Hoshee 14 - Setswana 1970

Modimo o itshwarela ba ba tlhabologang

¹ Iseraele, tlhabologela kwa Moreneng, Modimo wa gago, gonne o ole ka tshiamololo ya gago.

² Tsamayang ka mafoko, lo boele kwa Moreneng, lo mo ree lo re: “Re itshwarele molato otlhe gore re amogele se se molemo! Mme re tla leboga ka melomo ya rona boemong jwa ditlhabelo.

³ Asiria ga a na go re thusa; ga re nke re palama dipitse, ga re tlhole re bitsa tiro ya diatla tsa rona modimo wa rona; gonne lesiela le bona kutlwelo-botlhoko mo go wena.”

Morena o solofetsa Baiseraele botshelo jo bošwa

⁴ “Ke tla fodisa boikepo jwa bona, ke ba rata ka pelotshweu; gonne bogale jwa me bo boile mo go bona.

⁵ Ke tla nna mo Iseraeleng jaaka monyo, o tla thunya jaaka sešeše, a nama medi jaaka Lebanone.

⁶ Matlhogela a gagwe a tla ntsifala; bontle jwa gagwe bo tla nna jaaka jwa setlhare sa olefa, monko wa gagwe o tshwana le wa Lebanone.

⁷ Ba ba nnang mo moriting wa sona ba tla boa ba lema mabele, ba tlhoga jaaka setlhare sa moweine se se tumileng jaaka weine ya Lebanone.

⁸ Eferaime o ka tlhola a dira eng ka medimo ya diseto? Nna ke mo utlwile, ke tla nna ke mo tlhokomela. Ke tla nna jaaka setlhare sa mosiperese se setala. Maungo a gago a tla tswa mo go nna.”

Khutliso

⁹ Yo o botlhale a a tlhaloganye dilo tse! Yo o tlhalefileng a a di itse. Gonne ditsela tsa Morena di tlhamaletse. Basiami ba tla tsamaya mo go tsona, mme baikepi ba kgotšwa mo go tsona.