.

³³ Gonne ga se gore o a kgatlhega, fa a tlhokofatsa batho, fa a ba bogisa.

³⁴ Fa go gatakwa batshwarwi ba botlhe ba lefatshe ka maoto;

³⁵ fa tshiamelo ya monna e sokamisiwa tshekong fa pele ga Mogodimodimo;

³⁶ fa ba pateletsa motho yo o sekang dikgang tsa gagwe. A ga ke re, dilo tseo di bonwa ke Morena?

³⁷ Go bua mang, go bo go dirafale? A ga se Morena yo o laotseng jalo?

³⁸ Tse di botlhoko le tse di molemo a ga di tswe mo molomong wa Mogodimodimo?

³⁹ Motho yo o phelang o ngongoregelang? A mongwe le mongwe a ngongoregele maleo a gagwe!

⁴⁰ A re tlhatlhobeng ditsela tsa rona, re di tlhotlhomise, re boele Moreneng!

⁴¹ Dipelo tsa rona le diatla tsa rona a re di tsholeletseng kwa Modimong legodimong re re:

⁴² “Go ikepile rona, ra se ka ra utlwa; ke tse o neng o sa di itshwarele.

⁴³ “O iphitlhile bogaleng, wa re latelela; o re bolaile, o sa tlhomoge pelo.

⁴⁴ O iphitlhile mo lerung, ke fa go sa fitlheng thapelo epe.

⁴⁵ O re dirile matlakala le ditshila mo gare ga merafe.

⁴⁶ Baba botlhe ba rona ba re atlhamela, ba re ikgantshetsa.

⁴⁷ Re dirafaletswe ke therego le gopo le tatlhego le thobego.

⁴⁸ Matlho a me a ela dinoka tsa metsi ka ntlha ya go senngwa ga morwadia morafe wa ga etsho.

⁴⁹ “Matlho a me a ntse a rotha dikeledi, a sa khutle, go se na boikhutso,

⁵⁰ go tsamaya Morena a okomele, a di bone, a le kwa legodimong.

⁵¹ Matlho a me a ntlhokofatsa pelo ka ntlha ya bomorwadia motse wa ga etsho botlhe.

⁵² Baba ba me ba ntse ba ntatelela, ba ntsoma jaaka nonyane, ke se na molato.

⁵³ Bophelo jwa me ba bo sentse moleteng, ba nkonopa ka matlapa.

⁵⁴ Metsi a ela godimo ga tlhogo ya me, ka ba ka re, ke nyeletse.

⁵⁵ “Ka bitsa leina la gago, Morena, ke le kwa tlasetlase moleteng.

⁵⁶ O utlwile lentswe la me le le reng: ‘Se ithibe tsebe, fa ke fegelwa, fa ke tlhaeleletsa thuso!’

⁵⁷ E rile ke go bitsa jalo, wa bo o le gaufi wa re: ‘Se boife!’

⁵⁸ “O nkemetse, Morena, mo tshekong, wa golola bophelo jwa me.

⁵⁹ Morena, o bonye tse ba di mpateletsang; kgang ya me o e nkatlholele!

⁶⁰ O di bonye tsotlhe, fa ba ntirela ka setlhogo; le maano otlhe a ba a ntogetseng.

⁶¹ O utlwile dikgobo tsa bone, Morena, le maano otlhe a ba a ntogetseng;

⁶² le dikgang tsa ba ba nkganetsang, le se ba se akanyang letsatsi lotlhe go lwa le nna.

⁶³ A ko o bone, fa ba dula, fa ba tsoga, ba ntse ba nkopela go ntshotla.

⁶⁴ “Morena, o tla ba lefisa ka fa ditirong tsa diatla tsa bone.

⁶⁵ O tla ba thatafatsa pelo. A khutso ya gago e ba wele!

⁶⁶ O tla ba latelela ka bogale, o ba nyeletsa, o ba tlosa fa tlase ga legodimo la gago, Morena.”