Johane 9 - Setswana 1970

Phodiso ya sefofu

¹ E rile Jesu a feta, a bona monna yo o tsetsweng e le sefofu.

² Barutwa ba gagwe ba mmotsa ba re: “Moruti, go leofile mang, a ke ene gongwe batsadi ba gagwe, fa a tsetswe e le sefofu jaana?”

³ Jesu a araba a re: “Ga a a leofa, le e seng batsadi ba gagwe. Go dirafetse jalo gore ditiro tsa Modimo di bonadiwe mo go ene.

⁴ Re tshwanetse go dira ditiro tsa yo o nthomileng, go sa le motshegare. Bosigo bo e tla jo go seng ope yo o ka kgonang go dira ka jona.

⁵ Fa ke sa le mo lefatsheng, ke lesedi la lefatshe.”

⁶ Ya re a sena go bua jalo, a kgwela fa fatshe, a duba seretse ka mathe, a tshasa matlho a sona ka seretse seo,

⁷ a se raya a re: “Yaa o tlhape mo bodibeng jwa Siloame!” (Mo phetolelong ke go re: Morongwa). A ya, a tlhapa, a boa a bona.

⁸ Jaanong ba ba agileng nae le ba ba mmonyeng pele e le mokopi ba re: “Yo a ga se ene yo o neng a tlhola a nnetse go kopa?”

⁹ Ba bangwe ba re: “Ke ene;” ba bangwe ba re: “Nnyaya, o tshwana le ene.” Mme ene a re: “Ke nna.”

¹⁰ Jaanong ba mmotsa ba re: “Matlho a gago a foufolotswe jang?”

¹¹ A araba a re: “Motho yo o bidiwang Jesu o dubile seretse, a se ntshasa mo matlhong, a nthaya a re: ‘Yaa kwa bodibeng jwa Siloame, o tlhape.’ Jaanong ka ya, mme ya re ke tlhapa, ka foufologa.”

¹² Ba mo raya ba re: “O kae, yoo?” Ene a re: “Ga ke itse.”

Bafarisai ba botsolotsa sefofu

¹³ Ba mo isa kwa Bafarisaing, ene yo o neng a foufetse pele.

¹⁴ Letsatsi le Jesu a dirileng seretse, a foufolola matlho a gagwe ka lone, e ne e le la Sabata.

¹⁵ Jaanong Bafarisai le bone ba mmotsa jalo ka fa a bonyeng pono ya gagwe ka teng. A ba raya a re: “O mpeile seretse mo matlhong, ka tlhapa, mme jaanong ke a bona.”

¹⁶ Ke fa bangwe ba Bafarisai ba re: “Monna yoo ga se wa Modimo; gonne ga a tshegetse Sabata.” Ba bangwe ba re: “Monna wa moleofi o ka kgona jang go dira ditshupo tse di ntseng jalo?” Ga nna kgaogano gare ga bone.

¹⁷ Ba be ba raya monna wa sefofu ba re: “Wena o a reng ka ga gagwe, ka e le foo o foufolotse matlho a gago?” Ene a re: “Ké moporofeti.”

¹⁸ Bajuta ba se ka ba dumela gore o ne a foufetse, mme o bonye pono ya gagwe, go fitlhelela ba bitse bagolo ba yo o foufologileng,

¹⁹ ba ba botsa ba re: “A yo ke morwaa-lona yo go tweng o tsetswe a foufetse? Jaanong o bona jang kajeno?”

²⁰ Bagolo ba gagwe ba araba ba re: “Re itse fela gore yo ke morwaa-rona le gore o tsetswe a foufetse.

²¹ Mme ga re itse ka fa jaanong a bonang ka teng; le ene yo o mo foufolotseng matlho ga re mo itse. Mo ipoletseng, o godile, o tla ikarabela.”

²² Bagolo ba gagwe ba ne ba bua jalo, ka ba ne ba boifa Bajuta; gonne Bajuta ba ne ba setse ba dumalanye gore fa mongwe a ka mo ipolela gore ke Keresete, a kgaolwe mo senagogeng.

²³ Ke gona ka moo bagolo ba gagwe ba rileng: “O godile, mo ipoletseng.”

²⁴ Ba boa ba bitsa motho gape yo o neng a foufetse, ba mo raya ba re: “Tlotla Modimo fela. Rona re itse gore motho yoo ke moleofi.”

²⁵ Ene a fetola a re: “Fa e le moleofi, ga ke itse; ke itse se le sengwe fela gore ke ne ke le sefofu, mme jaanong ke a bona.”

²⁶ Ba boa ba mmotsa gape ba re: “O go dirileng? O go foufolotse matlho jang?”

²⁷ A ba araba a re: “Kana ke setse ke lo boleletse, mme ga lo a ka lwa utlwa. Lo batlelang go utlwa gape? A kampo le lona lo batla go nna barutwa ba gagwe?”

²⁸ Ke fa ba mo kgoba ba re: “Ke wena morutwa wa gagwe; rona re barutwa ba ga Moše.

²⁹ Re itse gore Modimo o buile le Moše; mme yoo, ga re itse gore o tswa kae.”

³⁰ Monna yoo a ba araba a re: “Ke se se gakgamatsang, fa lo sa itse gore o tswa kae, etswe a mphoufolotse matlho.

³¹ Kana re itse gore Modimo ga o utlwe baleofi; mme fa mongwe a boifa Modimo, a dira ka fa thatong ya ona, Modimo o a mo utlwa.

³² Go tswa tlholegong ga go ise go ke go utlwiwe ka gope gore mongwe o foufolotse matlho a yo o tsetsweng e le sefofu.

³³ Fa yoo e ka bo e se wa Modimo, o ka bo a sa kgone go dira sepe.”

³⁴ Ba mo araba ba re: “O tsaletswe mo dibeng gotlhe fela, mme a o a re ruta?” Ba be ba mo kgarameletsa kwa ntle.

Morena o kopana le sefofu se se foufologileng

³⁵ Jesu a utlwela gore ba mo kgaotse senagogeng. Ya re a mmona, a mo raya a re: “A o dumela mo go Morwa Modimo?”

³⁶ A araba a re: “Morena, ke mang, gore ke tle ke dumele mo go ene?”

³⁷ Jesu a mo raya a re: “O mmonye, e bile ke ene yo o buang nao.”

³⁸ Yoo a re: “Morena, ke a dumela.” A ba a mo obamela.

³⁹ Foo Jesu a re: “Ke tletse katlholo mo lefatsheng gore ba ba sa boneng ba bone, mme ba ba bonang ba foufale.”

⁴⁰ Bangwe ba Bafarisai ba ba nang nae, ya re ba utlwa dilo tseo, ba mo raya ba re: “A le rona re difofu?”

⁴¹ Jesu a ba raya a re: “Fa lo ka bo lo le difofu, lo ka bo lo se na boleo; jaanong ka lo re: ‘Lo a bona!’ boleo jwa lona ga bo tloge.