Ekesodo 13 - Setswana 1970

Maitibolo a Baiseraele a itshepela Morena

¹ Morena a ba a bua le Moše a re:

² “Ntlhaolele maitibolo otlhe; sengwe le sengwe se mmaaso a itibolang ka sona, ke sa me mo bathong le mo diruiweng.”

Moletlo wa Dinkgwe tse di sa bedisiwang

³ Mme Moše a raya morafe a re: “Gakologelwang letsatsi le lo duleng mo Egepeto mo ntlong ya botlhanka ka lone. Gonne Morena o lo ntshitse mono ka letsogo le le tiileng. Ka moo a go se ka ga jewa tse di bedisitsweng.

⁴ Lo huduga kajeno mo kgweding ya Abibi.

⁵ Mme e re fa Morena a sena go lo fitlhisa mo lefatsheng la Bakanana le Bahethe le Baamori le Bahewi le Bajebusi le o le ikanetseng borraeno a re, o tla le lo naya, e le lefatshe le le elang mašwi le dinotshe, foo lo tshware tirelo e ka kgwedi e.

⁶ Lo je dinkgwe tse di sa bedisiwang ka malatsi a supa; mme letsatsi la bosupa e nne la moletlo wa Morena.

⁷ A go jewe dinkgwe tse di sa bedisiwang ka malatsi a supa. A go se ka ga bonwa tse di bedisitsweng mo go lona; le gona a go se ka ga bonwa letlhabego lepe mo lefatsheng lotlhe la lona.

⁸ Lo bolelele bomorwa-lona ka letsatsi leo lo re: ‘Ke ka ntlha ya tsona tse Morena o di re diretseng jale fa re huduga kwa Egepeto.’

⁹ A moletlo o e nne sesupo sa lona mo diatleng tsa lona, le segopotso fa gare ga matlho a lona gore molao wa Morena o nne mo melomong ya lona; gonne Morena o lo ntshitse mo Egepeto ka letsogo le le thata.

¹⁰ Tshegetsang molao o ka sebaka sa ona ka ngwaga mongwe le mongwe.

¹¹ “Jaanong e re Morena a se na go lo fitlhisa mo lefatsheng la Bakanana jaaka a lo ikanetse le borraeno, le go le lo naya,

¹² lo neele Morena sengwe le sengwe se mmaaso a itibolang ka sona. Ditsalwapele tsotlhe tsa diruiwa tse e leng tsa gago tse ditonanyana ke tsa Morena.

¹³ Leitibolo lengwe le lengwe la esele lo le rekolole ka kwana; mme fa lo sa rate go le rekolola, lo le robe molala. Mme lo rekolole le maitibolo otlhe a batho, e bong bomorwaa-lona ba ntlha.

¹⁴ Jaanong e re fa bomorwaa-lona ba lo botsa ka moso ba re: ‘Ke go reng?’ lo ba ree lo re: ‘Morena o re ntshitse ka letsogo le le tiileng mo Egepeto mo ntlong ya botlhanka.

¹⁵ Gonne e rile Farao a le peloethata, a gana go re naya tsela, Morena a bolaya maitibolo otlhe mo lefatsheng la Egepeto, e bong a batho le a diruiwa. Ke ka moo re tlhabelang Morena maitibolo otlhe a tse di ditonanyana, mme re rekolola bomorwaa-rona ba ntlha botlhe.

¹⁶ A mokgwa o e nne sesupo mo diatleng tsa lona le letshwao fa gare ga matlho a lona. Gonne Morena o re ntshitse mo Egepeto ka letsogo le le thata.’ ”

Pinagare ya leru le ya molelo

¹⁷ E rile Farao a sena go naya morafe tsela, Modimo wa se ka wa ba tlhamalaletsa kwa lefatsheng la Bafelesita, le fa tsela e e gaufi e le yona. Gonne Modimo o dirile jalo gore e se re gongwe fa batho ba bona tlhabano, ba ikwatlhaya, ba boela kwa Egepeto.

¹⁸ Ke ka moo Modimo o neng wa faposetsa morafe tseleng e e yang kwa sekakeng kwa Lewatleng la Motlhaka. Baiseraele ba bolotse mo lefatsheng la Egepeto ba ipaakanyeditse tlhabano.

¹⁹ Moše a huduga a rwele marapo a ga Josefa, gonne ene o ne a ikanisitse Baiseraele thata a re: “E re bofelong fa Modimo o lo ela tlhoko, lo tloge mono lo tshotse marapo a me.”

²⁰ Ba tloga kwa Sukothe, ba ya ba thibelela kwa Ethame kwa sekaka se simologang teng.

²¹ Morena o ne a ba etelela pele ka pinagare ya leru motshegare go ba goga mo tseleng le ka pinagare ya molelo bosigo go ba bonegela gore ba itse go tswelela pele bosigo le motshegare.

²² Pinagare ya leru e ne e sa tloge fa pele ga morafe motshegare le ya molelo e sa tlhokafale bosigo.