Liane 16 - Setswana 1970

¹ Sa motho ke go ikakanya, mme loleme lo tla fiwa karabo ke Morena.

² Motho a re, ditsela tsotlhe tsa gagwe di itshekile, mme yo o tlhatlhobang mewa ke Morena.

³ Neela Morena ditiro tsa gago, foo maikaelelo a gago a tla dirafala.

⁴ Morena o bopetse dilo tsotlhe maikaelelo a gagwe; ee, le moikepi o mmopetse letsatsi la tatlhego.

⁵ Mongwe le mongwe yo o pelo e ikgodisang ke maila mo Moreneng; ruri, ga a kitla a tlhoka petso.

⁶ Molato o bipiwa ka bopelotlhomogi le ka boammaaruri; motho o tila bosula ka go boifa Morena.

⁷ Fa ditsela tsa monna di kgatlha Morena, le baba ba gagwe o tla ba agisanya nae.

⁸ Leruonyana la tshiamo le phala le legolo la tshiamololo.

⁹ Pelo ya motho e akanya tsela ya gagwe, mme Morena ke ene a tsamaisang dikgato tsa gagwe.

¹⁰ Katlholo e mo molomong wa kgosi; a molomo wa yona o se ka wa atlhola ka boikanyologo!

¹¹ Seelo le selekanyetso tse di siameng ke tsa Morena; majwe otlhe a kgetsana a a supang bokete ke tiro ya gagwe.

¹² Go dira tsa boikepo ke maila dikgosing; gonne sedulo sa kgosi se tlhomamisiwa ka tshiamo.

¹³ Melomo e e siameng e kgatlha dikgosi; di rata yo o bolelang tsa nnete.

¹⁴ Kgalefo ya kgosi e tshwana le barongwi ba loso; monna yo o botlhale o tla e tima.

¹⁵ Sefatlhego sa kgosi se se supang lorato se a phedisa; bopelontle jwa yona bo tshwana le leru la pula ya tlhakola-modula.

¹⁶ Go huma botlhale go phala gouta jang ne! Go huma tlhaloganyo go gaisa selefera.

¹⁷ Tsela e e katilweng ya batho ba nnete ke go tila bosula; yo o disang tsamao ya gagwe o boloka bophelo jwa gagwe.

¹⁸ Boikgodiso bo latelwa ke tatlhego; mowa o o ikgantshang o etelela go wa pele.

¹⁹ Go ikokobetsa le ba ba ikokobetsang go gaisa go abelana thopo le ba ba ikgodisang.

²⁰ Yo o elang Lefoko la Modimo tlhoko o tla bona tlhogonolo. Go sego yo o ikanyang Morena.

²¹ Yo o pelo e botlhale o tla bidiwa motlhalefi; mafoko a a bonolo a tsweledisa thuto pele.

²² Tlhaloganyo ke motswedi wa bophelo mo go mong wa yona; mme masilo a otlwa ka bosilo jwa ona.

²³ Pelo ya letlhale e ruta loleme lwa lone; le gona e godisa thuto mo molomong wa lone.

²⁴ Mafoko a a monate ke mafura a dinotshe, a natefela pelo, a alafa le marapo.

²⁵ Go na le tsela e e siameng mo matlhong a motho, mme bokhutlo jwa yona ke tsela ya loso.

²⁶ Tlala ya modiri e a mo dirisa, gonne molomo wa gagwe o a mo kgweetsa.

²⁷ Sekebeke se epela ba bangwe gopo ya tatlhego; e kete molelo o o fisang o mo molomong wa sona.

²⁸ Molotsana o lotlhanya batho; mosenya-leina o kgaoganya ditsala.

²⁹ Mosiamolodi o raela mongwe-ka-ene, o mo gogela mo tseleng e e seng molemo.

³⁰ Yo o budulatsang matlho go loga maano a bolotsana, a ba a moma molomo o setse a dirile bosula.

³¹ Moriri o mmududu ke serwalo se sentlentle; se bonwa ka tsamao e e siameng.

³² Yo o pelotelele o phala seganka; yo o itseng go itshwara o gaisa mothopi wa motse.

³³ Tengwa e kgotlokgodiwa mo pataneng ya seaparo, mme katlholo ya yona e tswa mo Moreneng.