Genese 11 - Setswana 1970

Kago e e godimodimo ya kwa Babele

¹ Pele lefatshe lotlhe la bo le na le puo e le nngwe fela le mafoko a le mangwe fela.

² Mme ya re ba hudugela kwa ntlheng ya botlhabatsatsi, ba fitlhela lebala mo lefatsheng la Sineare, ba aga teng.

³ Ke fa ba raana ba re: “A re yeng re bope diekana, re di bese, di butswe!” Diekana tse e ne e le matlapa a bone, boka jwa mmu e le seretse sa bone sa go aga.

⁴ Ba re: “Tlayang a re ikageleng motse le kago e e godimo e setlhoa sa yona se fitlhang kwa legodimong gore re itirele leina le le tumileng, e se re gongwe ra phatlalala mo lefatsheng lotlhe.”

⁵ Ke fa Morena a fologa gore a bone motse oo le kago e e godimo eo, tse batho ba di agang.

⁶ Jaanong Morena a re: “Ruri, botlhe ke morafe o le mongwe fela wa puo e le nngwe fela. Selo se ke tshimologo ya tiro ya bone. Go tloga fa ga ba nke ba palelwa ke sepe se ba se akanyang.

⁷ Tlayang a re fologeleng teng, re tlhakatlhakanye puo ya bone gore ba se ka ba utlwana ka puo.”

⁸ Morena a ba phatlalatsa fa ba ne ba le teng, a ba falaletsa kwa dinageng tsotlhe tsa lefatshe. Ba khutla jalo go aga motse oo.

⁹ Ke ka moo o teilweng leina la Babele; gonne teng koo Morena o tlhakatlhakantse puo ya batho botlhe, Morena a ba falatsa le dinaga tsotlhe tsa lefatshe go tswa teng.

Losika lwa ga Seme

¹⁰ Ba losika lwa ga Seme ke ba: Ya re Seme a le dinyaga di le 100, a tsala Arephagasadi, dinyaga di le pedi morago ga morwalela.

¹¹ Ya re Seme a sena go tsala Arephagasadi, a phela dinyaga di le 500, a ntse a tsala bomorwa le bomorwadi.

¹² Arephagasadi o ne a phedile dinyaga di le 35 fa a tsala Sela.

¹³ Mme ya re Arephagasadi a sena go tsala Sela, a phela dinyaga di le 403, a ntse a tsala bomorwa le bomorwadi.

¹⁴ Sela o ne a phedile dinyaga di le 30, fa a tsala Hebere.

¹⁵ Mme ya re Sela a sena go tsala Hebere, a phela dinyaga di le 403, a ntse a tsala bomorwa le bomorwadi.

¹⁶ Hebere o ne a phedile dinyaga di le 34, fa a tsala Phelege.

¹⁷ Mme ya re Hebere a sena go tsala Phelege, a phela dinyaga di le 430, a ntse a tsala bomorwa le bomorwadi.

¹⁸ Phelege o ne a phedile dinyaga di le 30 fa a tsala Rehu.

¹⁹ Mme ya re Phelege a sena go tsala Rehu, a phela dinyaga di le 209, a ntse a tsala bomorwa le bomorwadi.

²⁰ Rehu o ne a phedile dinyaga di le 32 fa a tsala Seruge.

²¹ Mme ya re Rehu a sena go tsala Seruge, a phela dinyaga di le 207, a ntse a tsala bomorwa le bomorwadi.

²² Seruge o ne a phedile dinyaga di le 30 fa a tsala Nahore.

²³ Mme ya re Seruge a sena go tsala Nahore, a phela dinyaga di le 200, a ntse a tsala bomorwa le bomorwadi.

²⁴ Nahore o ne a phedile dinyaga di le 29 fa a tsala Thara.

²⁵ Mme ya re Nahore a sena go tsala Thara, a phela dinyaga di le 119, a ntse a tsala bomorwa le bomorwadi.

²⁶ Thara o ne a phedile dinyaga di le 70 fa a tsala Aborame le Nahore le Harane.

Losika lwa ga Thara

²⁷ Ba losika lwa ga Thara ke ba: Thara o ne a tsala Aborame le Nahore le Harane, Mme Harane a tsala Lote.

²⁸ Mme Harane a swa pele ga rraagwe mo lefatsheng le a tsaletsweng mo go lone, kwa motseng wa Ure wa Kalatea.

²⁹ Ke fa Aborame le Nahore ba tsaya basadi: Leina la mosadi wa ga Aborame ke Sarai; leina la mosadi wa ga Nahore ke Mileka, morwadia Harane, yo e leng rraagwe Mileka le Iseka.

³⁰ Sarai ene e ne e le moopa, a se na ngwana.

³¹ Jaanong Thara a tsaya Aborame morwawe, le Lote morwa Harane, morwa morwawe, le Sarai ngwetsi wa gagwe, mosadi wa ga Aborame morwawe, a huduga nabo, a tloga kwa Ure wa Kalatea, a re o ya kwa lefatsheng la Kanana; mme ba fitlha fela kwa Harane, ba aga teng.

³² Jaanong Thara a swela kwa Harane, a le dinyaga di le 205.