Johane 10 - Setswana 1970

Lesaka la dinku

¹ “Ammaaruri, ammaaruri ke lo raya ke re: Yo o sa tseneng ka kgoro ya lesaka la dinku, mme a tlolela go sele, ke legodu le senokwane.

² Mme yo o tsenang ka kgoro ke modisa wa dinku.

³ Modisa wa kgoro o a mmulela, dinku di utlwa lentswe la gagwe, o bitsa dinku tse e leng tsa gagwe ka maina, a di bolotse.

⁴ Fa a sena go bolotsa dinku tsotlhe tse e leng tsa gagwe, a di etelele pele, dinku di mo sale morago; gonne di itse lentswe la gagwe.

⁵ Moeng ga di ka ke tsa mo sala morago, mme di tla mo tshaba, ka di sa itse mantswe a baeng.”

⁶ Jesu a bua nabo ka setshwantsho seo; mme bone ba se ka ba tlhaloganya gore ke eng se a se buang nabo.

Jesu ke kgoro ya lesaka le modisa

⁷ Foo Jesu a bua gape nabo a re: “Ammaaruri, ammaaruri ke lo raya ke re: Ke nna kgoro ya dinku.

⁸ Botlhe ba ba tlileng pele ga me ke magodu le dinokwane, mme dinku ga di a ka tsa ba utlwa.

⁹ Ke nna kgoro. Fa mongwe a tsena ka nna, o tla pholosiwa; o tla tsena, a tswa, e bile o tla bona mafulo.

¹⁰ Legodu le tla fela go utswa le go bolaya le go senya. Nna ke tsile gore di baane le bophelo, di be di nne le letlotlo.

¹¹ “Ke nna modisa yo o molemo; modisa yo o molemo o beela dinku bophelo jwa gagwe.

¹² Yo e leng morapiwa, e se modisa, yo dinku e seng tsa gagwe, fa a bona phiri e tla, o tlogela dinku, a tshabe, phiri e di tshware, e di falatse.

¹³ Yo o rapilweng o a tshaba, ka e le morapiwa, mme a sa kgathalele dinku.

¹⁴ Ke nna modisa yo o molemo; ke itse tsa me, e bile ke itsiwe ke tsa me,

¹⁵ jaaka Rara a nkitse, le nna ke itse Rara; ke bile ke beela dinku bophelo jwa me.

¹⁶ Ke na le dinku di sele, tse e seng tsa lesaka le; le tsona ke tshwanetse go di tsisa; di tla utlwa lentswe la me, mme e tla nna letsomane le le lengwe fela le modisa a le mongwe fela.

¹⁷ “E re ka nna ke neela botshelo jwa me gore ke be ke bo tsee gape, ke ka moo Rara a nthatang.

¹⁸ Ga go ope yo o ka bo nkamogang, ke nna ke bo neelang ka bogame. Ke na le thata go bo neela, ke bile ke na le thata go bo tsaya gape. Taolo e ke e amogetse mo go Rre.”

¹⁹ Phapaano ya nna teng gape mo gare ga Bajuta ka ntlha ya mafoko ao.

²⁰ Ba bantsi ba bone ba re: “O na le modemone, o tlhakanye tlhogo; lo mo reeletsang?”

²¹ Ba bangwe ba re: “Mafoko a ga se a motho yo o nang le modemone. A modemone o ka kgona go foufolola matlho a difofu?”

Jesu ke Morwa Modimo

²² Jaanong ga bo go le moletlo wa Ntšhwafatso ya Tempele mo Jerusalema, go le mariga.

²³ Jesu a tsamaya mo lapeng la Tempele, mo leobong la ga Salomo.

²⁴ Foo Bajuta ba mo dikanyetsa, ba mo raya ba re: “O tla belaetsa mewa ya rona goleele go le kae? Fa o le Keresete, re bolelele ka thanolo.”

²⁵ Jesu a ba fetola a re: “Ke lo boleletse, mme lona ga lo dumele. Ditiro tse ke di dirang mo leineng la ga Rre ke tsona tse di supang ka ga me.

²⁶ Mme lona ga lo dumele, ka gonne ga lo dinku tsa me, jaaka ke lo boleletse.

²⁷ Dinku tsa me di utlwa lentswe la me, ke a di itse, mme di ntshala morago.

²⁸ Ke di naya bophelo jo bo sa khutleng. Ga di ka ke tsa latlhega, le fa e le ka motlha ope; le gona ga go ope yo o ka di phamolang mo seatleng sa me.

²⁹ Rre yo o di nneileng o mogolo go botlhe, mme ga go ope yo o ka di phamolang mo seatleng sa ga Rre.

Bongwefela jwa ga Jesu le Modimo

³⁰ “Nna le Rara re bongwefela.”

³¹ Jaanong Bajuta ba sela majwe gape gore ba mo kgobotletse.

³² Jesu a ba fetola a re: “Ke lo bontshitse ditiro tse di molemo di le dintsi tse di tswang go Rara; lo nkgobotleletsa tiro efe ya tsona?”

³³ Bajuta ba mo araba ba re: “Ga re go kgobotleletse tiro e e molemo; mme ke ka ntlha ya kgalo, ka e re ò le motho, ò itshema Modimo.”

³⁴ Jesu a ba araba a re: “A ga go a kwalwa mo molaong wa lona ga twe: ‘Ke rile, lo medimo’?

³⁵ Fa molao o biditse bone medimo ba Lefoko la Modimo le tlileng kwa go bone – mme Lokwalo lo sa ka ke lwa dirololwa –

³⁶ a lo bolela ka ga gagwe yo Rara a mo itshepisitseng, a mo romela mo lefatsheng, lo re: ‘O a kgala,’ ka ke buile ka re: ‘Ke Morwa Modimo’?

³⁷ Fa ke sa dire ditiro tsa ga Rre, lo se ka lwa ntumela.

³⁸ Mme fa ke di dira, dumelang ditiro, le fa nna lo sa ntumele, gore lo lemoge le go itse gore Rara o mo go nna, le nna ke mo go Rara.”

³⁹ Ba fela ba batla go mo tshwara, mme a falola mo diatleng tsa bone.

⁴⁰ A ba a boela kwa moseja ga Joretane, kwa Johane a neng a kolobetsa teng pele, a nna teng.

⁴¹ Mme ba bantsi ba tla go ene ba re: “Johane ga a a ka a dira sesupo sepe, mme tsotlhe tse Johane o di buileng ka ga yo, e ne e le tsa nnete.”

⁴² Teng ba bantsi ba dumela mo go ene.