Liane 29 - Setswana 1970

¹ Monna yo o gagamatsang molala, le fa a kgalemetswe gantsi, o tla pšhwetlakanngwa ka tshoganyetso, mme go se na thuso.

² Fa basiami ba ntsifala, morafe o a itumela; fa baikepi ba busa, morafe o a fegelwa.

³ Monna yo o ratang botlhale o itumedisa rraagwe; mme yo o kopanang le diaka o fetsa dithoto tsa gagwe.

⁴ Kgosi e phedisa lefatshe sentle ka tshiamo, mme yo o kgethisang batho go feta tekanyo o a le tubaka.

⁵ Monna yo o buang mafoko a a borethe le mongwe-ka-ene o ngamolela dinao tsa gagwe serai.

⁶ Go na le mutlwane mo tseleng ya monna yo o bosula, mme mosiami o ka siana a thabile.

⁷ Mosiami o itse tse di tshwanetseng ba babotlana, mme moikepi ga a di lemoge, ga a di itse.

⁸ Basotli ba tsosa moferefere mo motseng, mme ba ba botlhale ba tima bogale.

⁹ Fa motlhalefi a seka le lesilo, le tla tlhodia le tshega, mme go se na boikhutso.

¹⁰ Banna ba ba tshololang madi ba tlhoa mmoifi-Modimo; ba batla go bolaya ba e leng ba nnete.

¹¹ Lesilo le ntsha bogale jotlhe jwa lone, mme letlhale le bo kokobetse morago.

¹² Mmusi yo o utlwelelang mafoko a maaka, badiredi ba gagwe ke baikepi fela.

¹³ Mohumanegi le mogateledi ba a kgatlhana; Morena o sedimosa matlho a bobedi jwa bone.

¹⁴ Kgosi e e direlang ba babotlana tse di ba tshwanetseng ka boikanyo, sedulo sa yona sa bogosi se tla tlhomama ka bosakhutleng.

¹⁵ Thupa le kgalemelo di a tlhalefisa; mme mosimane yo o itaolang o tlhabisa mmaagwe ditlhong.

¹⁶ Fa baikepi ba ntsifala, go ntsifala maleo, mme basiami ba tla bona tatlhego ya bone, ba itumela.

¹⁷ Otla ngwana wa gago, mme o tla go ikhutsisa, a go thabisa pelo.

¹⁸ Fa go se na pono ya moporofeti, batho ba itaola fela, mme go sego yo o tshegetsang molao.

¹⁹ Motlhanka ga a siamisiwe ka mafoko; le fa a a tlhaloganya, ga a a kgathalale.

²⁰ Fa o bona monna yo o bonako mo puong ya gagwe, lesilo le solofelwa go ka tlhabologa bogolo go ene.

²¹ Yo o lêmang motlhanka wa gagwe go tloga bonyaneng, la bofelo o tla mmona a nna matepe.

²² Monna yo o bogale o losa batho; yo o pelo-khutshwane o leofa gantsi.

²³ Boikgodiso jwa motho bo tla mo isa tlase, mme yo o ikokobetsang o tla bona tlotlo.

²⁴ Yo o jang le legodu o a itlhoa; o utlwa go rogakwa yo o sa begeng legodu, mme ga a le bege.

²⁵ Go boifa batho go tlisa serai, mme yo o ikanyang Morena o tla femelwa.

²⁶ Ba bantsi ba batla sefatlhego sa mmusi, mme tshiamelo ya motho e tswa mo Moreneng.

²⁷ Yo o dirang ka tshiamololo o ilwa ke basiami; wa tsamao ya nnete o ilwa ke moikepi.