Ditiro 8 - Setswana 1970

Pogisego ya phuthego ya Jerusalema

¹ Saule le ene a kgatlhwa ke polao ya gagwe. Ya re ka letsatsi leo pogiso e kgolo ya tsogela phuthego e e mo Jerusalema, mme botlhe ba falalediwa kwa dinageng tsa Jutea le Samaria, fa e se baapostolo.

² Mme banna bangwe ba ba boifang Modimo ba fitlha Setefane, ba mo lelela segolo.

³ Mme Saule a nna a tlhorisa phuthego, a tlhomaganya matlo, a swatola banna le basadi, a ba tsenya mo ntlong ya kgolegelo.

Tlhabologo ya Basamaria ka thero ya ga Filipo

⁴ Jaanong ba ba faladitsweng ba ya le naga, ba eta ba rera lefoko la Efangele.

⁵ Filipo a ya kwa motseng mongwe wa Samaria, a ba rerela Keresete.

⁶ Batho ba tlhokomela dilo tse di bolelwang ke Filipo ka bongwefela jwa pelo, ka ba utlwa le go bona ditshupo tse a di dirang;

⁷ gonne ba bantsi ba ne ba na le mewa e e itshekologileng; yona e ne e tswa e goa ka lentswe le legolo. Mme ba bantsi ba ba suleng mefama le ba ba golafetseng maoto ba fodisiwa.

⁸ Ga ba ga nna boitumelo jo bogolo mo motseng oo.

⁹ Monna mongwe yo leina la gagwe e leng Simone o ne a le mo motseng oo pele ga foo, a dira tsa bongaka, a tseanya setšhaba sa Samaria ka go bua a re: “Ke nna yo mogolo.”

¹⁰ Botlhe ba ne ba mo setse morago, ba bannye le ba bagolo, ba re: “Ke ene nonofo ya Modimo e e bidiwang ‘E kgolo’.”

¹¹ Ba ne ba mo sala morago, ka a sa bolo go ba tseanya ka tsa bongaka sebaka se seleele.

¹² E rile ba dumela Filipo yo o neng a ba rerela Efangele ya puso ya Modimo le leina la ga Jesu Keresete, ba kolobediwa, banna le basadi.

¹³ Le Simone ka esi a dumela, mme ya re a sena go kolobediwa, a nna a nna le Filipo ka gale; ya re a bona ditshupo le ditiro tsa nonofo tse dikgolo di dirwa, a tseana.

Petoro le Simone wa ngaka

¹⁴ E rile baapostolo ba ba kwa Jerusalema ba utlwa gore Basamaria ba amogetse Lefoko la Modimo, ba roma Petoro le Johane kwa go bone.

¹⁵ Ya re ba sena go fitlha teng, ba ba rapelela gore ba amogele Mowa o o Boitshepo;

¹⁶ gonne o ne o ise o wele mo go ope wa bone, ba ne ba kolobeditswe mo leineng la Morena Jesu fela.

¹⁷ Ba ba baya diatla, mme ba amogela Mowa o o Boitshepo.

¹⁸ Ya re Simone a bona gore Mowa o o Boitshepo o newa ka peo ya diatla tsa baapostolo, a ba tlisetsa madi

¹⁹ a re: “Le nna, nnayang nonofo eo gore e tle e re mongwe le mongwe yo ke mmayang diatla, a amogele Mowa o o Boitshepo.”

²⁰ Mme Petoro a mo fetola a re: “A madi a gago a nyelele nao, ka gonne o gopotse gore neo ya Modimo e ka bonwa ka madi.

²¹ Ga o na kabelo, le e seng tshiamelo mo neong eo; gonne pelo ya gago e kgopo fa pele ga Modimo.

²² Ka moo he, ikwatlhaele bosula jo jwa gago, o be o rapele Morena, e tle e re gongwe maikaelelo ao a pelo ya gago o a itshwarelwe;

²³ gonne ke go bona o tletse santlhokwe wa bogalaka, e bile o bofilwe ka tshiamololo.”

²⁴ Simone a araba a re: “Nthapeleleng Morena e le lona gore ke se ka ka welwa ke sepe sa dilo tse lo di buileng.”

²⁵ Ya re jaanong ba sena go supa le go bolela Lefoko la Morena, ba boela kwa Jerusalema, ba eta ba rera Efangele mo metsaneng e mentsi ya Basamaria.

Tlhabologo ya Moethiopia

²⁶ Jaanong moengele wa Morena a bua le Filipo a re: “Nanoga o ye kwa ntlheng ya borwa kwa tseleng e e tswang Jerusalema, e ya kwa Gasa;” ke tsela e e senya.

²⁷ A nanoga a tsamaya, a ba a fitlhela monna mongwe wa Moethiopia teng, e le modiredi le tona ya ga Kantase, kgosi ya sesadi ya Baethiopia, yo o neng a okametse khumo yotlhe ya gagwe. O ne a tsile kwa Jerusalema go obamela teng.

²⁸ Jaanong a boela gae ka koloi ya gagwe, a buisa lokwalo lwa moporofeti Jesaya.

²⁹ Mowa wa raya Filipo wa re: “Yaa o kopane le koloi ele!”

³⁰ Filipo a tabogela teng, a mo utlwa a buisa moporofeti Jesaya, a ba a re: “A o tlhaloganya se o se buisang?”

³¹ Ene a re: “Nka tlhaloganya jang, fa ke sa tlhalosediwe ke ope?” A ba a rapela Filipo gore a pagame, a nne nae.

³² Kgaolo e a neng a e buisa e ne e le e e reng: “O ne a gogelwa tlhabong jaaka nku; a se ka a bula molomo wa gagwe jaaka kwana e didimetse fa pele ga mmeodi wa yona.

³³ Ya re ka a le mo boikokobetsong, a timiwa katlholo e e siameng; losika lwa gagwe lo tla bolelwa ke mang? Gonne bophelo jwa gagwe bo tlosiwa mo lefatsheng.”

³⁴ Jaanong modiredi a botsa Filipo a re: “Ke a go rapela, moporofeti o bua jalo ka ga mang, a ke ka ga gagwe gongwe ka ga mongwe o sele?”

³⁵ Ke fa Filipo a tswa molomo, a simolola ka lokwalo loo, a mo rerela Efangele ya ga Jesu.

³⁶ Ya re ba ntse ba tswelela pele mo tseleng, ba fitlha fa metsing mangwe, mme modiredi a re: “Bona, metsi ke ale; ke kgorelediwa ke eng go ka kolobediwa?”

³⁷ Filipo a araba a re: “Fa o dumela ka pelo yotlhe, go ka nna jalo.” Ene a araba a re: “Ke dumela gore Jesu Keresete ke Morwa Modimo.”

³⁸ Jaanong a laola gore koloi e eme, ba fologela kwa metsing ka bobedi jwa bone, Filipo le modiredi, mme a mo kolobetsa.

³⁹ Ya re ba tswa mo metsing, Mowa wa Morena wa tlosa Filipo, mme modiredi a se ka a tlhola a mmona; fela a tswelela mo tseleng ya gagwe ka boitumelo.

⁴⁰ Filipo a fitlhelwa kwa Ašetote, a eta a ntse a rera Efangele mo metseng yotlhe, ga tsamaya a fitlha kwa Kaisarea.