Ekesodo 15 - Setswana 1970

Sefela sa tebogo sa Baiseraele

¹ Ka sebaka seo Moše le Baiseraele ba opelela Morena sefela, ke se, ba se tlhaba ba re: “A nke ke opelele Morena, gonne o mogolo thata. Dipitse o di latlhetse mo lewatleng le bapalami ba tsona.

² Morena ke thata ya me le sefela sa me; ene e ne e le thuso ya me. Ke ene Modimo wa me, ke tla mo tumisa; ke Modimo wa ga rre, ke tla mo godisa.

³ Morena ke mogale tlhabanong; leina la gagwe ke Morena.

⁴ O digetse dikoloi tsa ga Farao le mephato ya gagwe mo lewatleng; bagale ba ba tlhaotsweng ba gagwe o ba nweditse mo Lewatleng la Motlhaka.

⁵ Dintelo di ba khurumeditse, ba fologela madibeng jaaka majwe.

⁶ Morena, letsogo le le jang la gago le galaleditswe ka thata; Morena, letsogo le le jang la gago le tšhwetlakanya baba.

⁷ Ba ba go tsogelang o ba diga ka borena jo bogolo jwa gago; o tukisa bogale jwa gago, bo ba ja jaaka dirite.

⁸ Metsi a ne a kgobokanngwa ka pudulo ya dinko tsa gago, dintelo tsa ema jaaka lobota; madiba a thema mo gare ga lewatle.

⁹ Mmaba a re: ‘Ke tla ba latela, ke ba tshwara, ke aba thopo, ke kgorisa keletso ya me ka bone; ke tla somola tšhaka, ke ba nyeletsa ka letsogo la me.’

¹⁰ Mme ya re o budula ka phefo ya gago, lewatle la ba khurumetsa; ba rôrômela mo metsing a magolo jaaka tshipi.

¹¹ Morena, ke mang mo medimong yo o tshwanang le wena? Ke mang yo o galaleditsweng ka boitshepo, yo o boitshegang ka ditiro tse di bokwang, yo o dirang dikgakgamatso jaaka wena?

¹² E rile o otlolola letsogo le le jang, lefatshe la ba metsa.

¹³ Ka bopelotlhomogi jwa gago o gogile morafe o ò o rekolotseng, wa o isa kwa felong fa go boitshepo ga gago, ka thata ya gago.

¹⁴ E rile merafe e utlwela jalo, ya roroma; metlotsedi ya tshwara baagi ba Felesita.

¹⁵ Foo dikgosana tsa Etomo tsa tshoga, teteselo ya wela beng ba thata ba Moabe; baagi botlhe ba Kanana ba roroma.

¹⁶ Poifo ya ba wela le therego, ba tlhoka puo jaaka lefika ka ntlha ya bogolo jwa letsogo la gago; go fitlhelela morafe wa gago o fete, Morena; go fitlhelela morafe o ò o rekolotseng o fete.

¹⁷ O tla ba fitlhisa, o ba baya mo thabeng e e leng ya gago, Morena, mo felong fa o go ipaakanyeditseng go nna gona; mo felong fa go boitshepo, fa go etleeditsweng ke diatla tsa gago, Morena.

¹⁸ Morena o tla busa ka gale le ka bosakhutleng.”

Sefela sa ga Miriame

¹⁹ Gonne go tsenye dipitse tsa ga Farao le dikoloi tsa gagwe le bapalami ba tsona mo lewatleng, mme Morena a busa metsi a lewatle; ona a ba khurumetsa. Mme Baiseraele ba tsamaya fa go omeletseng, fa ba tshela lewatle.

²⁰ Le Miriame, moporofeti wa sesadi, kgaitsadia Arone, a tsaya moropana ka letsogo; basadi botlhe ba tswa, ba mo sala morago ba tshotse meropana, ba ntse ba bina.

²¹ Mme Miriame a ba tlhabela sefela a re: “A re bakeng Morena, gonne o mogolo thata. O digetse dipitse le bapalami ba tsona mo lewatleng.”

Metsi a kwa Mara

²² Jaanong Moše a tsweletsa Baiseraele pele, ba tloga kwa Lewatleng la Motlhaka ba ya kwa sekakeng sa Sure; ba sepela malatsi a le mararo ba sa bone metsi.

²³ Ya re ba fitlha kwa Mara, ba palelwa ke go nwa metsi a teng; gonne a ne a galaka. Ke ka moo leina la felo foo go tweng Mara.

²⁴ Mme batho ba ngongoregela Moše ba re: “Re tla nwa eng?”

²⁵ Jaanong ya re ene a goela kwa Moreneng, Morena a mo supetsa setlhatshana sengwe; ya re a sena go se latlhela mo metsing, metsi a nna monate. Gona foo a ba beela melao le dikaelo, foo a ba leka

²⁶ a re: “Fa ò utlwa lentswe la Morena Modimo wa gago ka boikanyo, o dira tse di siameng mo matlhong a gagwe, o sekegela ditaolo tsa gagwe tsebe, o tshegetsa melao yotlhe ya gagwe, ga nkitla ke go bolaisa bolwetse bope jo ke watlhaileng Baegepeto ka jona. Gonne nna Morena ke tla nna ngaka ya gago.”

²⁷ Morago ga moo ba fitlha kwa Elime, fa go neng go le metswedi e le 12 le ditlhare tsa mekolane di le 70. Ba thibelela teng fa metsing.