Genese 29 - Setswana 1970

Jakobe o goroga kwa go Labane

¹ Jakobe a wela tseleng, a ya kwa lefatsheng la ba botlhabatsatsi.

² Ya re a lebaleba, a bona sediba mo nageng le matsomane a le mararo a bothile fa go sona. Gonne ba ne ba nosa matsomane ka go gelela mo sedibeng seo. Sediba sa bo se khurumetswe ka letlapa le legolo.

³ E ne e tle e re fa matsomane otlhe a sena go phuthegela teng, ba pitikolole letlapa, ba le tlose mo molomong wa sediba, ba nose matsomane; morago ba busetse letlapa gape mo mannong a lone mo molomong wa sediba.

⁴ Jaanong Jakobe a ba botsa a re: “Ba ga etsho, lo tswa kae?” Ba re: “Re tswa kwa Harane.”

⁵ A ba a ba botsa a re: “A lo itse Labane, morwa Nahore?” Ba re: “Re a mo itse.”

⁶ A ba botsa gape a re: “A o phela sentle?” Ba re: “Ee, o phela sentle. Le gona, bona, Ragele morwadie ke yole, o tla le dinku!”

⁷ Ke fa a re: “E sa le motshegare o mogolo. Ga e ise e be nako ya go phutha diruiwa. Nosang dinku, lo be lo ye lo di fudise.”

⁸ Ba re: “Re a palelwa, ka go ise go phuthege matsomane otlhe; fa badisa ba le mmogo, ba kgona go pitikolola letlapa, ba le tlosa mo molomong wa sediba, ke gona re tla nosang dinku.”

⁹ Ya re a sa ntse a bua nabo, Ragele a tla ka dinku tse e leng tsa ga rraagwe, gonne a ne a di disa.

¹⁰ Mme ya re Jakobe a bona Ragele, morwadia Labane malomaagwe le dinku tsa ga Labane malomaagwe, Jakobe a atamela, a pitikolola letlapa, a le tlosa mo molomong wa sediba, a nosa dinku tsa ga Labane, malomaagwe.

¹¹ Jakobe a ba a atla Ragele, a tsholetsa lentswe, a lela.

¹² Jakobe a ba a bolelela Ragele gore ke ene wa losika lwa ga rraagwe le gore ke ene morwa Rebeka. Ke fa Ragele a siana, a bolelela rraagwe.

¹³ Jaanong ya re Labane a utlwela Jakobe setlogolo sa gagwe, a taboga, a mo kgatlhantsha, a mo tlamparela, a mo atla, a mo isa kwa lapeng la gagwe, mme ene a bolelela Labane tsotlhe tse di mo diragaletseng.

¹⁴ Ke fa Labane a raya Jakobe a re: “Ruri, o lesapo la me le nama ya me.” Jaanong Jakobe a nna kgwedi e le nngwe nae.

Jakobe o direla Labane ka ntlha ya ga Ragele le Lea

¹⁵ Ke fa Labane a raya Jakobe a re: “Fa o le wa ga etsho, a o ka ntirela fela? Mpolelele gore tuelo ya gago e ka nna eng?”

¹⁶ Jaanong Labane o ne a na le bomorwadie ba le babedi, leina la yo mogolo e le Lea, la yo mmotlana e le Ragele.

¹⁷ Lea o ne a le matlho a a fokolang, mme Ragele a bopegile sentle, a le montle thata.

¹⁸ Ya re ka Jakobe a rata Ragele, a araba a re: “Ke tla go direla dinyaga tse supa ka ntlha ya ga Ragele, morwadio yo mmotlana.”

¹⁹ Labane a re: “Go molemo, fa ke mo naya wena, e seng monna o sele. Nna le nna.”

²⁰ Jakobe a mo direla jalo dinyaga tse supa ka ntlha ya ga Ragele. Tsa nna mo go ene jaaka e kete ke malatsinyana fela, ka gonne o ne a mo rata.

²¹ Jaanong Jakobe a raya Labane a re: “Mphe mosadi wa me, gonne malatsi a me a go direla bogadi a fedile gore ke mo nyale.”

²² Ke fa Labane a laletsa batho botlhe ba felo foo, a dira moletlo.

²³ Mme ya re go le maitsiboa, a tsaya morwadie Lea, a mo isa kwa go ene, mme Jakobe a tsena mo go ene.

²⁴ Labane a ntsha Silepa, lelata la gagwe, a mo neela Lea morwadie go nna lelata la gagwe.

²⁵ Ya re mo mosong Jakobe a fitlhela e le Lea, a raya Labane a re: “Ke eng se o se ntiretseng? A ga ke a go direla ka ntlha ya ga Ragele? O ntsieleditseng?”

²⁶ Labane a mo araba a re: “Ga se mokgwa wa rona go ka nyadisa yo mmotlana pele ga yo mogolo.

²⁷ Fetsa beke ya moletlo le yo, foo re tla go naya yole le ene ka ntlha ya tirelo e o tla e ntirelang dinyaga tse supa tse dingwe gape.”

²⁸ Jakobe a dira jalo, a fetsa beke nae. Ke fa Labane a mo naya Ragele morwadie go nna mosadi wa gagwe.

²⁹ Le gona Labane a ntsha Bileha, lelata la gagwe, a mo neela Ragele morwadie go nna lelata la gagwe.

³⁰ Jakobe a tsena le kwa go Ragele, mme a mo rata bogolo go Lea. A mo direla dinyaga tse dingwe tse supa gape.

Bana ba ga Jakobe

³¹ Ya re Morena a bona, fa Lea a nyadiwa, a mo naya bana, mme Ragele a nna moopa.

³² Lea a nna moimana, a tshola ngwana wa mosimane, a mo taya leina la Rubene. Gonne a re: “Morena o bonye pogisego ya me. Jaanong monna wa me o tla nthata.”

³³ A ithwala gape, a tshola ngwana wa mosimane a re: “Morena o utlwile, fa ke sa ratiwe; ke ka moo o mphileng le ene yo.” A mo taya leina la Simeone.

³⁴ A nna moimana gape, a tshola ngwana wa mosimane a re: “Jaanong monna wa me o tla nkgomarela, gonne ke mo tsaletse basimane ba le bararo.” Ka moo a mo taya leina la Lefi.

³⁵ A nna moimana gape, a tshola ngwana wa mosimane a re: “Kajeno ke tla baka Morena.” Ka moo a mmitsa Juta. Jaanong a ema go belega.