Liane 20 - Setswana 1970

¹ Weine ke mosotli, bojalwa ke motsosa-loratla; botlhe ba ba theekelang ka tsona ga ba botlhale.

² Mafoko a kgosi a a tshosang a tshwana le go bôpa ga tawana; yo o e gakatsang o itshenyetsa bophelo.

³ Go nna kgakala le phapaang ke tlotlo ya monna, mme seeleele sengwe le sengwe se simolola ntwa.

⁴ Motlapa ga o leme mariga; mme e tle e re mo kotulong a batle dijo, o se ke o bone sepe.

⁵ Maikaelelo a pelo ya monna ke metsi a bodiba; a giwa ke monna yo o tlhalefileng.

⁶ Batho ba bantsi ga twe ba lorato, mme ke mang yo o bonang monna yo o ikanyegang?

⁷ Mosiami yo o sepelang mo poifong-Modimo bana ba gagwe ba tla nna tlhogonolo sehularong sa gagwe.

⁸ Kgosi e e ntseng mo sedulong sa katlholo e a fefera, e tlosa bosula jotlhe ka matlho a yona.

⁹ Ke mang yo o ka reng: “Ke tlhapile pelo, ke itshekile, ga ke na boleo”?

¹⁰ Bobedi jwa dilekanyetso le jwa dielo tse di tsietsang ke maila fa pele ga Morena ka bobedi jwa tsona.

¹¹ Le ene mosimane o a tle a ipontshe ka ditiro tsa gagwe, fa maitsholo a gagwe e le a a phepa le a nnete gongwe nnyaya.

¹² Tsebe e e utlwang le leitlho le le bonang, Morena o di dirile ka bobedi jwa tsona.

¹³ Se rate boroko, e se re gongwe wa humanega; buduloga matlho, foo o tla kgora dijo.

¹⁴ Moreki o a tle a re: “Ga di a siama! Ga di a siama!” Mme e re a sena go tsamaya, a ipoke.

¹⁵ Le fa go na le gouta le bontsi jwa ditalama tsa dikorala, tseo tsotlhe di phalwa ke molomo o o botlhale.

¹⁶ Mo amoge kobo ya gagwe, gonne o ipofile go lefela yo mongwe; mo tsee a nne peeletso mo boemong jwa baeng.

¹⁷ Dijo tsa tsietso di monate mo mothong, mme morago ga moo molomo wa gagwe o tlala makgwarana.

¹⁸ Maano a tla tlhomama ka kgakololano; dira ntwa ka tsamaiso ya botlhale.

¹⁹ Mosenya-leina o bolela tse o di sebetsweng; ka moo se tlwaelane le mmuabui.

²⁰ Yo o rogang rraagwe gongwe mmaagwe, lobone lwa gagwe lo tla tima mo nakong ya lefifi.

²¹ Boswa jo bo batlwang ka potlako mo tshimologong bo tla tlhoka tshegofatso mo bokhutlong.

²² Se re: “Ke tla ipusolosetsa bosula!” Letela Morena, o tla go thusa.

²³ Makete a mabedi ke maila Moreneng; selekanyetso sa tsietso ga se a siama.

²⁴ Morena ke ene o tsamaisang dikgato tsa monna; motho o ka tlhaloganya jang tsela ya gagwe?

²⁵ Ke seru mo mothong, fa a itlhaganela a re: “Ke tla se naya Morena,” mme e re a sena go ikana jalo e be e le gona a ikakanyang.

²⁶ Kgosi e e botlhale e fefera baikepi, e tsamaisa leotwana le le phothang mo go bone.

²⁷ Mowa wa motho ke lobone lwa Morena lo lo tlhotlhomisang dikarolo tsotlhe tsa mmele.

²⁸ Lorato le boammaaruri di boloka kgosi; e tshegetsa sedulo sa yona sa bogosi ka lorato.

²⁹ Bontle jwa makau ke thata ya ona; mokgabo wa banna bagolo ke tlhogo tse dipududu.

³⁰ Dintho tse di tswang madi di tlhabolosa modira-bosula; dikotlo di tlhabolosa maikutlo a mmele.