Levitiko 3 - Setswana 1970

Setlhabelo sa tebogo

¹ “ ‘Fa neo ya motho e le setlhabelo sa tebogo se a se ntshang mo dikgomong e tonanyana gongwe e namagadi, a a tlise e e se nang bogole fa pele ga Morena.

² A be a bee letsogo mo tlhogong ya neo ya tlhabelo ya gagwe, a e tlhabe fa mojakong wa Tente ya Boipontsho, mme bomorwa Arone baperesiti ba kgatshe madi mo aletareng tikologong.

³ A be a tlise tse dingwe tsa setlhabelo sa tebogo tsa molelo wa Morena, e bong lomipi lo lo apesang mogodu le mafura otlhe a a mo maleng,

⁴ le diphilo tsoo pedi le matlhaname a tsona a a mo dinokeng le mafura a a bapileng le sebete, a a tlose fa diphilong.

⁵ A bomorwa Arone ba di fise mo aletareng mo godimo ga setlhabelo sa phiso se se mo godimo ga dikgong tse di mo molelong; ke setlhabelo sa molelo sa monko o o monate mo Moreneng.

⁶ “ ‘Mme fa neo ya gagwe ya setlhabelo sa tebogo e le ya difutshane, a a tlise e e se nang bogole, e tonanyana gongwe e namagadi.

⁷ Fa neo e a e tlisang e le kwana, a a e tlise fa pele ga Morena,

⁸ a bee letsogo mo tlhogong ya setlhabelo sa gagwe, a se tlhabe fa pele ga Tente ya Boipontsho, mme a bomorwa Arone ba kgatshe madi a sona mo aletareng tikologong.

⁹ A be a tlise tse dingwe tsa setlhabelo sa tebogo tsa molelo wa Morena, e bong mogatla otlhe wa yona o o mafura, a o kgaole fa thitong, le lomipi lo lo apesitseng mogodu le mafura otlhe a a mo maleng

¹⁰ le diphilo tsoo pedi le matlhaname a tsona a a mo dinokeng le mafura a a bapileng le sebete, a a tlose fa diphilong.

¹¹ Jaanong a moperesiti a di fise mo aletareng, e le dijo tsa tshupelo ya molelo ya Morena.

¹² “ ‘Mme fa neo ya tlhabelo ya gagwe e le podi, a a e tlise fa pele ga Morena,

¹³ a bee letsogo mo tlhogong ya yona a e tlhabe fa pele ga Tente ya Boipontsho, mme a bomorwa Arone ba kgatshe madi a yona mo aletareng tikologong.

¹⁴ A be a tlise tse dingwe tsa yona e le neo ya tlhabelo ya gagwe ya molelo wa Morena, e bong lomipi lo lo apesitseng mogodu le mafura otlhe a a mo maleng

¹⁵ le diphilo tsoo pedi le matlhaname a tsona a a mo dinokeng le mafura a a bapileng le sebete, a a tlose fa diphilong.

¹⁶ Jaanong a moperesiti a di fise mo aletareng, e le dijo tsa molelo tsa monko o o monate mo Moreneng. Mafura otlhe ke a Morena .

¹⁷ Ke molao o o sa khutleng wa ditshika tsa lona mo meagong yotlhe ya lona gore lo se ka lwa ja mafura ape le e seng madi ape.’ ”