Liane 15 - Setswana 1970

¹ Karabo e e bonolo e tima bogale, mme lefoko le le kgopisang le a galefisa.

² Diteme tsa matlhale di ntsha kitso sentle, mme melomo ya masilo e bilola boeleele fela.

³ Matlho a Morena a mo mafelong aotlhe, a tlhola ba ba bosula le ba ba molemo.

⁴ Bonolo jwa loleme ke setlhare sa bophelo; mme bolotsana jwa lone bo phatlola pelo.

⁵ Lesilo le nyatsa kotlo ya rraalo, mme yo o elang kgalemelo tlhoko o tla tlhalefa.

⁶ Letlotlo le legolo le mo ntlong ya mosiami, mme di-tsa-moikepi di a senyega.

⁷ Melomo ya matlhale e utlwatsa kitso, mme dipelo tsa masilo ga di na nnete.

⁸ Ditlhabelo tsa baikepi ke maila Moreneng, mme thapelo ya batlhamaladi e a mo kgatlha.

⁹ Tsamao ya moikepi ke maila Moreneng, mme o rata yo o latelelang tshiamo.

¹⁰ Kotlo e e botlhoko e wela yo o tlogelang tsela; mme yo o ilang kgalemelo o tla swa.

¹¹ Morena o bona felo ga baswi le ga tatlhego, mme o bona dipelo tsa batho bogolo go gona.

¹² Mosotli ga a rate yo o mo kgalemelang, le gona ga a etele matlhale.

¹³ Pelo e e thabileng e ntlafatsa sefatlhego, mme mowa o imelwa ke botlhoko jwa pelo.

¹⁴ Pelo ya motlhalefi e batla kitso, mme melomo ya masilo e rata boeleele.

¹⁵ Malatsi aotlhe a mmogisegi a botlhoko, mme yo o pelo e thabileng o na le moletlo ka gale.

¹⁶ Bobotlana jo bo nang le poifo-Modimo bo phala khumo e kgolo e e nang le letswalo.

¹⁷ Go ja morogo re ratana go monate go phala kgomo e e nontshitsweng re tlhoanye.

¹⁸ Monna yo o bogale o tsosa ntwa, mme yo o pelotelele o fedisa kgang.

¹⁹ Tsela ya motlapa e tshwana le legora lwa mitlwa, mme tselana ya ba ba matlhagatlhaga e katilwe sentle.

²⁰ Ngwana yo o tlhalefileng o itumedisa rraagwe, mme motho wa lesilo o nyatsa mmaagwe.

²¹ Boeleele ke boitumelo jwa yo o se nang tlhaloganyo, mme monna wa kelelelo o tlhamalalela pele fela.

²² Maikaelelo a a pala, fa go se na kgakololano; fa bagakolodi ba le bantsi, a tla dirafala.

²³ Monna o itumelela karabo ya molomo wa gagwe; lefoko le le buiwang ka nako e e le lebanyeng le molemo jang!

²⁴ Tsela ya bophelo e tlhatlosetsa motlhalefi kwa godimo gore a fapoge felo ga baswi ka kwa tlase.

²⁵ Morena o tla rutla ntlo ya baikgantshi, mme o tla tlhomamisa molelwane wa motlholagadi.

²⁶ Maano a yo o bosula ke maila mo Moreneng, mme mafoko a lorato a phepa mo go ene.

²⁷ Motho wa kgwebo ya tshiamololo o hudua ntlo ya gagwe, mme yo o ilang dineo tse di faposang o tla phela.

²⁸ Pelo ya mosiami e akanya dikarabo, mme melomo ya baikepi e bilola tse di bosula.

²⁹ Morena o kgakala le baikepi, mme thapelo ya basiami o a e utlwa.

³⁰ Matlho a thabo a itumedisa pelo; kitsiso e e molemo e tiisa moko.

³¹ Tsebe e e reetsang dikgalemelo tse di phedisang e rata go nna le matlhale.

³² Yo o tlhokomologang dikotlo o nyatsa bophelo jwa gagwe, mme yo o utlwang kgalemelo o tla bona tlhaloganyo.

³³ Go boifa Morena ke yona thuto ya botlhale; boikokobetso bo etelela tlotlego pele.