Liane 22 - Setswana 1970

¹ Leina le le molemo le phala khumo e kgolo; go ratwa go gaisa selefera le gouta.

² Mohumi le mohumanegi ba a phedisanya; Morena o ba dirile botlhe.

³ E a re letlhale le bona dikotsi, le iphitlhe; mme ba ba sa tlhalefang ba fetele pele, ba wele tatlhegong.

⁴ Tuelo ya boikokobetso le ya go boifa Morena ke khumo le tlotlo le bophelo.

⁵ Mitlwa le diru di mo tseleng ya yo o sokameng; yo o bolokang bophelo jwa gagwe o a di katoga.

⁶ Tlwaetsa mosimane tsamao e e mo tshwanetseng; foo ga a kitla a fapoga mo go yona, le fa a tsofetse.

⁷ Mohumi o laola bahumanegi; moadingwi ke motlhanka wa moadimi.

⁸ Yo o jwalang tshiamololo o tla roba tatlhego; thupa ya kgalefo ya gagwe e tla itaya ene.

⁹ Yo o matlho-a-lorato o tla tshegofadiwa; gonne o nathetse ba ba tlhokang bogobe jwa gagwe.

¹⁰ Leleka mosotli; foo dikgang di tla fela; go seka le go nyatsa go tla khutla.

¹¹ Morena o rata yo o pelo e phepa; kgosi ke tsala ya yo o e kgatlhang ka puo.

¹² Matlho a Morena a boloka tse o di bonyeng, mme o tla diga mafoko a molotsana.

¹³ Motlapa o a re: “Tau e ka fa ntle; nka bolawa mo dipatlelong.”

¹⁴ Melomo ya basadi ba sele ke gopo e e boteng; yo Morena o mo galefetseng o tla wela mo go yona.

¹⁵ Fa bosilo bo palelela mo pelong ya mosimane, thupa ya kotlo e tla bo ntsha mo go ene.

¹⁶ Go gatelela yo mmotlana ke go mo humisa; go naya mohumi ke go mo tlhokisa fela.

Diane di masome a mararo

¹⁷ Tlhwaya tsebe, o utlwe mafoko a matlhale, o ele kitso ya me tlhoko.

¹⁸ Ee, go gontle, fa o a boloka mo maikutlong a gago; foo aotlhe a tla bo a bopetswe molomo wa gago.

¹⁹ Ke ruta wena kajeno gore o tle o ikanye Morena ka wesi.

²⁰ Kana ke go kwaletse diane tse di nang le dikgakololo le kitso,

²¹ go go ruta nnete le mafoko a a ikanyegang gore o tle o arabe yo o go botsang ka mafoko a boammaaruri.

²² Se thukhuthe yo mmotlana, ka a le mmotlana; le gona se gatelele mmogisegi mo lekgotleng.

²³ Gonne Morena o tla ba emela mo tshekong, mme bathukhuthi ba bone o tla ba thukhutha bophelo.

²⁴ Se tsalane le yo o mabifi; se kopane le monna yo o pelo-khutshwane,

²⁵ e se re gongwe wa tlwaela mekgwa ya gagwe, wa thaela bophelo jwa gago seru.

²⁶ Se nne le ba ba ikanang ka letsogo, ba ba ipofang go emela melato ya ba bangwe.

²⁷ Kana fa o palelwa ke go lefa, bolao jwa gago bo tla tsewa ka fa tlase ga gago.

²⁸ Se sutise molelwane wa bogologolo o borraago ba o segileng.

²⁹ Fa o bona monna e le setswerere mo tirong ya gagwe, ene o ka direla dikgosi; ga se yo o ka direlang ba e leng batho fela.