Esekiele 19 - Setswana 1970

Selelo ka ga dikgosi Joahase le Joyagine le Setekia

¹ “Mme wena, tlhaba mokgosi wa selelo ka ga babusi ba Iseraele

² o re: “ ‘Kana mmaago e ne e le tau e namagadi mo gare ga ditau; a botha mo gare ga ditawana, a godisa bana ba gagwe.

³ A godisa mongwe wa bana ba gagwe, ya nna tawana; ya ithuta go garola se e se tshwereng, ya ja batho.

⁴ Ke fa ditšhaba di e tlhabela mokgosi go e tsoma; tsa e tshwara ka gopo ya tsona; tsa e isa kwa lefatsheng la Egepeto e golegilwe.

⁵ Jaanong ya re mmaayo a bona gore o letetse lefela, mme tsholofelo ya gagwe e nyelela, a tsaya yo mongwe wa bana ba gagwe, a mo dira tawana.

⁶ Ya itsamaela mo gare ga ditau, ya nna tawana; ya ithuta go garola se e se tshwereng, ya ja batho.

⁷ Ya senya matlo a borena a bone, ya fetola metse ya bone marope; lefatshe le tsotlhe tse di mo go lone tsa rerega ka modumo wa yona.

⁸ Ke fa ditšhaba tse di mo tikologong di e phuthegela go e tsoma, di tswa mo mafatsheng a tsona, tsa e tsharololela letloa la tsona, ya tshwarwa mo gopong ya tsona.

⁹ Tsa e tsenya mo serobing ka dikgole, tsa e isa kwa kgosing ya Babele, ya ya mo kgolegelong, gore modumo wa yona o se ka wa tlhola o utlwala mo dithabeng tsa Iseraele.

¹⁰ E rile o tsalwa, mmaago a tshwana le moweine o o tlhomilweng fa metsing; wa ungwa, wa tlhoga dikala sentle ka ntlha ya metsi a mantsi.

¹¹ Wa tlhoga kala e e tiileng, e e ka nnang tsamma ya bogosi; ya golela kwa godimo mo gare ga dikala; ya itshupa ka bogolo jwa yona le ka dikalana tsa yona.

¹² Mme wa kumolwa kgalefong, wa digelwa fa fatshe; phefo ya botlhabatsatsi ya o swabisa; maungo a ona a phamolwa; kala e e tiileng ya ona ya swaba, ya jewa ke molelo.

¹³ Mme jaanong o tlhomilwe mo sekakeng, mo nageng e e lokgere ya lenyora.

¹⁴ Molelo wa tswa mo kaleng ya ona, wa ja dikalana tsa ona le maungo a ona; wa bo o se na kala e e tiileng go ka nna tsamma ya bogosi.’ ” Ke mokgosi wa selelo, wa ba wa nna sefela sa selelo.