Liane 8 - Setswana 1970

Poko ya botlhale

¹ A botlhale ga bo kue? A tlhaloganyo ga e tlhatlose lentswe la yona?

² Bo eme mo mebotong e e okameng tsela le mo makgabaganong a ditselana.

³ Bo kua fa thoko ga dikgoro tsa motse; fa pele ga dikgorwana bo kuela godimo bo re:

⁴ “Heelang banna! Ke bitsa lona; lentswe la me le raya lona bana ba batho.

⁵ Lona ba lo sa tlhalefang ithuteng botlhale; lona masilo, ithuteng tlhaloganyo!

⁶ Utlwang, gonne ke tla bolela dikgang tota, ke tumolola molomo go bua tse di siameng.

⁷ Ee, magalapa a me a bua nnete, mme dipuo tsa boikepo ke maila mo go nna.

⁸ Mafoko otlhe a molomo wa me a siame; ga go na bolotsana le fa e le tshokamo mo go ona.

⁹ A utlwala sentle fela otlhe mo go yo o a tlhaloganyang; yo o bonyeng kitso a re: Ke a nnete.

¹⁰ Amogelang kgalemelo ya me, mme e seng selefera; le kitso bogolo go gouta e e tlhaotsweng.

¹¹ Gonne botlhale bo molemo bogolo go dibaga tsa korale; dilo tse dintle tsotlhe ga di lekane najo.

¹² Nna Botlhale ke tlwaelanye le Tlhaloganyo; kitso le kelelelo ke na natso.

¹³ Go boifa Morena ke go ila bosula. Ke tlhoile boikgogomoso le boikgodiso le tsamao e e bosula le molomo o o bolotsana.

¹⁴ Kgakololo le botswerere di mo go nna; ke na le kutlwisiso le thata.

¹⁵ Dikgosi di busa ka nna; beng ba thata ba baya melao e e siameng ka nna.

¹⁶ Dikgosana di laola ka nna, le batlotlegi le baatlhodi botlhe ba lefatshe.

¹⁷ Ke rata ba ba nthatang; ba ba mpatlang ka tlhoafalo ba tla mpona.

¹⁸ Khumo le tlotlo di mo go nna le leruo le le tlhomameng le tshiamo.

¹⁹ Leungo la me le gaisa gouta, ee, gouta e e itshekileng; se ke se ruisang motho se phala selefera e e tlhaotsweng.

²⁰ Ke sepela mo tseleng ya tshiamo, ke tsamaya ditselana tsa molao fa gare

²¹ gore ke jese banthati boswa jo bo tlhomameng, ke ba tlaletse matlo a mahumo.

²² Morena o ntirile mo tshimologong ya ditsela tsa gagwe, ka nna wa ntlha wa ditiro tsa gagwe bogologolo.

²³ Ke sa le ke tlholwa kgale mo tshimologong pele ga metlha ya lefatshe.

²⁴ E rile go se na mawatle, go se na metswedi e e tletseng metsi, ka tsalwa.

²⁵ Ya re dithaba di ise di theiwe, dithota di ise di nne teng, ka tsalwa.

²⁶ Ke fa Morena a ise a dire lefatshe le dinaga le fa e le tshimologo ya mebu ya lefatshe.

²⁷ Ya re a ala legodimo, ka bo ke le gona; ya re a tlhoma tikologo ya loapi mo godimo ga mawatle

²⁸ ya re a bofelela maru kwa godimo, ya re a tswedisa metswedi ya mawatle thata,

²⁹ ya re a beela lewatle molelwane wa lone gore metsi a se ka a tlola taolo ya gagwe ya re a baya metheo ya lefatshe,

³⁰ ka bo ke na nae ke le ngwana ka itumela ka letsatsi le letsatsi, ka nna ka tshameka fa pele ga gagwe ka metlha yotlhe.

³¹ Ka tshanoka mo tikologong ya lefatshe la gagwe, ka itumelela baba ba batho.

³² Ka moo he, nkutlweng, bomorwaaka; go tlhogonolo ba ba sepelang mo ditseleng tsa me.

³³ Utlwang thuto, lo tlhalefe; lo se ka lwa e tlhokomologa.

³⁴ Go sego motho yo o nkutlwang, a leta fa dikgorong tsa me ka malatsi otlhe, a disa mepakwana ya mejako ya me.

³⁵ Gonne yo o mponang o bona bophelo, a itumelelwa ke Morena.

³⁶ Mme yo o mphosang o a itshenyetsa ka esi; botlhe ba ba ntlhoileng ba rata loso.”