Esekiele 10 - Setswana 1970

Kgalalelo ya Modimo e e mo godimo ga boKerubime

¹ Ka leba, ka bona mo loaping lo lo okameng ditlhogo tsa boKerubime go le se se tshwanang le lentswe le letala la safire; sengwe se e keteng ke sedulo sa bogosi se bonala godimo ga bone.

² Morena a raya monna yole yo o apereng lesela a re: “Tsena mo gare ga maotwana fa tlase ga boKerubime, o tabole magala a a tukang mo gare ga boKerubime ka diatla tsoo pedi, o a gasetse mo motseng.” Mme ka mmona a tsena.

³ Jaanong ya re monna yole a tsena, boKerubime ba bo ba eme mo ntlheng ya le le jang ya Ntlo; leru la bo le tletse mo lapeng la ka fa teng.

⁴ Kgalalelo ya Morena ya tloga mo go boKerubime, ya ya kwa serepoding sa Ntlo. Ntlo ya ba ya tlala musi, lelapa lone la tlala phatsimo ya kgalalelo ya Morena.

⁵ Mosumo wa diphuka tsa boKerubime wa utlwala go fitlha kwa lapeng la ka fa ntle jaaka lentswe la Modimo, Mothatayotlhe, fa o bua.

⁶ Jaanong ya re o sena go laela monna yole yo o apereng lesela wa re: “Tsaya molelo mo gare ga maotwana, mo gare ga boKerubime!” a tsena, a ema fa thoko ga leotwana.

⁷ Ke fa Kerubime mongwe a ntsha letsogo, a le tsenya mo gare ga boKerubime, a le isa kwa molelong o o mo gare ga boKerubime, a tsaya magala, a a neela mo diatleng tsoo pedi tsa yo o apereng lesela; ene a a amogela, a tswa.

⁸ Mo go boKerubime seatla se e keteng sa motho se ne se bonala, se tswa ka fa tlase ga diphuka tsa bone.

⁹ Ya re ke leba, ka fitlhela maotwana a le mane a le fa thoko ga boKerubime; leotwana lengwe le lengwe le bapile le Kerubime wa lone. Ponalo ya maotwana e ne e tshwana le go tsabakela ga taemane e tala.

¹⁰ A ne a bopegile ka go tshwana ka bone jwa ona; e kete leotwana le ne le le mo teng ga leotwana le lengwe.

¹¹ E ne e ya re fa a tsamaya, a itse go ya kwa ntlheng tse nne tsa ona; a se ke a retologe, fa a tsamaya. Gonne kwa leotwana la ntlha le lebileng teng, a mangwe a le sale morago; a ne a sa sokologe, fa a tsamaya.

¹² Mebele yotlhe ya bone le metlhana ya bone le mabogo a bone le diphuka tsa bone le maotwana di ne di tletse matlho mo ntlheng tse nne tsa teng.

¹³ Ka utlwa maotwana a bidiwa sefefo.

¹⁴ Sephedi sengwe le sengwe se ne se na le difatlhego di le nne; sefatlhego sa ntlha e le sa Kerubime, sa bobedi e le sa motho, sa boraro e le sa tau, sa bone e le sa ntsu.

¹⁵ Ke fa boKerubime ba tlhatloga. Ke tsona diphedi tse nkileng ka di bona kwa nokeng ya Kebare.

¹⁶ E a re fa boKerubime ba tsamaya, maotwana le one a tsamae a bapile nabo; fa boKerubime ba tsharolola diphuka tsa bone go tlhatloga mo lefatsheng, maotwana ona a se ke a tloge fa thoko ga bone.

¹⁷ E re fa ba ema, le ona a eme; fa ba tlhatloga, le ona a tlhatloge nabo. Gonne mowa wa diphedi o ne o le mo go ona.

¹⁸ Kgalalelo ya Morena ya tlogela serepodi sa Ntlo, ya ya go okama boKerubime.

¹⁹ Ke fa boKerubime ba tsholetsa diphuka, ba tlhatloga mo lefatsheng, ke ntse ke lebile; ya re ba tloga, maotwana a ya nabo. Ba ya ba ema kwa mojakong wa kgoro ya Ntlo ya Morena e e lebileng kwa botlhabatsatsi, kgalalelo ya Modimo wa Iseraele e ntse e ba okame.

²⁰ Ke tsona diphedi tse nkileng ka di bona fa tlase ga Modimo wa Iseraele kwa nokeng ya Kebare; ka lemoga gore ke boKerubime.

²¹ Mongwe le mongwe o ne a na le difatlhego tse nne, e bile a na le diphuka tse nne; diatla tse e keteng ke tsa motho di ne di le ka fa tlase ga diphuka tsa bone.

²² Difatlhego tsa bone di ne di tshwana tota le difatlhego tse nkileng ka di bona kwa nokeng ya Kebare. Fa e le ponalo ya bone le maikaelelo a bone, mongwe le mongwe a tlhamalalela kwa a lebileng teng.