Genese 49 - Setswana 1970

Jakobe o tshegofatsa bomorwawe

¹ Jaanong Jakobe a bitsa bomorwawe a re: “Phuthegang gore ke lo bolelele tse di tla lo dirafalelang mo metlheng e e tlang.

² Kgobokanang lo utlwe, lona bomorwa Jakobe! Reetsang Iseraele, rraeno!

³ Rubene, o morwaake yo mogolo, o thata ya me, o wa ntlha wa nonofo ya me. O gaisa ba bangwe ka bogolo; o phala ba bangwe ka bonatla.

⁴ O huhula jaaka metsi. Ga o kitla o nna yo mogolo; ka gonne o kile wa palama mo bolaong jwa ga rraago, wa bo itshekolola. Wa palama mo marobalong a me.

⁵ Simeone le Lefi ke bana ba motho. Dibolai tsa bone ke tse di setlhogo.

⁶ A mowa wa me o se ka wa tsena mo lekgotleng la bone; a tlotlo ya me e se ka ya kopana le phuthego ya bone. Gonne ba bolaile banna ka bogale jwa bone; ba golafatsa dipoo ka bomo.

⁷ A go hutsiwe bogale jwa bone, ka bo tuka thata, le kgalefo ya bone, ka e le setlhogo. Ke tla ba kgaoganya mo go Jakobe, ke ba phatlalatsa mo go Iseraele.

⁸ Juta ke wena, bomorwa-rraago ba tla go boka. Seatla sa gago se tla nna mo thamong tsa baba ba gago. Bomorwa-rraago ba tla ikoba fa pele ga gago.

⁹ Juta ke tawana; o tlhatlogile, morwaaka, o tswa thopong. A inama, a botha jaaka tau le jaaka tau e namagadi. Ke mang yo o ka mo tshosang?

¹⁰ Thobane ya bogosi ga e kitla e tloga mo go Juta le e seng lore lwa mmusi fa gare ga dinao tsa gagwe go fitlhelela go be go tle Silo. Ene merafe e tla mo utlwa.

¹¹ O bofelela eselana ya gagwe mo setlhareng sa moweine le ngwana wa esele e namagadi ya gagwe mo go sa moweine se se tlhaotsweng. Seaparo sa gagwe o se tlhatswa ka weine le kobo ya gagwe ka matute a maungo a moweine.

¹² Matlho a gagwe a leoto ka weine; o sweufetse meno ka mašwi.

¹³ Sebulone o tla nna fa losing lwa lewatle, ene o fa magorogelong a mekoro. Letlhakore la gagwe le kopana le naga ya Sitone.

¹⁴ Isašare ke esele ya marapo a a thata, o botha mo gare ga maraka.

¹⁵ A fitlhela boikhutso bo le monate le lefatshe le le lentle; a oba legetla la gagwe go rwala, a nna motlhanka yo o kgethisiwang.

¹⁶ Dane o tla emela tshiamo mo morafeng wa gagwe jaaka longwe lwa ditso tsa Iseraele.

¹⁷ A Dane a nne noga mo tseleng le mokwepa mo tselaneng o o lomang pitse diretheng gore mopalami wa yona a wele kwa morago.

¹⁸ Morena, ke lebeletse pholoso ya gago.

¹⁹ Gate – setlhopha sa dinokwane se tla mo pitlaganya, mme ene o tla pitlaganya direthe tsa bone.

²⁰ Asere – dijo tsa gagwe di mafura; ene o tsisa menate ya dikgosi.

²¹ Nafetale ke phala e namagadi e e gololegileng; o utlwatsa bontle jwa mafoko.

²² Josefa ke setlhare se senana se se ungwang, ke setlhare se senana se se fa motsweding. Dikala tsa sona di golela godimo ga lorako.

²³ Ba ba hulang metswi ba ne ba mo tlhasela, ba mo hula, ba mo lwantsha.

²⁴ Mme bora jwa gagwe jwa nna bo tiile, mabogo le diatla tsa gagwe di le bobebe ka thuso ya Mothata wa ga Jakobe, e e tswang mo go yo e leng Modisa wa ga Iseraele le lefika la gagwe;

²⁵ e e tswang mo Modimong wa ga rraago – a o go thuse! le mo go Mong-wa-thata-yotlhe – a a go tshegofatse ka ditshegofatso tsa legodimo kwa godimo, le ka ditshegofatso tsa bodiba jo bo leng kwa tlase le ka ditshegofatso tsa mabele le letsalo.

²⁶ Ditshegofatso tsa ga rraago di feta ditshegofatso tsa dithaba tse di sa khutleng le mokgabo wa dithabana tse di sa khutleng. A di tle mo tlhogong ya ga Josefa le mo phogong ya motlotlegi wa bomorwa-rraagwe.

²⁷ Benyamene ke phiri e e garolang. O ja thopo mo mosong, maitsiboa a abele se se thukhuthilweng.”

²⁸ Botlhe bao ke bone ditso di le 12 tsa Iseraele, ke tsona tse rraabo o di ba boleletseng, fa a ba tshegofatsa mongwe le mongwe ka tshegofatso ya gagwe; a ba tshegofatsa jalo.

Loso lwa ga Jakobe le phitlho ya gagwe

²⁹ A ba a ba laela, a ba raya a re: “E re ke sena go bilediwa kwa morafeng wa ga etsho, lo mphitlheng fa go borre mo logageng lo lo mo tshimong ya ga Eferone wa Mohethe

³⁰ mo logageng lo lo mo tshimong ya Makapela e e mo ntlheng ya botlhabatsatsi ya Mamere mo lefatsheng la Kanana, e bong tshimo ele e Aborahame o neng a e reka mo go Eferone wa Mohethe go nna mabitla a losika lwa gagwe.

³¹ Gona foo ba fitlhile Aborahame le Sara mosadi wa gagwe; gona foo ba fitlhile Isaka le Rebeka mosadi wa gagwe; gona foo ke fitlhile Lea

³² mo tshimong e e nang le logaga e e rekilweng mo go Bahethe.”

³³ Jaanong ya re Jakobe a sena go fetsa go laela bomorwawe, a busetsa maoto a gagwe mo bolaong, a swa, a bilediwa kwa bathong ba ga gabo.