Liane 4 - Setswana 1970

Mosola wa botlhale

¹ Banaka, utlwang thuto ya ga rraeno, lo ele tlhoko gore lo lemoge tlhaloganyo!

² Gonne ke lo naya thuto e e molemo; se tlogeleng molao wa me!

³ E rile ke nna le rre ke le mosimane, ke le tlekeetso, ke le ngwana-o-esi wa ga mme,

⁴ rre a nthuta a nthaya a re: “Pelo ya gago a e tshole mafoko a me; boloka ditaolo tsa me, foo o tla phela.

⁵ Batla botlhale, batla tlhaloganyo; se di lebale, se fapoge mo mafokong a molomo wa me.

⁶ Se bo tlogele, bo tla go disa; bo rate, bo tla go boloka!

⁷ Botlhale bo phala dilo tsotlhe, ka moo he: Batla botlhale! ntsha tsotlhe tse o di ruileng, o reke tlhaloganyo.

⁸ Bo godise, bo tla go godisa; bo tla go tlotla, fa o bo tlamparela.

⁹ Bo tla rwesa tlhogo ya gago serwalo se sentle; bo go naya mokgabo wa serwalo sa bogosi.”

¹⁰ Ngwanaka, reetsa o amogele mafoko a me, foo dinyaga tsa bophelo di tla go ntsifalela.

¹¹ Ke go ruta tsela ya botlhale, ke go tsamaisa mo metlhaleng ya nnete.

¹² Fa o tsamaya, dikgato tsa gago ga di nke di khutshwafadiwa; fa o siana, ga o nke o kgotšwa.

¹³ Kgomarela thuto. O se ka wa e lesa. E boloke. Gonne yona ke bophelo jwa gago.

¹⁴ Se wele mo tseleng ya baikepi, o se sepele ka mokgwa wa ba ba bosula.

¹⁵ E tlhokomologe, se tsamae mo go yona; fapoga mo go yona, o iphetele.

¹⁶ Gonne ga ba robale ba ise ba senye; ba tlhoka boroko, fa ba ise ba dige motho.

¹⁷ Gonne ba ja bogobe jwa boikepo, ba nwa weine ya dikgatelelo.

¹⁸ Tselana ya basiami e tshwana le lesedi la mahube le le ntseng le oketsegela pele go ya motshegareng o mogolo.

¹⁹ Mme tsela ya baikepi e tshwana le lefifi; ga ba itse gore ba tla kgotšwa ke eng.

²⁰ Morwaaka, reetsa mafoko a me, sekegela dipolelo tsa me tsebe.

²¹ A di se tloge mo matlhong a gago; di boloke mo pelong ya gago.

²² Gonne di phedisa ba ba di bonang; di ba fodisa mmele otlhe.

²³ Disa pelo ya gago bogolo go tsotlhe tse di ka disiwang; gonne bophelo bo tswa mo go yona.

²⁴ Bolotsana jwa molomo bo tlose mo go wena; tsietso ya loleme e katologanye nao.

²⁵ A matlho a gago a lebelele kwa pele! A dintshi tsa matlho a gago di lebe tse di fa pele ga gago.

²⁶ Lolamisa motlhala wa dinao tsa gago. A ditsela tsotlhe tsa gago e nne tse di laotsweng.

²⁷ Se fapogele ntlheng ya le le jang, le fa e le ya la molema; tshabisa maoto a gago bosula.