Liane 18 - Setswana 1970

¹ Yo o ikgaoganyang le ba bangwe o batla boithatelo fela; o lwantsha tsotlhe tse di tsweletsang pele.

² Lesilo ga le kgatlhwe ke tlhaloganyo, mme le rata go senola pelo ya lone.

³ Fa go tla moikepi, le nyatso e tla nae le nyatsego e e bapileng le kgobo.

⁴ Mafoko a monna wa nnete ke metsi a bodiba, ke noka e e elang, ke motswedi wa botlhale.

⁵ Go goga le moikepi ga go a siama, le e seng go siamololela mosiami mo tshekong.

⁶ Molomo wa lesilo o tsosa ntwa; molomo wa lone o ipiletsa dithupa.

⁷ Molomo wa lesilo o le isa tatlhegong molomo wa lone ke seru se se thaisang bophelo jwa lone.

⁸ Mafoko a mosenya-leina a tshwana le dijo tse di mafura tse di fologelang kwa teng ga mala ka borethe.

⁹ Le ene yo o botlapa mo tirong ya gagwe ke monnaa mosenyi.

¹⁰ Leina la Morena ke phemelo e e tiileng; mosiami o tshabela teng a sirelediwa.

¹¹ Khumo ya mohumi ke motse o o femetsweng mo go ene, ke lobota lo lo godimo mo megopolong ya gagwe.

¹² Boikgodiso jwa pelo ya motho bo etelela tatlhego ya gagwe pele, mme boikokobetso bo latelwa ke tlotlego.

¹³ Fa motho a araba a ise a utlwe potso, ke bosilo le ditlhong mo go ene.

¹⁴ Monna yo o pelokgale o itshokela bolwetse jwa gagwe; mme mowa o o imetsweng, ke mang yo o ka o tsosang?

¹⁵ Pelo ya motlhalefi e ntse e ithutela pele; ditsebe tsa matlhale di batla kitso.

¹⁶ Neo e motho o e ntshang e mmulela tsela, e mo fitlhisa fa pele ga ba bagolo.

¹⁷ Mmegi wa molato e kete o siame mo tshekong ya gagwe, mme go tla tla mongwe-ka-ene a mmotsolotsa.

¹⁸ Tengwa e khutlisa diphapaang, e kgaoganya ba ba thata.

¹⁹ Morwa motho yo o leofetsweng o thata bogolo go motse o o femetsweng; letlhoo le tshwana le phemelo ya ntlo ya borena.

²⁰ Mpa ya motho e tla kgora leungo la molomo wa gagwe; o tla kgora kotulo ya tse a di jwetseng ka molomo wa gagwe.

²¹ Loso le bophelo di mo thateng ya loleme; ba ba ratang go bua ka lone ba tla ja leungo la lone.

²² Yo o bonyeng mosadi o bonye se se molemo; o filwe tlhogonolo ke Morena.

²³ Mohumanegi o bua ka mokokotlelo, mme mohumi o araba ka bopeloethata.

²⁴ Balekane ba motho ba ka mo isa mo tatlhegong; mme go ka nna le tsala e e kgomarelang motho bogolo go morwa-rraagwe.