Liane 2 - Setswana 1970

Go tshegofaditswe ba ba batlang botlhale

¹ Morwaaka, fa o ka amogela mafoko a me, wa boloka ditaolo tsa me mo go wena,

² fa o sekegela botlhale tsebe, o lebisa pelo ya gago kwa tlhaloganyong;

³ ee, fa o bitsa temogo, o tlhatlosetsa tlhaloganyo lentswe la gago,

⁴ fa o bo batla jaaka selefera, o bo fukutsa jaaka khumo e e fitlhegileng,

⁵ foo o tla tlhaloganya go boifa Morena, o tla bona kitso ya go itse Modimo.

⁶ Gonne Morena o aba botlhale; kitso le tlhaloganyo di tswa mo molomong wa gagwe.

⁷ O bolokela basiami thuso; ke ene thebe ya ba ba sepelang ka boitekanelo

⁸ le yo o bolokang ditselana tsa tshiamo le yo o tsamayang mo tseleng ya ba ba mmoifang.

⁹ Foo o tla tlhaloganya tshiamo le molao le tsa nnete le tselana nngwe le nngwe e e molemo.

¹⁰ Gonne botlhale bo tla tsena mo pelong ya gago; kitso e tla nna monate mo go wena.

¹¹ Kakanyo e tla go disa, tlhaloganyo e tla go boloka;

¹² e le go go falodisa mo tseleng ya ba ba bosula le mo bathong ba ba buang tse di sokameng,

¹³ ba ba tlogelang ditselana tse di tlhamaletseng gore ba tsamae mo ditseleng tsa lefifi;

¹⁴ ba ba itumelang go dira bosula ba dudueletsa bokgopo jwa yo o sa siamang,

¹⁵ ba ditselana tsa bone di kgopameng, ba metlhala ya bone e leng ya boikepo.

¹⁶ E tla go falodisa mo mosading o sele yo e seng wa gago wa mafoko a a borethe;

¹⁷ yo o tlhalang molekane wa bošwa jwa gagwe, a lebale kgolagano e o e ikanetseng fa pele ga Modimo wa gagwe.

¹⁸ Gonne lapa la gagwe le fologela kwa losong; ditselana tsa gagwe di ya kwa baswing.

¹⁹ Botlhe ba ba yang kwa go ene ga ba boe; ga ba fitlhe mo ditselaneng tsa bophelo.

²⁰ Tseo ke gore o sepele mo tseleng ya ba ba molemo, o tlhamalele fela mo ditselaneng tsa basiami.

²¹ Gonne ba nnete ba tla nna mo lefatsheng; baitekanedi ba tla sadisiwa mo go lone.

²² Mme baikepi ba tla nyelediwa mo lefatsheng; balotsana ba tla kumolwa mo go lone.