Esekiele 21 - Setswana 1970

Tšhaka ya Bakalatea e tla bolaya ba Jerusalema le Baamone

¹ Ke fa Lefoko la Morena le tla kwa go nna le re:

² “Morwa-motho, lebisa sefatlhego sa gago kwa Jerusalema, o rerele Felo-fa-go-Boitshepo, o bolelele pele ka ga naga ya Iseraele.

³ Raya naga ya Iseraele o re: ‘Morena o bua jaana a re: Bona, ke tla lwa nao, ke somola tšhaka ya me mo kgatleng ya yona, ke nyeletsa basiami le baikepi mo go wena.

⁴ Jaanong e re ka ke rata go nyeletsa basiami le baikepi mo go wena, tšhaka ya me e tla somoga mo kgatleng ya yona go bolaya batho botlhe go tswa kwa borwa go ya kwa bokone.

⁵ Batho botlhe ba tla lemoga fa e le nna Morena ke somotseng tšhaka ya me mo kgatleng ya yona; ga e nke e tlhola e somelwa.’

⁶ “Mme wena morwa-motho, fegelwa! Fegelwa fa pele ga matlho a bone o obegile letheka ka bogalaka.

⁷ Jaanong morwa motho, fa ba go botsa ba re: ‘Ke ka ntlhaang, fa o fegelwa jalo?’ o ba ree o re: ‘Ke ka ntlha ya kitsiso.’ Fa go dirafala, go tla tlhoboga dipelo tsotlhe, go repa mabogo otlhe, go solofologa mewa yotlhe, go koafala mangole otlhe jaaka metsi. Bonang, go e tla, go a dirafala, go bua Morena Modimo.”

⁸ Lefoko la Morena la ba la tla kwa go nna la re:

⁹ “Morwa-motho, rera o re: ‘Morena o bua jaana a re: “ ‘Tšhaka, tšhaka e looditswe, e bile e gotlhilwe!

¹⁰ E looditswe gore e bolae thata; e gotlhilwe gore e phatsime jaaka tladi. Re ka itumela jang? Morwaaka, o nyaditse thupa le kgakololo nngwe le nngwe.

¹¹ A e neela go gotlhiwa le go tshwarwa ka seatla; tšhaka e looditswe, e gotlhilwe gore e neelwe mo seatleng sa mmolai.

¹² Goa, o bokolele, wena morwa-motho, gonne e tla bolaya morafe wa me le dikgosana tsotlhe tsa Iseraele; di neetswe mo tšhakeng mmogo le morafe wa me. Ka moo o itshware seledu.

¹³ Gonne teko e teng. E ka tlhokafala jang, ka o nyaditse thupa?’ ” go botsa Morena Modimo.

¹⁴ “Wena morwa-motho, rera o ope diatla: Tšhaka e tla tla gabedi gongwe gararo; ke tšhaka ya baheitane, ke tšhaka ya moheitane yo mogolo e e ba dikanyetsang

¹⁵ gore dipelo di tlhoboge, mme babolawi e nne ba bantsi mo dikgorong tsotlhe tsa bone. Ke rometse polao ya tšhaka. Ijoo! E dirilwe jaaka tladi; e looditswe gore e bolae.

¹⁶ Wena tšhaka, rema mo ntlheng ya le le jang, ò tlhasele, ò be ò reme mo ntlheng ya la molema, kwa bogale jwa gago bo laetsweng teng.

¹⁷ Le nna ke tla opa diatla, ke kgorisa kgalefo ya me. Nna Morena ke bua jalo.”

Tšhaka ya kgosi ya Babele

¹⁸ Lefoko la Morena la ba la tla kwa go nna la re:

¹⁹ “Wena morwa-motho, thala ditsela di le pedi tse di tswang mo lefatsheng le le lengwe ka bobedi jwa tsona gore tšhaka ya kgosi ya Babele e tle ka tsona. Le gona tlhoma mosupa-tsela, fa ditsela di kgaoganang teng, o o supang metse kwa di yang teng,

²⁰ gore tšhaka e ye kwa Raba wa Baamone le kwa Juta, kwa Jerusalema yo o femetsweng.

²¹ Gonne kgosi ya Babele e eme kwa makgaoganong a ditsela, fa ditsela tse pedi di simologang teng go batla lesedi ka boitseanape. E kgotlokgotsa metsu, e botsa ditaola, e laola ka sebete sa setlhabelo.

²² Jaanong e tshwere tengwa ka seatla se se jang e e supileng Jerusalema gore batlhabani ba atlhame go tlhaba mokgosi, ba tlhatlose mantswe go biletsa tlhabanong, ba emise dithula-lobota go tlhasela dikgoro, ba kgobokanyetse mmu fa loboteng, ba age dikago tsa tlhaselo.

²³ Mme ba Jerusalema ba ba ikanang maikano, ba tloge ba a senye, ba tla re: ‘Ke tengwa e e maaka.’ Fela Modimo o gopola molato wa bone gore ba tle ba tshwarwe.

²⁴ Ke ka moo Morena Modimo o buang jaana o re: ‘Lo tla tshwarwa, ka lo gopolwa; lo nkgopotsa molato wa lona ka maleo a lona a a bonalang, mme dibe tsa lona di bonwa mo ditirong tsotlhe tsa lona.

²⁵ “ ‘Wena kgosi ya Iseraele, yo o leng moikepi le mosenyi, letsatsi la gago la petso ya bofelo le tlile.

²⁶ Morena Modimo o bua jaana o a re: Tlosa tlhoro ya borena, rola serwalo sa bogosi. Tseo ga se tsa sepe. A go godisiwe tse di kwa tlase! A go kokobediwe tse di godileng!

²⁷ Motse ke tla o fetola dithotobolo fela. A tatlhego ya ona wee! O tla nna jalo go fitlhelela go tle ene yo o nang le tshwanelo, yo ke tla o mo neelang.’

Tšhaka e bolaya Baamone

²⁸ “Wena morwa-motho, rera o re: ‘Morena Modimo o bua jaana ka ga Baamone le go kgoba ga bone! O re: “ ‘Tšhaka e somotswe, tšhaka e gotlhetswe polao gore e phatsime jaaka tladi.

²⁹ “ ‘Baitseanape ba lo bonela pono ya tsietso, ba lo dupela maaka – e le go e baya mo melaleng ya baikepi ba e leng baheitane; letsatsi la bone la petso ya bofelo le tlile.

³⁰ “ ‘Wena Amone, somela tšhaka mo kgatleng ya yona. Ke tla go atlhola mo felong fa o tlhodilweng teng mo lefatsheng la tlhago ya gago.

³¹ Ke tla goromeletsa kgalefo ya me mo go wena; ke go budulela molelo wa bogale jwa me; ke go neela mo diatleng tsa banna ba ba setlhogo, ba e leng bagale ba go senya.

³² O tla nna dijo tsa molelo. Madi a gago a tla tshololelwa mo lefatsheng. Ga o kitla o gopolwa, gonne nna Morena ke buile jalo.’ ”