Liane 23 - Setswana 1970

¹ E re fa o nna fatshe go ja le mmusi, o gopole sentle yo o fa pele ga gago;

² o itshware setho, le fa o le tlalakgolo.

³ Se eletse matlotlwa a a monate a gagwe; gonne ke dijo tse di tsietsang.

⁴ Se tshwenyegele go huma; tlogela maano a teng.

⁵ A o tla tlhoma matlho mo lehumong? Le tla tloga le nyelela! Gonne le itirela diphuka le fofela kwa legodimong jaaka lenong.

⁶ Se je dijo tsa yo o lefufa; se eletse dijo tse di monate tsa gagwe.

⁷ Gonne o ntse jaaka a akanya mo pelong. Ka molomo o go raya a re: “Jaa, o nwe!” mme pelo ya gagwe yona ga e ree jalo.

⁸ Thathana e ò e jeleng ò tla e tlhatsa; mafoko a tebogo a gago ò tla bo ò a buetse lefela.

⁹ Se bue mo tsebeng ya seleele, gonne se tla nyatsa botlhale jwa mafoko a gago.

¹⁰ Se sutise molelwane wa bogologolo; se tseele masiela masimo a ona.

¹¹ Gonne moemedi wa ona o thata; ene o tla a emela kgatlhanong le wena.

¹² Neela pelo ya gago mo thutong le ditsebe tsa gago mo mafokong a kitso.

¹³ Se tlhokise mosimane kotlo; fa o mo itaya ka thupa ga a kitla a a swa.

¹⁴ Ka go mo itaya ka thupa o tla faposa bophelo jwa gagwe mo felong ga baswi.

¹⁵ Morwaaka, fa pelo ya gago e tlhalefa, pelo ya me le yona e tla itumela.

¹⁶ Maikutlo a me a tla ipela, fa molomo wa gago o bua tse di siameng.

¹⁷ A pelo ya gago e se fufegele baleofi, mme a e tlhoafalele poifo-Morena ka metlha.

¹⁸ Gonne fa ò e boloka, tswelelopele e tla nna teng; mme tsholofelo ya gago ga e kitla e nyelela.

¹⁹ Wena morwaaka, reetsa ò tlhalefe! Tsamaisa pelo ya gago mo tseleng e e tlhamaletseng.

²⁰ Se nne le banwi ba bojalwa ba ba megagaru mo go jeng nama.

²¹ Gonne monwi le moji ba tla humanega. Go se kgathale sepe go apesa motho dikata.

²² Utlwa rraago yo o go tsetseng; se nyatse mmaago, fa a sena go tsofala.

²³ Reka boammaaruri, mme o se bo rekise; reka le botlhale le thuto le tlhaloganyo.

²⁴ Rraagwe mosiami o ipela thata; motsadi wa letlhale o a le itumelela.

²⁵ A go itumele rraago le mmaago; yo o go belegeng a a duduetse.

²⁶ Morwaaka, nneele pelo ya gago! A matlho a gago a kgatlhwe ke ditsela tsa me!

²⁷ Gonne seaka ke gopo e e boteng; mosadi wa seotswa ke sediba se se pitlaganyeng.

²⁸ Le gona o lalela batho jaaka senokwane; o atisa bolotsana mo bathong.

²⁹ Tatlhego ke ya ga mang? Tlalelo ke ya ga mang? Dintwa ke tsa ga mang? Selelo ke sa ga mang? Dintho tsa bomo ke tsa ga mang? Matlho a a leoto ke a ga mang?

³⁰ Ke tsa ba ba lalang kwa bojalweng; ke tsa ba ba tlang go utlwa dino tse di tagang.

³¹ Se kgatlhwe ke bohibidu jwa weine, fa e phatsima mo senwelong! E nowa e le monate thata,

³² mme morago e loma jaaka noga; e go jwela ka botlhole jaaka kake.

³³ Matlho a gago a tla bona dilo tse di seng gona; pelo ya gago e tla go buisa tse di sokameng.

³⁴ O tla nna jaaka e kete o robetse mo gare ga lewatle le jaaka yo o robetseng mo godimo ga pinagare ya mokoro.

³⁵ O re: “Ba ntiteile, ga ke a utlwa botlhoko; ba nkotlile, ga ke a lemoga. Ke tla tsoga leng ke tle ke e batle go nwa gape.”