Hoshee 8 - Setswana 1970

Morena o kgalemela Baiseraele

¹ “Tsenya lonaka mo molomong! Go fologelwa mo Ntlong ya Morena jaaka ntsu, ka ba sentse kgolagano ya me, e bile ba tlodile molao wa me.

² Ba tla ntlhaeletsa ba re: ‘Modimo wa rona, rona Baiseraele re a go itse.’

³ Iseraele o nyaditse tse di molemo; mmaba o tla mo latelela.

⁴ “Ba tlhomile dikgosi, mme e seng ka nna; ba beile dikgosana, ke sa itse. Ba itiretse medimo ya diseto ka selefera ya bona le gouta ya bona, mo ba tla nyelediwang.

⁵ Namane ya gago, Samaria, e mpe mo go maswe. Bogale jwa me bo a ba tukela. Ba tla palelwa ke go nna phepa sebaka se se kana kang?

⁶ Gonne le yona namane e tswa mo go Iseraele, e dirilwe ke mothudi, mme ga se yona Modimo. Ee, namane ya Samaria e tla phatlakanngwa.

⁷ Gonne ba jwetse phefo, mme ba tla roba ledimo. Mabele ga a tsale le e seng go dira dijo; le fa a ka di dira, di tla jewa ke ba sele.

⁸ Iseraele o meditswe. Jaanong ba mo gare ga ditšhaba, ba tshwana le selo se se se nang molemo.

⁹ Gonne ba ile kwa Asiria. Eferaime ke esele ya naga e e ikgapang. Ba itheketse bathusi.

¹⁰ Le fa ba ka batla thuso kwa ditšhabeng, ke tla ba olola jaanong; ba tla simolola go fokotsega ka ntlha ya morwalo wa kgosi ya dikgosana.

¹¹ “Gonne Eferaime o agile dialetare tse dintsi a re, o tlhapa boleo, mme dialetare tseo di mo okeleditse dibe.

¹² Le fa ke mo kwaletse dikaelo tse dintsi tsa molao wa me, di kaiwa jaaka tsa moeng.

¹³ Ba tlhaba ditlhabelo tse ba di ntlelang; ke nama, e jewa ke bone. Morena ga a kgatlhwe ke tsona. Jaanong o tla gopola tshiamololo ya bone, a ba beletsa maleo a bone; ba tla boela kwa Egepeto.

¹⁴ “E re ka Iseraele a lebetse Mmopi wa gagwe, a aga matlo a borena, le ka Juta a agile bontsi jwa metse e e femetsweng, ke tla tshuba metse ya gagwe ka molelo o o jang matlo a teng a borena.”