Esere 8 - Setswana 1970

Maina a ba ba boileng le Esera le leeto la bone

¹ Fano go bolelwa ditlhogo tsa dikgoro tsa bone ba ba ileng le nna, ba tloga kwa Babele pusong ya ga Arethašasetha kgosi le ditshika tsa bone:

² Oora Phinehase ke Geresone, oora Ithamare ke Daniele, oora Dafita ke Hatuse,

³ morwa Seganya; oora Pharoše ke Sagaria, mme go kwadilwe nae banna ba le 150 mo lokwalong lwa losika.

⁴ Oora Phahathe-Moabe ke Elihoenai morwa Seragia a na le banna la le 200.

⁵ Oora Sathu ke Seganya, morwa Jahasiele, a na le banna ba le 300.

⁶ Oora Adine ke Ebete, morwa Jonathane, a na le banna ba le 50.

⁷ Oora Elame ke Jesaya, morwa Athalea, a na le banna ba le 70.

⁸ Oora Sefatya ke Sebatya, morwa Migaele, a na le banna ba le 80.

⁹ Oora Joabe ke Obatya, morwa Jehiele, a na le banna ba le 218.

¹⁰ Oora Bani ke Selomithe, morwa Josifia, a na le banna ba le 160.

¹¹ Oora Bebai ke Sagaria, morwa Bebai, a na le banna ba le 28.

¹² Oora Asekate ke Johanane, morwa Hakatane, a na le banna ba le 110.

¹³ Ba bofelo ba ga gabo Atonikame ba maina a bone e leng Elifelete le Jehiele le Semaya ba na le banna ba le 60.

¹⁴ Boora Bigwai ke Uthai le Sabute ba na le banna ba le 70.

Esera o batla Balefi ba Tempele

¹⁵ Ka ba phuthela kwa nokeng e e elelang kwa Ahawa, ra thibelela teng malatsi a le mararo. Mme ya re ke ela morafe le baperesiti tlhoko, ka fitlhela go se na ope wa Balefi teng.

¹⁶ Ka ba ka roma Eliesere le Ariele le Semaya le Elenathane le Jaribe le Elenathane le Nathane le Sagaria le Mesulame, ditlhogo; le Joyaribe le Elenathane, baruti.

¹⁷ Ka ba laela go ya kwa go Ito, tlhogo felong ga Kasifia, ka tsenya mafoko mo melomong ya bone gore ba a bue le Ito le ba ga gabo, batlhanka ba Tempele felong ga Kasifia gore ba re tlisetse badiredi ba Ntlo ya Modimo wa rona.

¹⁸ Mme ka letsogo le le molemo la Modimo wa rona le ne le re okame, ba re tlisetsa banna ba ba tlhalefileng boora Magedi morwa Lefi morwa Iseraele e bong Serebja le bomorwawe le bomorwa-rraagwe ba le 18 mmogo;

¹⁹ le Hasabja o na le Jesaya boora Merari le bomorwa-borraabo le bomorwaa-bone ba le 20 mmogo;

²⁰ le ba le 220 ba batlhanka ba Tempele ba ba neng ba beilwe ke Dafita le dikgosana gore ba direle Balefi; bone botlhe ba ne ba boletswe ka maina.

²¹ Ka ba ka tlhaba mokgosi wa go itima dijo fa nokeng ya Ahawa gore re ikokobetse fa pele ga Modimo wa rona le go kopa leeto le le tlhogonolo la rona le la ba malapa a rona le la di-tsa-rona tsotlhe.

²² Gonne ke ne ke tlhajwa ke ditlhong go ka kopa mophato wa batlhabani le bapalami ba dipitse mo kgosing gore ba re thuse ka go tlhabana le mmaba mo tseleng, ka re ne re reile kgosi ra re: “Letsogo la Modimo wa rona le okametse botlhe ba ba o batlang go ba direla molemo, mme thata ya ona le bogale jwa ona di wela botlhe ba ba o tlogelang.”

²³ Ra itima dijo jalo, ra kopa tseo mo Modimong wa rona, mme wa re utlwa.

Dineo tse di ntsheditsweng Tempele

²⁴ Ka ba ka tlhaola banna ba le 12 mo ditlhogong tsa baperesiti, e bong Serebja le Hasabja ba ne le ba le some ba bomorwa-borraabo;

²⁵ ka ba lekanyetsa selefera le gouta le dilwana, e le tse di ntsheditsweng Ntlo ya Modimo wa rona, di ntshitswe ke kgosi le banna ba lekgotla la yona le dikgosana tsa yona le Baiseraele botlhe ba ba leng teng.

²⁶ Ka ba ka lekanyetsa mo diatleng tsa bone ditalente di le 650 tsa selefera le dilwana tsa selefera tsa ditalente di le 100 le ditalente di le 100 tsa gouta

²⁷ le dinwelo tsa gouta di le 20 tsa tlhwatlhwa ya diranta di le 2 000 le dilwana di le pedi tsa kgotlho tse di pila tsa bosetlha jwa gouta tse di tlhokegang jaaka gouta.

²⁸ Ka ba raya ka re: “Lona lo itshepetse Morena le dilwana di boitshepo le selefera le gouta ke tse di ntsheditsweng Morena, Modimo wa borraeno, ka boitumelelo.

²⁹ Di tlhokomeleng, lo di dise go ya go fitlhelela lo di lekanyetsa ba bagolo ba baperesiti le Balefi le dikgosana tsa dikgoro tsa Baiseraele kwa Jerusalema mo matlwaneng a polokelo a Ntlo ya Morena.”

³⁰ Ke fa baperesiti le Balefi ba amogela selefera le gouta le dilwana tse di lekantsweng go di isa kwa Jerusalema kwa Ntlong ya Modimo wa rona.

Bajuta ba goroga kwa Jerusalema

³¹ Jaanong ra tloga kwa nokeng ya Ahawa ka letsatsi la 12 la kgwedi ya ntlha go ya kwa Jerusalema; mme letsogo la Modimo wa rona le ne le re okame, wa re namolela mo diatleng tsa mmaba le tsa molaledi mo tseleng.

³² Ra ba ra fitlha kwa Jerusalema, ra nna teng malatsi a le mararo.

³³ Mme ka letsatsi la bone ra lekanyetsa selefera le gouta le dilwana kwa Ntlong ya Modimo wa rona, ra di neela Meremothe morwa Uria, a na le Eleasare morwa Phinehase, ba e leng baperesiti, ba na le Josabate morwa Jesua le Noatya morwa Binui, Balefi;

³⁴ e le ka fa palong le ka fa boketeng jwa sengwe le sengwe; ga kwalwa bokete bongwe le bongwe. Ka sebaka seo

³⁵ batshwarwi ba ba neng ba boile kwa botshwarong ba tlisetsa Modimo wa Iseraele ditlhabelo tsa phiso, e bong dipoo di le 12 ka ntlha ya Baiseraele botlhe le diphelehu di le 96 le dikwana di le 77 le diphoko tsa ditlhabelo tsa maleo di le 12 – tsotlhe e le ditlhabelo tsa phiso tsa Morena.

³⁶ Mme ditaelo tsele tsa lokwalo lwa kgosi ba di neela babusi ba bagolo ba kgosi le balaodi ba ba neng ba le ntlheng ya bophirimatsatsi ya noka ya Ferathe, mme bone ba thusa morafe le Ntlo ya Modimo.