Liane 6 - Setswana 1970

Ditlhagiso tse dingwe

¹ Ngwanaka, fa o ipofile wa re, ke tla lefa molato wa mongwe-ka-nna; fa o ipofile ka go neelana diatla le moeng,

² fa o itlamile ka mafoko a molomo wa gago; fa o tshwerwe ka dipolelo tsa molomo wa gago,

³ dira jaana, ngwanaka gore o ikgolole, gonne o wetse mo diatleng tsa mongwe-ka-wena: Yaa o ikokobetse, o kokotlele mongwe-ka-wena thata!

⁴ Tima matlho a gago boroko, se dumelele dintshi tsa gago go otsela.

⁵ O falole jaaka phudufudu mo seatleng sa motsomi le jaaka nonyane mo seatleng sa mothaisi wa yona.

⁶ Motlapa, yaa kwa tshoswaneng, o bone mekgwa ya yona, o tlhalefe!

⁷ Le fa e se na kgosana le e seng mokwaledi gongwe molaodi,

⁸ e etleetsa dijo tsa yona selemo, e kgobokanya dijo tsa yona fa go kotulwa.

⁹ Wena setshwakga, o tla robala go fitlha leng? O tla tsoga leng mo borokong?

¹⁰ O a re: “Ke ya go robala go le gonnye, ke otsela go le gonnye, ke phutha diatla go le gonnye go ikhutsa.”

¹¹ Mme khumanego ya gago e tla tla jaaka senokwane le lehuma la gago jaaka motlhabani.

¹² Yo o tsamayang ka bolotsana jwa molomo ke motho yo o se nang mosola; ga se monna wa sepe.

¹³ O gwetlha ka matlho, a bontshe ka maoto, a supe ka menwana,

¹⁴ a loge maano a bolotsana mo pelong ya gagwe a a bosula ka metlha yotlhe, a lotlhanye batho.

¹⁵ Ene yoo tatlhego e tla mo wela ka tshoganyetso, o tla pšhwetlwa ka ponyo ya leitlho, go se na se se ka mo thusang.

¹⁶ Dilo di le thataro Morena o di tlhoile, tse supa ke maila mo go ene:

¹⁷ Ke matlho a boikgantsho le loleme lwa maaka le diatla tse di tshololang madi a a se nang molato

¹⁸ le pelo e e logang maano a bolotsana le maoto a a itlhaganelelang kwa bosuleng

¹⁹ le mosupi wa kako yo o bolelang maaka le yo o losang bana ba motho.

Tlhagiso ka ga boaka

²⁰ Ngwanaka, boloka taolo ya ga rraago; se latlhe thuto ya ga mmaago.

²¹ Di golegelele mo pelong ya gago ka metlha, o di apare mo molaleng wa gago.

²² A di go pate, fa o tsamaya; di go sireletse, fa o robala; di bue nao, fa o thanya.

²³ Gonne taolo ke lobone, thuto ke lesedi; dikgalemelo tsa thuto ke tsela ya bophelo

²⁴ gore di go thibose mo mosading yo o bosula le mo boretheng jwa loleme lwa mosadi wa yo mongwe.

²⁵ Se eletse bontle jwa gagwe ka pelo ya gago; le gona a a se ka a go gapa ka dintshi tsa matlho a gagwe.

²⁶ Gonne mosadi wa seaka o humanegisa motho, mme mosadi wa monna yo mongwe o tsoma bophelo jo bo rategang.

²⁷ A motho o ka lokela molelo mo kgwatlheng ya gagwe, diaparo tsa gagwe di sa šwe?

²⁸ Gongwe a motho o ka gata magala, mme a se ka a šwa dinao?

²⁹ Yo o tsenang kwa mosading wa mongwe-ka-ene o ntse jalo; mongwe le mongwe yo o mo amang ga a ka ke a falola mo petsong.

³⁰ Legodu ga le nyatsege, fa le utswa gore le kgorise keletso ya lone, fa le bolawa ke tlala.

³¹ Fa le tshwarwa, le ka lefa gasupa; le ka ntsha dithoto tsotlhe tsa ntlo ya lone.

³² Mme yo o senyang nyalo le mosadi o sele o a tsenwa; go dira ene fela yo o ratang go itshenyetsa bophelo.

³³ O tla kgwatha ka ditlhong; nyatsego ya gagwe ke e e sa phimolweng.

³⁴ Gonne fa bogale jwa monna e le jwa lefufa, ga a kitla a rekegela ka letsatsi la pusoloso;

³⁵ ga a nke a go itshwarela, le fa o ntsha tefa; ga a nke a diga pelo, le fa o ntsha dineo tse dintsi.