Johane 7 - Setswana 1970

Bomonnaa Jesu ga ba dumele

¹ Morago ga tseo Jesu a nna a tsamaya mo Galelea; gonne o ne a sa rate go tsamaya mo Jutea, ka Bajuta ba batla go mmolaya.

² Jaanong moletlo wa Bajuta wa Metlaagana o ne o le gaufi.

³ Ke fa bomonnawe ba mo raya ba re: “Tloga mono, o ye kwa Jutea gore le barutwa ba gago ba bone ditiro tsa gago tse o di dirang.

⁴ Gonne ga go ope yo o dirang sengwe mo sephiring, fa ene ka esi a batla go nna mo ponatshegong. Fa o dira dilo tse, iponatse mo lefatsheng.”

⁵ Gonne le bone bomonnawe ba ne ba sa dumele mo go ene ka sebaka sele.

⁶ Jesu a ba raya a re: “Nako ya me ga e ise e tle, mme lona lo ka dira ka nako tsotlhe.

⁷ Lefatshe ga le ka ke la lo tlhoa, mme nna le ntlhoile; gonne nna ke ntse ke supa ka ga lone gore ditiro tsa lone di bosula.

⁸ A go ye lona kwa moletlong, nna ga ke ye kwa go ona jaanong; gonne nako ya me ga e ise e tlale.”

⁹ E rile a sena go bua dilo tseo nabo, a sala mo Galelea.

Jesu o ya kwa Jerusalema

¹⁰ Ya re bomonnawe ba sena go ya, le ene a ya kwa moletlong, e se mo pepeneneng, mme e le mo sephiring.

¹¹ Ke fa Bajuta ba mmatla mo moletlong ba re: “Yole o kae?”

¹² Mme go ne go le phapaano e kgolo mo bathong ka ntlha ya gagwe; gonne bangwe ba ne ba re: “O molemo;” ba bangwe ba re: “Nnyaya, kana o timetsa batho.”

¹³ Le fa go ntse jalo ga bo go se ope yo o buang ka ga gagwe ka phuthologo ka ntlha ya go boifa Bajuta.

Jesu o emela thuto ya gagwe

¹⁴ E rile e setse e le fa gare ga moletlo, Jesu a ya kwa Tempeleng, a ruta.

¹⁵ Ke fa Bajuta ba gakgamala ba re: “Monna yo, o itse Dikwalo jang, etswe a sa rutwa?”

¹⁶ Jesu a ba araba a re: “Thuto ya me ga se ya me, ke ya yo o nthomileng.

¹⁷ Fa motho a rata go dira thato ya Modimo, o tla itse ka ga thuto gore a e tswa go ona, kampo ke bua se se tswang mo go nna fela.

¹⁸ Yo o buang se se tswang mo go ene fela o ipatlela tlotlo; mme yo o batlang tlotlo ya yo o mo romileng, yoo ke ene wa nnete, ga go na tshiamololo epe mo go ene.

¹⁹ A Moše ga a a lo naya molao? Mme le fa go ntse jalo ga go ope wa lona yo o tshegetsang molao. Lo batlelang go mpolaya?”

²⁰ Batho ba araba ba re: “O a tsenwa; ke mang yo o batlang go go bolaya?”

²¹ Jesu a ba araba a re: “Ke dirile tiro e le nngwe fela, mme lo gakgametse lotlhe.

²² Moše o lo neile bogwera; – e se gore bo tswa mo go Moše, bo tswa mo go borraeno – mme lo a tle lo rupise motho ka letsatsi la Sabata.

²³ Fa motho a rupisiwa ka Sabata, gore molao wa ga Moše o se dirololwe, ke eng fa lo nkgalefetse, fa ke fodisitse motho yotlhe ka Sabata?

²⁴ Se atlholeng ka fa lo bonang; atlholang ka katlholo e e siameng.”

Jesu ke mang?

²⁵ Jaanong bangwe ba Jerusalema ba re: “Yoo a ga se ene yo ba batlang go mmolaya?

²⁶ Kana o bua ka phuthologo, mme ga ba mo ree sepe. A jaana ruri balaodi ga ba a lemoga, fa e le ene Keresete?

²⁷ Mme re itse kwa monna yo a tlhagang teng; mme motlhang Keresete a tlang, ga go ope yo o tla itseng kwa a tlhagang teng.”

²⁸ Foo Jesu a tsholetsa lentswe mo Tempeleng, a ruta a re: “A lo a nkitse, a lo itse kwa ke tswang teng? Kana ga ke a itlisa, mme yo o nthomileng ke wa nnete, yo lo sa mo itseng.

²⁹ Nna ke a mo itse; gonne ke fa go ene, e bile o nthomile.”

³⁰ Jaanong ba batla go mo tshwara; mme ga se ka ga nna ope yo o mo ntshetsang letsogo, ka nako ya gagwe e ne e ise e tle.

³¹ Mme ba bantsi ba morafe ba dumela mo go ene, ba be ba re: “A fa Keresete a tla, o tla dira ditshupo tse dintsi bogolo go tse monna yo a di dirileng?”

Jesu le baganetsi ba gagwe

³² Ya re Bafarisai ba utlwa gore batho ba seba jalo ka ga gagwe, bone baperesiti ba bagolo le Bafarisai ba roma batlhanka go mo tshwara.

³³ Jaanong Jesu a re: “Ke sa na le lona ka bokhutshwanyane fela, mme ke ya go ene yo o nthomileng.

³⁴ Lo tla mpatla, mme ga lo kitla lo mpona; le gona kwa ke leng teng lona ga lo kgone go fitlha teng.”

³⁵ Foo Bajuta ba raana ba re: “Yoo o tla ya kae, fa a re, ga re ka ke ra mmona? A o tla ya kwa go ba ba falaletseng kwa Bagerikeng, a ya go ruta Bagerika?

³⁶ Lefoko la reng, le a le buileng a re: ‘Lo tla mpatla, mme lo se ke lo mpone, le gona fa ke leng teng, lona ga lo kgone go fitlha teng’?”

Jesu ke motswedi wa nnete

³⁷ Ka letsatsi la bofelo, e le le legolo la moletlo, Jesu a bo a eme, a tsholetsa lentswe a re: “Fa mongwe a nyorilwe, a a tle go nna, a nwe!

³⁸ Yo o dumelang mo go nna, ‘dinoka tsa metsi a a phelang di tla ela di tswa mo mmeleng wa gagwe,’ jaaka Dikwalo di buile.”

³⁹ Mme o ne a bua jalo ka ga Mowa o ba ba dumelang mo go ene ba tla o amogelang; gonne Mowa o o Boitshepo o ne o ise o nne teng, ka Jesu a ne a ise a galalediwe.

Kganetsanyo ya Bajuta

⁴⁰ Jaanong e rile bangwe mo bathong ba sena go utlwa mafoko ao, ba bua ba re: “Ammaaruri, ke ene moporofeti yole.”

⁴¹ Ba bangwe ba re: “Ke ene Keresete.” Ba bangwe ba re: “A Keresete a ka tswa kwa Galelea?

⁴² A Lokwalo ga lo a ka lwa re: Keresete o tla tswa mo losikeng lwa ga Dafita le mo motsaneng wa Betleheme, mo Dafita a neng a le teng?”

⁴³ Ga ba ga nna kgaogano mo bathong ka ga gagwe.

⁴⁴ Bangwe ba bone ba batla go mo tshwara, mme ga bo go se ope yo o mo ntshetsang letsogo.

Go sa dumeleng ga ba Lekgotla

⁴⁵ Ke fa batlhanka ba boela kwa baperesiting ba bagolo le Bafarisaing; mme bone ba ba raya ba re: “Lo ne lo sa mo tsisetseng?”

⁴⁶ Batlhanka ba araba ba re: “Ga go ise go ko go bue motho ope jaaka motho yole.”

⁴⁷ Bafarisai ba ba fetola ba re: “A le lona lo timeditswe?

⁴⁸ A mongwe wa balaodi gongwe wa Bafarisai o dumetse mo go ene?

⁴⁹ Kana morafe o, o o sa itseng molao, o hutsitswe!”

⁵⁰ Nikotemo, mongwe wa bone yo o kileng a tla go ene, a ba raya a re:

⁵¹ “A molao wa rona o ka atlhola motho, a ise a sekisiwe, go ise go itsiwe se a se dirileng?”

⁵² Ba mo araba ba re: “A le wena o wa kwa Galelea? Tlhotlhomisa o bone gore ga go na moporofeti ope yo o ka tswang kwa Galelea.”

⁵³ Jaanong ba tsamaya, mongwe le mongwe a ya kwa ga gagwe.