Liane 24 - Setswana 1970

¹ Se fufegele dilo tsa ba ba bosula; se eletse go tshwana nabo.

² Gonne dipelo tsa bone di akanya kgatelelo; melomo ya bone e bua tse di isang mo tatlhegong.

³ Ntlo e agiwa ka botlhale; e thewa sentle ka maatlametlo,

⁴ mme ka kitso matlwana a yona a tlala dithoto tsa mefutafuta tse di tlhwatlhwa e kgolo le tse dintle.

⁵ Letlhale le thata bogolo go seganka; yo o nang le kitso o thata bogolo go yo o dikgoka.

⁶ Gonne ò tla itse go lwa ntwa ka dikgakololo tse di botlhale; phenyo e bonwa ka bontsi jwa bagakolodi.

⁷ Tsa botlhale di palela seeleele; mo lekgotleng se tlhoka puo.

⁸ Yo o logang maano a go dira bosula o tla bidiwa Rra-bolotsana.

⁹ Boleo ke maikaelelo a bosilo; mosotli o ilega mo bathong.

¹⁰ Fa o nyema moko ka letsatsi la tlalelo, thata ya gago e tla bo e se ya sepe.

¹¹ Pholosa ba ba gogelwang losong! Thibela ba ba theekelelang go ya go bolawa.

¹² Fa o ka re: “Ke ne ke sa itse,” ona o o bonang dipelo a ga o kitla o lemoga? Ona o o disang bophelo jwa gago o a itse. O direla motho ka fa tirong ya gagwe.

¹³ Morwaaka, jaa lomepe lwa dinotshe, gonne lo monate; mafura a dinotshe a botshe mo magalapeng a gago.

¹⁴ Itse gore botlhale bo ntse jalo mo moweng wa gago. Fa o bo bona, tswelelopele e tla nna teng, mme tsholofelo ya gago ga e kitla e nyelela.

¹⁵ Wena moikepi, se lalele lelapa la mosiami; se senye legae la gagwe.

¹⁶ Le fa mosiami a ka wa gasupa, o tla nna a tsoga gape; mme baikepi bone ba wela mo tatlhegong.

¹⁷ Fa mmaba wa gago a wa, se itumele; fa a digwa, a pelo ya gago e se duduetse,

¹⁸ e se re gongwe Morena a bona, mme ga nna bosula mo matlhong a gagwe, a busa bogale jwa gagwe mo go ene.

¹⁹ Se tukele basenyi bogale; se fufegele baikepi

²⁰ gonne yo o bosula ga a tswelele pele; lesedi la baikepi le tla tima.

²¹ Morwaaka, boifa Morena le kgosi; se tlwaelane le dirukhutlhi.

²² Gonne tatlhego ya tsona e tla dirafala ka tshoganyetso, sebaka sa tshenyego ya tsona se itsiwe ke mang?

Diane tse dingwe

²³ Diane tse di latelang fa le tsona ke tsa batlhalefi: Go gobelelela motho mo tshekong ga go a siama.

²⁴ Yo o rayang moikepi a re: “O siame!” ene, batho ba tla mo rogaka, merafe e tla mo hutsa.

²⁵ Go ratega ba ba mo atlholang ka tshiamo; lesego le letlhogonolo di tla ba dirafalela.

²⁶ Yo o ntshang dikarabo tse di siameng o atla molomo.

²⁷ Fetsa tiro ya gago e e kwa ntle, o leme tshimo ya gago; morago ga moo o ka aga ntlo ya gago.

²⁸ Se pateletse mongwe-ka-wena ka bomo! A ò tshwanetse go timetsa batho ka molomo wa gago?

²⁹ Se re: “Ke tla mo direla se a se ntiretseng; ke busolosetsa monna ka fa tirong ya gagwe.”

³⁰ Nkile ka feta kwa tshimong ya motlapa kwa tshimong ya moweine ya motho yo o se nang tlhaloganyo.

³¹ Ka fitlhela e tlhogile mefero gotlhe, e khurumeditswe ke mokolonyane, lorako lwa matlapa lwa yona lo digilwe.

³² Ka leba, ka ela tlhoko, ka bona, ka fitlhela e le thuto e e reng:

³³ Fa o robala go le gonnye, o otsela go le gonnye, o phutha diatla go le gonnye go ikhutsa,

³⁴ khumanego ya gago e tla tla jaaka senokwane le lehuma la gago jaaka motlhabani.