Hoshee 6 - Setswana 1970

Boikwatlhao jwa morafe bo sa ntse bo belaetsa

¹ “ ‘Tlayang, a re boeleng kwa go Morena, gonne ke ene yo o garotseng, mme o tla re fodisa; ke ene yo o iteileng, mme o tla re fapa.

² O tla re rudisa morago ga malatsi a mabedi, a re tsosa ka letsatsi la boraro gore re phele fa pele ga gagwe.

³ A re itseng Morena, re tlhoafalele go mo itse. O tla tswa ruri jaaka mahube, a tla kwa go rona jaaka pula, le jaaka pula ya dikgakologo e e kolobisang lefatshe.’

⁴ “Nka go direlang, Eferaime? Nka go direlang, Juta? ka lorato lwa lona lo tshwana le mouwane wa masa, lo tshwana le monyo o o tlhotlhoregang e sa le phakela.

⁵ Ka lebaka le ke ba remile ka baporofeti, ka ba bolaya ka dipolelo tsa molomo wa me. Dikatlholo tsa me di tla tswa jaaka lesedi.

⁶ Gonne se se nkgatlhang ke lorato, e seng setlhabelo, le go itse Modimo bogolo go ditlhabelo tsa phiso.

⁷ “Mme bona ba sentse kgolagano mo motseng wa Atame; teng ba ntiretse ka boikanyologo.

⁸ Gileate ke motse wa basenyi, o tletse metlhala ya madi.

⁹ Lekoko la baperesiti le bolaela batho mo tseleng e e yang kwa Šegeme jaaka senokwane se se laletseng. Ee, ba dirile tse di tlhabisang ditlhong.

¹⁰ Mo ntlong ya Iseraele ke bonye se se boitshegang: Boaka bo teng mo go Eferaime, Iseraele o itladitse maswe.

¹¹ “Le wena, Juta, o baakanyeditswe thobo, mogang ke busetsang batshwarwi ba morafe wa me kwa gae.