Levitiko 22 - Setswana 1970

Ka ga go ja tse di boitshepo

¹ Morena a ba a bua le Moše a re:

² “Raya Arone le bomorwawe gore ba itime tse di boitshepo tsa Baiseraele tse ba di intshepisetsang, e se re gongwe ba itshepolola leina le le boitshepo la me. Ke nna Morena.

³ Ba ree o re: ‘Monna mongwe le mongwe wa ditshika tsa lona, le fa e le wa losika lofe lwa lona, yo o ka atamelang tse di boitshepo tse Baiseraele ba di itshepisetsang Morena, a na le boitshekologo, a motho yoo a nyelediwe fa pele ga me. Ke nna Morena.

⁴ “ ‘Monna mongwe le mongwe wa losika lwa ga Arone yo e leng molepero gongwe yo o nang le tshologo, a se ka a ja tse di boitshepo a ise a itsheke; gape yo o amang mongwe yo o itshekologileng ka moswi gongwe yo o tshologileng peo

⁵ gongwe yo o amang segagabi se a itshekologang ka sona, le fa e le motho yo a itshekologang ka ene, le fa a na le itshekologo efe.

⁶ Motho yo o amang tse di ntseng jalo a a nne a itshekologile go ya maitsiboeng, mme a se ka a ja tse di boitshepo a ise a tlhape mmele.

⁷ Mme fa letsatsi le sena go phirima, o tla bo a itshekile; morago ga moo a ka ja tse di boitshepo; gonne ke dijo tsa gagwe.

⁸ Se se suleng le se se bolailweng ke sebata a se ka a se ja, e se re gongwe a itshekologa ka sona. Ke nna Morena.

⁹ “ ‘A ba tlhokomele ditaelo tsa me gore ba se ka ba ithwesa boleo ka ntlha ya tse di boitshepo; ba tloga ba swa ka tsona, fa ba di itshepolotse. Ke nna Morena yo ke ba itshepisang.

¹⁰ “ ‘Tse di boitshepo ga di a tshwanela go jewa ke yo e seng moperesiti; le yo o agileng go bapa le moperesiti le yo o rapilweng ke ene ka tuelo a se ka a ja tse di boitshepo.

¹¹ Mme fa moperesiti a reka motho ka madi a gagwe, ene o ka di ja; le ba ba tsaletsweng mo ntlong ya gagwe bone ba ka ja dijo tseo.

¹² Fa morwadia moperesiti a nyalwa ke monna yo e seng moperesiti, a se ka a tlhola a ja kabelo ya tse di boitshepo.

¹³ Fela fa morwadia moperesiti a nna motlholagadi gongwe a tlhalwa a se na bana a ba a boela kwa ntlong ya ga rraagwe, gona o ka ja dijo tsa ga rraagwe jaaka pele. Fela di se ka tsa jewa ke ope o sele.

¹⁴ “ ‘E re fa motho a ka ja se se boitshepo, a sa itse, a a se oketse ka karolo ya botlhano, a nee moperesiti se se boitshepo.

¹⁵ A baperesiti ba se ka ba itshepolola dineo tse di boitshepo tse Baiseraele ba di kgethelang Morena

¹⁶ le e seng go ba rwesa molato o o nang le petso ka go ja tse di boitshepo tsa bone ka tshwanologo. Gonne ke nna Morena yo ke ba itshepisang.’ ”

¹⁷ Morena a ba a raya Moše a re:

¹⁸ “Bua le Arone le bomorwawe le Baiseraele botlhe, o ba ree o re: ‘Mongwe le mongwe wa Baiseraele le wa baeng ba ba mo Iseraele yo o tlisang tshupelo ya gagwe – le fa e le dineo tsa maikano gongwe tsa lorato tse ba di tlisetsang Morena go nna setlhabelo sa phiso –

¹⁹ a a tlise se lo ka itumelelwang ka sona e bong e tonanyana e e se nang bogole, e ka nna poana gongwe phelehu gongwe phoko.

²⁰ Lo se ka lwa tlisa sepe se se nang le bogole; gonne ga lo kitla lo itumelelwa ka sona.

²¹ Gongwe fa motho a isetsa Morena setlhabelo sa tebogo go dirafatsa maikano gongwe sa bogagagwe sa dikgomo gongwe sa difutshane, se tla itumelelwa fela, fa se se na bogole; a go se nne bogole bope mo go sona.

²² Se se foufetseng gongwe se se robegileng gongwe se se khutlegileng gongwe se se nang le ditlhagala gongwe sekwepe gongwe ditlhoko, tseo lo se ka lwa di isetsa Morena le e seng go fisetsa Morena sengwe sa tsona mo aletareng.

²³ Mme kgomo gongwe sefutshane se se tokololo e gololegileng gongwe e e gonyetseng, o ka se dira setlhabelo sa lorato fela, mme fa e le sa maikano ga se nke se itumelelwa.

²⁴ Se se fagotsweng ka go pšhwetlwa gongwe go thulwa gongwe go kgaolwa gongwe go segwa lo se ka lwa se isetsa Morena; le gona lo se ka lwa dira jalo mo lefatsheng la ga lona.

²⁵ “ ‘Le fa di tswa mo diatleng tsa baeng, lo se ka lwa di tlhabela Modimo wa lona go nna dijo tsa ona; gonne di senyegile, di golafetse; ga lo ne lo itumelelwa ka tsona.’ ”

²⁶ Morena a ba a raya Moše a re:

²⁷ “Fa go tsalwa namane gongwe kwanyana gongwe potsane, a e nne le mmaayo malatsi a supa, mme go tloga ka letsatsi la robedi go ya kwa pele e tla itumelelwa go ka nna setlhabelo sa molelo sa Morena.

²⁸ Kgomo le fa e le sefutshane lo se ka lwa di tlhaba mmogo le bana ba tsona ka letsatsi le le lengwe.

²⁹ E re fa lo direla Morena setlhabelo sa pako, lo mo tlhabele se lo ka itumelelwang ka sona:

³⁰ A se jewe ka letsatsi la teng; lo se ka lwa sadisa sepe sa sona go ya mosong. Ke nna Morena.

³¹ “Tlhokomelang ditaelo tsa me, lo dire ka tsona. Ke nna Morena.

³² Mme lo se ka lwa itshepolola leina la me le le boitshepo gore ke tle ke kaiwe yo o boitshepo mo Baiseraeleng. Ke nna Morena yo ke lo itshepisang,

³³ yo ke lo ntshitseng kwa lefatsheng la Egepeto gore ke nne Modimo wa lona, nna Morena.”