Habakuke 3 - Setswana 1970

Thapelo ya moporofeti

¹ Thapelo ya ga Habakuke moporofeti, ka moopelo wa sefela sa selelo.

² Morena, ke utlwile pegelo ya gago, ka ba ka tshoga. Morena, dirafatsa tiro ya gago mo gare ga dinyaga, ò e itsise mo gare ga dinyaga. Mme mo bogaleng ò gakologelwe boutlwelo-botlhoko.

³ Modimo o tla tswa kwa Themane, Moitshepi a tswa kwa thabeng ya Pharane. Sela. Kgalalelo ya ona e khurumeditse magodimo, lefatshe le tletse pako ya ona.

⁴ Go tla nna phatsimo jaaka lesedi la letsatsi, marang a fa lotlhakoreng lwa ona; ke fa thata ya ona e fitlhilweng teng.

⁵ Leroborobo le tla o etelela pele, letshoroma le o sala morago.

⁶ Fa o ema, o roromisa lefatshe; fa o leba, o tsibosa ditšhaba; dithaba tse di sa khutleng di a phatlakanngwa, dithabana tsa bogologolo di a kokobela, tse e leng metsamao ya ona ya kgale.

⁷ Ke bonye ditente tsa Kušane di le mo tlalelong, masela a ditente tsa lefatshe la Midiane a tetesela.

⁸ Morena, a ò tuketse dinoka bogale? A ò galefetse dinoka? Gongwe a ò gakaletse lewatle, ka ò palame dipitse tsa gago le dikoloi tsa gago tsa phenyo?

⁹ Bora jwa gago bo etleetsegile gotlhe. Kgwatlha ya gago ya metsu e tletse. Sela. O phatlola lefatshe gore le tswe dinoka.

¹⁰ Fa dithaba di go bona, di a roroma. Morwalela o a feta. Lewatle le a duma, le tsholeletsa mabogo kwa godimo.

¹¹ Letsatsi le ngwedi di boela mo mannong a tsona. Go bonesa lesedi la metsu ya gago e e fofang; go phatsima logadima lwa lerumo la gago.

¹² O ralala lefatshe ò gaketse; ò photha ditšhaba ò le bogale.

¹³ O bolotse go thusa morafe wa gago le go thusa Motlodiwa wa gago; o tšhwetlakanya tlhogo ya lapa la moikepi, ò mo apola go tloga dinaong go fitlha molaleng. Sela.

¹⁴ O tlhaba tlhogo ya dikgosana tsa gagwe ka marumo a gagwe tse di tlhaselang go mphalatsa, tse di duduetsang jaaka e kete di rata go ja modidi fa a fitlhegileng teng.

¹⁵ O gatile mo lewatleng ka dipitse tsa gago, mo phuthegelong ya metsi a mantsi.

¹⁶ E rile ke utlwa jalo, teng ya me ya huduega, molomo wa me wa roroma ka ntlha ya modumo; go nyera ga ntsena mo marapong, ka tetesela fa ke emeng teng; gonne ke na le go iketlela letsatsi la tlalelo gore le tlele morafe o o re tlhaselang.

¹⁷ Le fa setlhare sa feie se sa tlhoge, le fa go se maungo mo ditlhareng tsa moweine, le fa phulo ya setlhare sa olefa e swabisa, le fa masimo a sa ntshe dijo, le fa dinku di feleletse mo sakaneng, le fa go se dikgomo mo marakeng:

¹⁸ Le fa go ntse jalo ke rata go dudueletsa Morena, ke rata go itumelela Modimo wa pholoso ya me.

¹⁹ Modimo Morena ke thata ya me; o dira maoto a me jaaka a ditshephe; o ntsamaisa mo mafelong a a kwa godimo a me. Go kwaletswe moopedisi; ka diletso tsa me tsa ditlhale tsa mesifa.