Johane 14 - Setswana 1970

Dipotso tsa barutwa. Dikgothatso ka ga tumelo

¹ “A dipelo tsa lona di se huduege; dumelang mo Modimong, le nna, dumelang mo go nna!

² Mo ntlong ya ga Rre go na le maago a le mantsi. Go seng jalo, nka bo ke lo boleletse; gonne ke ya go lo baakanyetsa manno.

³ Mme e tla re ke sena go ya le go lo baakanyetsa manno, ke boe, ke lo itseele gore kwa ke leng teng, le lona lo nne teng.

⁴ Mme kwa ke yang teng, lo a go itse, le tsela lo a e itse.”

⁵ Thomase a mo raya a re: “Morena, ga re itse kwa o yang teng; mme tsela re ka e itse jang?”

⁶ Jesu a mo araba a re: “Ke nna tsela le boammaaruri le bophelo; ga go ope yo o ka fitlhang kwa go Rara fa e se ka nna.

⁷ Fa lo ka bo lo nkitse, lo ka bo lo itse le ene Rre. Mme go tloga jaanong lo a mo itse, lo bile lo mmonye.”

⁸ Filipo a mo raya a re: “Morena, re supetse Rara, foo go tla bo go re lekanye.”

⁹ Jesu a mo raya a re: “Ga ke bolo go nna le lona, mme a ga o ise o nkitse, Filipo? Yo o mponyeng o bonye Rara. O bua jang fa o re: ‘Re supetse Rara’?

¹⁰ A ga o dumele gore nna ke mo go Rara, le Rara o mo go nna? Mafoko a ke a buang le lona ga ke a bue ka bogame; mme Rara yo o nnang mo go nna ke ene yo o dirang ditiro tsa gagwe.

¹¹ Ntumeleng gore ke mo go Rara, le Rara o mo go nna; mme fa go sa nne jalo, ntumeleng ka ntlha ya tsona ditiro.

¹² Ammaaruri, ammaaruri ke lo raya ke re: Yo o dumelang mo go nna, le ene o tla dira ditiro tse ke di dirang, e bile o tla dira tse dikgolo bogolo go tse; gonne ke ya kwa go Rara.

¹³ Mme le fa e ka nna eng se lo ka se kopang mo leineng la me, ke tla se dira gore Rara a galalediwe mo go Morwa.

¹⁴ Fa lo kopa sengwe mo leineng la me, ke tla se dira.

Ka ga go tla ga Mowa le kagiso

¹⁵ “Fa lo nthata, lo tla dirisa ditaelo tsa me.

¹⁶ Nna ke tla rapela Rara, mme o tla lo naya Mogomotsi yo mongwe gore a nne le lona ka bosakhutleng,

¹⁷ e bong Mowa wa nnete, o lefatshe le palelwang ke go o amogela; gonne ga le o bone le e seng go o itse. Lona lo a o itse; gonne o na le lona, e bile o tla nna mo teng ga lona.

¹⁸ “Ga nke ke lo tlogela lo le masiela. Ke tla tla go lona.

¹⁹ Morago ga sebakanyana lefatshe ga le nke le tlhola le mpona; mme lona lo tla mpona; e re ka ke phela, le lona lo tla phela.

²⁰ Tsatsing leo lo tla lemoga gore ke mo go Rre, le lona lo mo go nna, le nna ke mo go lona.

²¹ “Yo o tshotseng ditaolo tsa me, a di dirisa, ke ene yo o nthatang; mme yo o nthatang o tla ratwa ke Rre, le nna ke tla mo rata, ke be ke mo itshenolela.”

²² Jutase, e seng Isekariote, a mo raya a re: “Morena, ke go reng, fa o tla itshenolela rona, e seng lefatshe?”

²³ Jesu a mo araba a re: “Fa mongwe a nthata, o tla tlhokomela lefoko la me, le Rre o tla mo rata; mme re tla tla go ene, re aga mo go ene.

²⁴ Yo o sa nthateng ga a tlhokomele mafoko a me; mme kana lefoko le lo le utlwang ga se la me; ke la ga Rara yo o nthomileng.

²⁵ “Dilo tse ke di buile le lona, ke sa ntse ke na le lona.

²⁶ Mme Mogomotsi, e bong Mowa o o Boitshepo, o Rara o tla o romelang mo leineng la me, o tla lo ruta dilo tsotlhe, o bo o lo gakolola tsotlhe tse ke di lo boleletseng.

²⁷ “Ke lo tlogelela kagiso, ke lo naya kagiso ya me. Ga ke lo nee jaaka lefatshe le naya. A dipelo tsa lona di se huduege, le gona di se boife.

²⁸ Lo utlwile jaaka ke lo reile ka re: ‘Ke a tsamaya, e bile ke boela go lona.’ Fa lo ka bo lo nthata, lo ka bo lo itumela, fa ke rile: Ke ya go Rara; gonne Rara o mogolo go nna.

²⁹ Ke lo boleletse jaanong, go ise go dirafale gore e re fa go dirafala, lo dumele.

³⁰ Ga nkitla ke tlhola ke bua tse dintsi le lona; gonne molaodi wa lefatshe leno o e tla, mme ga a na thata epe mo go nna;

³¹ fela lefatshe le na le go itse gore ke rata Rara, ke bile ke dira ka fa a ntaetseng ka teng. “Ka moo a re nanogeng, re tlogeng fano.