Liane 12 - Setswana 1970

¹ Yo o ratang kotlo o rata kitso. Yo o ilang kgalemelo ke seeleele.

² Morena o kgatlhwa ke yo o molemo, mme o latlha mologa-maano-a-bosula.

³ Motho ga a kitla a tlhomama ka boikepo, mme medi ya basiami ga e nke e kumolwa.

⁴ Mosadi yo o maatlametlo ke serwalo sa monna wa gagwe; mme yo o tlhabisang ditlhong o tshwana le go tlhotlhona ga marapo a gagwe.

⁵ Megopolo ya basiami e batla tshiamo, mme maano a baikepi ke a tsietso.

⁶ Mafoko a baikepi ke a go lalela madi a basiami, mme melomo ya ba nnete e a ba pholosa.

⁷ Baikepi ba tla ribegediwa ba tlosiwa; mme matlo a basiami a ntse a eme.

⁸ Monna o bokwa go lekana le kitso ya gagwe, mme yo o pelo e kgopo o tla nyatsega.

⁹ Yo mmotlana, fa a itirela, o phala yo o ikgodisang, mme a tlhoka bogobe.

¹⁰ Mosiami o na le pelo le mo diruiweng tsa gagwe, mme maikutlo a baikepi a setlhogo.

¹¹ Yo o lemang tshimo ya gagwe o tla kgora bogobe; mme yo o latelang tse di se nang mosola ga a na tlhaloganyo.

¹² Moikepi o eletsa go tsoma dilo tse di bosula, mme medi ya basiami e tla ntsha maungo.

¹³ Boleo jwa molomo ke seru se se kotsi; mme mosiami o falola mo tlalelong.

¹⁴ Motho o tla kgora tse di molemo tsa leungo la molomo wa gagwe; tiro ya diatla tsa motho e tla boela kwa go ene.

¹⁵ Tsela ya lesilo e lolame mo matlhong a lone, mme go botlhale yo o amogelang kgakololo.

¹⁶ Lesilo le bontsha go ngala ga lone ka pele, mme yo o itshwereng pila o fitlha kgopisego.

¹⁷ Yo o bolelang tse e leng tsona o bua tse di tlhomameng; mme mosupi wa maaka o bua tsa tsietso.

¹⁸ Go na le ba ba buabuang mafoko a a tlhabang jaaka tšhaka, mme diteme tsa ba ba botlhale di a fodisa.

¹⁹ Molomo wa boammaaruri o tla tlhomama ka bosakhutleng, mme loleme lwa maaka ke lwa ponyo ya leitlho fela.

²⁰ Tsietso e mo pelong tsa ba ba akanyang bosula, mme ba ba rerang kagiso ba na le boitumelo.

²¹ Mosiami ga a welwe ke tatlhego epe, mme ba ditlalelo di ba welang ka bontsi ke baikepi.

²² Melomo e e akang e tena Morena, mme ba ba dirang ka boammaaruri ba a mo kgatlha.

²³ Motho yo o itshwereng sentle o loba kitso, mme pelo tsa masilo di kua tsa bosilo.

²⁴ Diatla tsa batlhoafadi di tla laola, mme botlapa bo isa botlhankeng.

²⁵ Tshwenyego mo pelong ya monna e a e imela; mme lefoko la lorato le a e thabisa.

²⁶ Mosiami o itse se se mo phedisang, mme tsela ya baikepi e a ba timetsa.

²⁷ Setshwakga ga se bone se se se tsomang, mme khumo e kgolo ke ya monna wa motlhoafadi.

²⁸ Bophelo bo mo tseleng ya tshiamo, mme tsela e e sokameng e isa losong.