Genese 42 - Setswana 1970

Bomogoloa Josefa ba ya kwa Egepeto go reka mabele

¹ E rile Jakobe a utlwela gore mabele a teng kwa Egepeto, a raya bomorwawe a re: “Lo lebanelang?”

² A ba a re: “Bonang, ke utlwetse mabele kwa Egepeto. Yaang lo ye go re rekela mabele teng gore re se ka ra swa ka tlala.”

³ Ke fa bomogoloa Josefa ba le some ba ya kwa Egepeto go reka mabele teng.

⁴ Mme Benyamene, monnaa Josefa, Jakobe a se ka a mo roma le bomogolowe; gonne a tshaba gore e ka re gongwe kotsi ya mo wela mo tseleng.

⁵ Bomorwa Iseraele ba fitlha jalo go reka mabele ba na le ba bangwe ba ba ileng teng; gonne go ne go le leuba mo lefatsheng la Kanana.

⁶ Mme Josefa e ne e le molaodi mo lefatsheng, e le ene yo o rekisang mabele mo bathong botlhe ba lefatshe. Jaanong ya re bomogolowe ba fitlha, ba inamela fa fatshe fa pele ga gagwe.

⁷ Mme ya re Josefa a bona bomogolowe, a ba itse, a ba itobela, a bua nabo ka bogale, a ba botsa a re: “Lo tswa kae?” Ba re: “Re tswa kwa lefatsheng la Kanana, re tsile go reka dijo.”

⁸ Josefa ene a itse bomogolowe, mme bone ba se ka ba mo itse.

⁹ Ke fa Josefa a gakologelwa ditoro tse a kileng a di lora ka ga bone a ba raya a re: “Lo batlhodi, lo tlile go bona fa lefatshe le sa femelwang teng.”

¹⁰ Ba mo fetola ba re: “Nnyaya, morena! Batlhanka ba gago ba tlile go reka dijo.

¹¹ Rona rotlhe re bomorwa monna a le mongwe. Re batho ba nnete. Batlhanka ba gago ga se batlhodi.”

¹² Mme a ba fetola a re: “Nnyaya! Lo a aka, lo tlile go bona fa lefatshe le sa femelwang teng.”

¹³ Bone ba re: “Batlhanka ba gago ke ba le 12, re bomorwa motho, bomorwa motho a le mongwe wa kwa lefatsheng la Kanana. Yo mmotlana o setse le rraetsho, yo mongwe ga a tlhole a le teng.”

¹⁴ Josefa a ba raya a re: “Go ntse jaaka ke lo boleletse ka re: ‘Lo batlhodi!’

¹⁵ Se ke tla itseng nnete ya lona ka sona ke se: Ke ikana ka Farao! Ga lo ka ke lwa tloga mono, monnaa-lona a ise a tle kwano pele.

¹⁶ Romang mongwe wa lona, a ye go tsaya monnaa-lona, mme lona lo sale lo golegilwe, ke tle ke bone gore a lo ne lo bua nnete. Mme fa go se jalo – ruri ka Farao – lo batlhodi!”

¹⁷ Ke fa a ba tsenya mmogo mo kgolegong malatsi a le mararo.

¹⁸ Mme ka letsatsi la boraro Josefa a ba raya a re: “Dirang jaana, foo lo tla phela – gonne ke boifa Modimo.

¹⁹ Fa lo le batho ba nnete, a mongwe wa lona a sale a golegilwe mo ntlong ya kgolegelo e lo leng mo go yona, mme lona lo tsamae lo isetse tlala ya malapa a lona mabele.

²⁰ Fela lo tlise monnaa-lona kwano go nna. Foo mafoko a lona a tla itshupa, fa e le a nnete gore lo se ka lwa swa.” Mme ba utlwisisa.

²¹ Ke fa ba rerisanya ba re: “Re iteelwa molato o re leofetseng monnaa-rona ka ona. Gonne re ne ra bona tlalelo ya pelo ya gagwe, fa a re rapela, mme ra se ka ra mo utlwa. Ke ka moo re dirafaletsweng ke tlalelo e.”

²² Rubene a ba fetola a re: “A ga ke a ka ka lo bolelela ka re: ‘Se leofeleng ngwana,’ mme lwa gana go utlwa. Jaanong go batlwa madi a gagwe mo go rona.”

²³ Mme ba bo ba sa itse, fa Josefa a ba utlwa; gonne o ne a bua nabo ka mofetolapuo.

²⁴ Ke fa Josefa a ba hularela a ba tlogela, a lela; a ba a boela kwa go bone, a bua nabo, a tshwara Simeone, a mo ntsha mo go bone, a mo golega fa pele ga bone.

Bomogoloa Josefa ba boela kwa Kanana

²⁵ Jaanong Josefa a laela gore dikgetse tsa bone di tladiwe mabele, mme mongwe le mongwe a tsenyediwe madi a gagwe mo kgetseng ya gagwe, mme ba fiwe mfago. Ba direlwa jalo.

²⁶ Jaanong ba tsaya mabele a bone, ba a belesa mo dieseleng tsa bone, ba tsamaya.

²⁷ Mme ya re yo mongwe wa bone a bofolola kgetse ya gagwe go fa esele ya gagwe dijo ba le fa ba tla lalang teng, a fitlhela madi a gagwe a le mo molomong wa kgetse ya gagwe.

²⁸ A raya bomorwa-rraagwe a re: “Ba mpuseditse madi a me ke a, a mo kgetseng ya me.” Ke fa ba kgobega marapo, ba lebana, ba tshogile ba re: “Ke eng se Modimo o se re diretseng?”

²⁹ Jaanong ya re ba sena go goroga kwa gae kwa Kanana, ba bolelela Jakobe rraabo tsotlhe tse di ba dirafaletseng ba re:

³⁰ “Monna yo e leng molaodi wa lefatshe lele o buile ka bogale le rona, a re golega a re, gongwe re tsile go tlhola lefatshe lele.

³¹ Ra mo raya ra re: ‘Re batho ba nnete. Ga re batlhodi.

³² Re basimane ba le 12 fa lapeng, bana ba motho. Yo mongwe ga a tlhole a le teng. Yo mmotlana o setse le rraetsho kwa Kanana.’

³³ Ke fa monna yo e leng molaodi wa lefatshe lele a re raya a re: ‘Tlogelang mongwe wa lona fa go nna, lo tsamae, lo isetse tlala ya malapa a lona mabele; ke gona ke tla dumelang gore lo batho ba nnete.

³⁴ Lo bo lo boe lo tlise monnaa-lona kwano go nna. Foo ke tla dumela, fa lo se batlhodi, lo le batho ba nnete; mme ke tla lo busetsa morwa-rraeno gore lo tsamae mo lefatsheng le ka kgololesego.’ ”

³⁵ Jaanong ya re ba ntsha mabele mo dikgetseng, mongwe le mongwe a fitlhela sekgwama sa gagwe se na le madi a gagwe se le mo kgetseng. Ya re ba bona dikgwama tsa bone, ba boifa, bone le rraabo.

³⁶ Ke fa Jakobe rraabo a ba raya a re: “Lo nthukhutha bana. Josefa ga a tlhole a le teng. Simeone ga a tlhole a le teng. Jaanong lo rata go tsaya le Benyamene. Tsotlhe tseo di nkwela godimo.”

³⁷ Rubene a fetola rraagwe a re: “Mo nneele, ke tla boa nae; fa ke sa boe nae, o bolae bomorwaake ba babedi.”

³⁸ Mme a fetola a re: “Ga ke dumele gore morwaake a tsamae le lona. Gonne mogolowe o sule, go setse ene fela. Fa a ka welwa ke kotsi mo tseleng, lo ka folosetsa moriri o mobududu wa me kwa felong ga baswi ka botlhoko.”