Liane 31 - Setswana 1970

Kgosi e a gakololwa

¹ Mafoko a kgosi Lemuele, e leng diane tse mmaagwe o di mo rutileng a re:

² “Wena morwaaka wa ntlha, nka go raya ka reng? Morwaaka yo ke go belegeng, nka reng? Morwa maikano a me, nka reng?

³ Se neele basadi thata ya gago; basadi ba ba senyang dikgosi ò se ba neele lorato lwa gago.

⁴ Ga go a tshwanela dikgosi, Lemuele, ga go a tshwanela dikgosi go nwa weine; ga go a tshwanela barena go eletsa bojalwa,

⁵ e se re gongwe, fa ba a nwa, ba lebala molao, ba sokamisa tshiamelo ya babogisegi botlhe.

⁶ Nayang yo o batlileng go latlhega bojalwa, lo nee yo o pelo-e-botlhoko weine,

⁷ a nwe, a lebale khumanego ya gagwe, mme a se ka a tlhola a gopola tapisego ya gagwe.

⁸ “Buelela semumu, o emele tshiamo ya masiela otlhe.

⁹ Bula molomo wa gago, o atlhole ka tshiamo, o siamisetse mmogisegi le mohumanegi.”

Mosadi yo o maatlametlo

¹⁰ Mosadi yo o maatlametlo o bonwa ke mang? Kana ene ke lehumo le le gaisang ditalama tsa tlhwatlhwa e kgolo.

¹¹ Pelo ya monna wa gagwe e ntse e mo ikanya; mme monna ga a nke a tlhoka tswelelopele.

¹² Mosadi o ntse a mo direla tse di molemo, e seng tse di bosula, ka malatsi otlhe a bophelo jwa gagwe.

¹³ O a tle a tlhoafalele boboa le letseta; a dire ka diatla tsa gagwe ka bopelotshweu.

¹⁴ O tshwana le mekoro ya morekisi: O ya go tsaya dijo tsa gagwe kwa kgakala.

¹⁵ O a tle a tsoge e sa le bosigo, a fe ba lapa la gagwe dijo, a laela malata a gagwe tiro ya letsatsi.

¹⁶ Fa a batla tshimo, a e reke; a tlhome ditlhare tsa moweine ka papadi ya diatla tsa gagwe.

¹⁷ Thata ya gagwe o a tle a e dire moitlamo wa letheka la gagwe, a tie mabogo.

¹⁸ O lemoga fa go bapala ga gagwe go tswelela pele; lobone lwa gagwe ga lo time bosigo.

¹⁹ Diatla tsa gagwe di a tle di tshware seotlhi, di fete di sutisetse tlhale kwa pele.

²⁰ O a tle a huporololele mmogisegi seatla, a ntshetse mohumanegi mabogo.

²¹ Ga a boifele ba lapa la gagwe serame, gonne botlhe ba ba mo lapeng la gagwe ba apesitswe tse di tlhatlagantsweng.

²² O a tle a itirele diphate, diaparo tsa gagwe ke tsa masela a mantle le a mahibidu.

²³ Monna wa gagwe o tlotlega mo makgotleng, fa a nna le banna bagolo ba morafe.

²⁴ O a tle a roke dihempe, a di rekise, a ise meitlamo kwa bareking.

²⁵ Thata le tlotlego ke diaparo tsa gagwe; o a tle a itumelele letsatsi le le tlang.

²⁶ O a tle a tswe molomo ka botlhale; thuto e e natefang e mo lolemeng lwa gagwe.

²⁷ O tlhokomela tse di dirwang mo lapeng la gagwe; ga a je dijo tsa botshwakga.

²⁸ Bomorwawe ba nanoge ba re: “Ò tlhogonolo!” Le monna wa gagwe a mmoke, a re:

²⁹ “Basadi ba bantsi ba dirile ka maatlametlo, mme wena o ba phala botlhe!”

³⁰ Boeletsego bo a tsietsa, bontle ke phefo fela, mme mosadi yo o boifang Morena o tla bakwa.

³¹ A a je leungo la diatla tsa gagwe. A a bakwe mo makgotleng ka ditiro tsa gagwe.