Liane 10 - Setswana 1970

Diane tsa mefutafuta tsa ga Salomo

¹ Diane tsa ga Salomo. Ngwana yo o botlhale o itumedisa rraagwe, mme ngwana yo o bosilo o hutsafatsa mmaagwe.

² Dikhumo tsa tshiamololo ga di thuse sepe, mme tshiamo e golola mo losong.

³ Morena ga a bolaise mosiami tlala, mme keletso ya moikepi o e kgoromeletsa kwa morago.

⁴ Seatla sa motlapa se a humanegisa, mme diatla tsa ba ba tlhaga di a humisa.

⁵ Ngwana yo o maatlametlo o phutha dijo selemong. Yo o robalang go kotulwa ke yo o tlhabisang ditlhong.

⁶ Masego a mo tlhogong ya mosiami, mme melomo ya baikepi e fitlha kgatelelo.

⁷ Go gakologelwa mosiami go tshegofatsa matlho, mme leina la baikepi le a nyelela.

⁸ Yo o pelo e botlhale o amogela ditaolo, mme yo o molomo o bosilo o tla digwa.

⁹ Yo o sepelang ka boitekanelo o tsamaya a le mo tshireletsong; yo o sokamisang ditsela tsa gagwe o tla lemogiwa.

¹⁰ Yo o tswitlang ka leitlho o tsisa bohutsana; mme yo o kgalemelang molato a sa tshabe motho o dira kagiso.

¹¹ Molomo wa mosiami ke motswedi wa bophelo; mme melomo ya baikepi e fitlha kgatelelo.

¹² Letlhoo le tsosa phapaang, mme lorato lo bipa maleo otlhe.

¹³ Go fitlhelwa botlhale mo molomong wa motlhalefi, mme thupa e tshwanetse motlhana wa yo o se nang tlhaloganyo.

¹⁴ Ba ba botlhale ba ipolokela kitso, mme molomo wa seeleele o atametsa tlalelo.

¹⁵ Tse mohumi o nang natso ke motse o o thata wa gagwe; mme tatlhego ya ba ba botlana ke khumanego ya bone.

¹⁶ Tse mosiami o di itiretseng di a mo phedisa; tse moikepi o di bonang di a mo leofisa.

¹⁷ Yo o elang kotlo tlhoko o mo tseleng e e yang mo bophelong; mme yo o tlhokomologang kgalemelo o a timela.

¹⁸ Melomo ya maaka e fitlha letlhoo, moutlwatsa-tshele ke lesilo.

¹⁹ Bontsi jwa mafoko ga bo tlhoke boleo, mme yo o itshwarang molomo o botlhale.

²⁰ Loleme lwa mosiami ke selefera e e tlhaotsweng; tlhaloganyo ya moikepi ga se ya sepe.

²¹ Molomo wa mosiami o jesa ba bantsi, mme dieleele di tla swa ka go tlhoka tlhaloganyo.

²² Tshegofatso ya Morena ke yona e e humisang; matsapa a motho ga a e okeletse sepe.

²³ Go dira tse di tlhabisang ditlhong go kgatlha seeleele; mme monna yo o nang le tlhaloganyo o kgatlhwa ke botlhale.

²⁴ Se moikepi o se tshabang se tla mo wela; se basiami ba se eletsang Modimo o tla se ba naya.

²⁵ E a re fa ledimo le feta, moikepi a ye le lone; mme mosiami o theilwe mo motheong o o sa khutleng.

²⁶ Tse botlha bo di dirang mo menong, tse musi o di dirang mo matlhong, ke tse motlapa o di direlang ba ba mo romileng.

²⁷ Go boifa Morena go oketsa malatsi a bophelo; mme dinyaga tsa baikepi di tla fokodiwa.

²⁸ Tsholofelo ya basiami e isa mo boitumelong; tse baikepi ba di letileng di a nyelela.

²⁹ Tsela ya Morena ke phemelo ya morapedi, mme e isa badiri ba boithamako mo tatlhegong.

³⁰ Mosiami ga a kitla a reketla ka bosakhutleng, mme baikepi ga ba kitla ba nnela ruri mo lefatsheng.

³¹ Molomo wa mosiami o tlhogisa botlhale, mme loleme lwa bolotsana lo tla kumolwa.

³² Molomo wa mosiami o itse tse di natefang; melomo ya baikepi e itse tsa bolotsana fela.