Ditiro 7 - Setswana 1970

Boikarabelo jwa ga Setefane

¹ Ke fa moperesiti yo mogolo a mmotsa a re: “A dilo tse, di ntse jalo?”

² Ene a re: “Banna ba ga etsho le borra, reetsang! Modimo wa kgalalelo o ne wa bonala kwa go rraetsho Aborahame, a le kwa Mesopotamia, a ise a age kwa Harane,

³ wa mo raya wa re: ‘Tswaa mo lefatsheng la ga eno le mo go ba ga eno, o ye kwa lefatsheng le ke tla le go supetsang.’

⁴ Ya baa gona a tswang mo lefatsheng la Bakalatea, a ya go aga kwa Harane. Go tloga teng, fa rraagwe a sena go swa, wa mo hudusetsa kwano lefatsheng leno le kajeno go agileng lona mo go lone.

⁵ Wa se ka wa mo naya boswa bope mo go lone, le fa e le kgato e le nngwe fela; mme wa mo solofetsa gore o tla le mo naya go le rua, le losika lwa gagwe morago ga gagwe, le fa a ne a ise a nne le ngwana.

⁶ Modimo wa mmolelela jaana gore losika lwa gagwe e tla nna bajaki mo lefatsheng la boeng, ba tla ba dira batlhanka, ba ba gatelela dinyaga di le 400.

⁷ ‘Mme setšhaba se ba tla nnang batlhanka ba sona, nna ke tla se betsa,’ go bua Modimo; ‘morago ga moo ba tla tswa, ba ntirela mo felong fa.’

⁸ Wa mo naya kgolagano ya go rupa. Aborahame a tsala Isaka jalo, a ba a mo rupisa ka letsatsi la borobedi; Isaka a tsala Jakobe, Jakobe a tsala borraa-ditso tsa rona ba ba 12.

⁹ “E rile ka borraa-ditso tsa rona ba fufegela Josefa, ba mo rekisa, a isiwa kwa Egepeto; mme Modimo wa bo o na nae,

¹⁰ wa mo golola mo dipitlaganong tsotlhe tsa gagwe, wa mo naya botlhale fa pele ga Farao, kgosi ya Egepeto, le bopelontle jwa gagwe, a mo dira molaodi wa Egepeto le wa ntlo yotlhe ya gagwe.

¹¹ Foo ga tla tlala mo lefatsheng lotlhe la Egepeto le Kanana, le tlalelo e kgolo; mme borraetsho ba tlhoka dijo.

¹² Ya re Jakobe a sena go utlwa gore go na le mabele kwa Egepeto, a roma borraetsho teng la ntlha.

¹³ Fa ba ya la bobedi, Josefa a ikitsise bomorwa-rraagwe, lotso lwa ga Josefa lwa ba lwa itsege mo go Farao.

¹⁴ Josefa a roma, a bitsa Jakobe rraagwe le losika lotlhe lwa gagwe, e le batho ba ba 75.

¹⁵ Jakobe a ya kwa Egepeto, a swa, ene le borraetsho.

¹⁶ Ba rwalelwa kwa Sigeme, ba fitlhwa mo legageng le Aborahame o ne a le rekile ka madi mo go bomorwa Hemore, mo Sigeme.

¹⁷ “E rile sebaka se atamela sa tsholofetso e Modimo o e solofeditseng Aborahame, batho ba ata ba ntsifala kwa Egepeto,

¹⁸ go fitlhelela ga tsoga kgosi e sele mo Egepeto, e e neng e sa itse Josefa.

¹⁹ Ene yoo a direla losika lwa rona ka bolotsana, a tlhorisa borraetsho mo go botlhoko, a laola gore go latlhwe masea a bone, a tle a se ka a phela.

²⁰ Ka sebaka seo Moše a tsalwa, a bo a le montle fa pele ga Modimo. A ba a otliwa mo ntlong ya ga rraagwe dikgwedi di le tharo.

²¹ Ya re a sena go bewa kwa nokeng, morwadia Farao a mo tshola, a mo ikgodisetsa gore a nne morwawe.

²² Moše a rutwa botlhale jotlhe jwa Baegepeto, a nonofa mo mafokong le mo ditirong tsa gagwe.

²³ “E rile a le dinyaga di le 40, ga mo tlela mo pelong go lekola ba ga gabo, e bong Baiseraele.

²⁴ Ya re a bona yo mongwe a siamololelwa, a mo femela, a busolosetsa yo o patikwang ka go bolaya Moegepeto.

²⁵ A ba a itlhoma gore ba ga gabo ba tla lemoga, fa Modimo o ba naya pholoso ka letsogo la gagwe; mme ba se ka ba lemoga.

²⁶ Ya re ka letsatsi le le latelang a bonala mo go bone ba lwa, a leka go ba tsereganya a re: ‘Banna, lo bana ba motho; lo siamololanelang?’

²⁷ Foo yo o siamololelang mongwe-ka-ene a mo kgarametsa a re: ‘Ke mang yo o go dirileng molaodi le moatlhodi mo go rona?

²⁸ A kampo o rata go mpolaya jaaka o letse o bolaile Moegepeto?’

²⁹ Ke fa Moše a tshaba ka ntlha ya lefoko leo, a ba a ya go nna lekgwelwa kwa lefatsheng la Midiane, kwa o tsaletseng bomorwawe ba babedi teng.

³⁰ “E rile dinyaga di le 40 di sena go feta, moengele a bonala mo go ene kwa sekakeng sa thaba ya Sinai, a le mo kgabong ya molelo wa setlhare se se mitlwa.

³¹ Ya re Moše a bona, a gakgamalela pono; mme ya re a atamela go leba, ga tla lentswe la Morena la re:

³² ‘Ke nna Modimo wa borraago, Modimo wa ga Aborahame le Isaka le Jakobe.’ Foo Moše a roroma, a tshaba go leba.

³³ Morena a mo raya a re: ‘Rola ditlhako mo dinaong tsa gago; gonne felo fa o emeng teng foo ke lefatshe le le itshepileng.

³⁴ Tota ke bonye pogisego ya morafe wa me o o kwa Egepeto, ke utlwile phegelo ya ona, ke bile ke fologetse go ba golola. Jaanong tlaya, ke tla go roma kwa Egepeto.’

³⁵ “Moše yoo, yo ba neng ba mo itatola ba re: ‘Ke mang yo o go dirileng molaodi le moatlhodi?’ ke ene yo Modimo o neng wa mo roma go nna molaodi le mogolodi ka letsogo la moengele yo o bonetseng fa go ene kwa setlhareng se se mitlwa.

³⁶ Ke ene yo o ba ntshitseng, a dira dikgakgamatso le ditshupo kwa lefatsheng la Egepeto le kwa Lewatleng le Lehibidu le kwa sekakeng dinyaga di le 40.

³⁷ Moše ke ene yo o reileng Baiseraele a re: ‘Modimo o tla lo tsosetsa moporofeti mo go bomorwa-rraalona jaaka nna; ene lo mo utlweng.’

³⁸ “Yo ke ene yo o neng a na le moengele kwa sekakeng, yo o neng a bua nae kwa thabeng ya Sinai a le mo phuthegong ya borraetsho, a amogela mafoko a a phelang go a re naya;

³⁹ yo borraetsho ba ganneng go mo utlwa, mme ba mo kgorometsa ba boela kwa Egepeto ka dipelo tsa bone,

⁴⁰ ba raya Arone ba re: ‘Re direle medimo e e tla re etelelang pele; gonne Moše yole, yo o re ntshitseng kwa lefatsheng la Egepeto, ga re itse se se mo dirafaletseng.’

⁴¹ Malatsing ao ba dira namane, ba ntshetsa setshwantsho se se bopilweng setlhabelo, ba itumelela ditiro tsa diatla tsa bone.

⁴² Mme Modimo wa hulara, wa ba neelela go direla lesomo la legodimo, jaaka go kwadilwe mo lokwalong lwa baporofeti ga twe: “ ‘Lona Baiseraele, a lo ne lo ntlisetsa diruiwa tse di tlhajwang le ditlhabelo dinyaga di le 40 kwa sekakeng?

⁴³ Lo ne lwa rwala motlaagana wa ga Mologe le naledi ya modimo o o bidiwang Refane, ditshwantsho tse lo di dirileng go di obamela. Ke tla lo hudusetsa ka kwa pele ga Babilone.’

⁴⁴ “Borraetsho ba ne ba na le Tente ya Boipontsho kwa sekakeng, fela jaaka go laotse yo o buileng le Moše gore a e dire ka fa setshwantshong se o neng a se bona;

⁴⁵ ya re borraetsho ba sena go e amogela mo go borraabo, ba tsena nayo mo dinageng tsa baheitane ba Modimo o neng wa ba leleka fa pele ga borraetsho, ba na le Jošua, (ya nna teng) go tla go fitlha malatsing a ga Dafita,

⁴⁶ yo o bonyeng bopelotlhomogi fa pele ga Modimo, a ba a kopa gore a bonele Ntlo ya Modimo wa ga Jakobe bonno.

⁴⁷ Mme Salomo ke ene yo o neng a o agela Ntlo.

⁴⁸ “Mme Mogodimodimo ga a nne mo dikagong tse di agilweng ka diatla, jaaka go bua moporofeti a re:

⁴⁹ “ ‘Legodimo ke sedulo sa me sa bogosi, lefatshe ke sebeo sa dinao tsa me. Lo ka nkagela ntlo e e ntseng jang, go bua Morena, gongwe felo ga boikhutso jwa me e ka nna gofe?

⁵⁰ A seatla sa me ga se sona se se dirileng tsotlhe tse?’

⁵¹ “Lona ba lo thamo di thata, ba lo sa rupisiwang mo dipelong le mo ditsebeng, ka metlha lo ganetsa Mowa o o Boitshepo; le lona lo tshwana fela le borraeno.

⁵² Ke ofe wa baporofeti yo borraeno ba se kang ba mmogisa? Mme ba bolaile ba ba boleletseng pele ka ga go tla ga Mosiami; jaanong lo mo tshwarisitse, lwa mmolaya,

⁵³ lona ba lo amogetseng molao wa Modimo ka thuso ya baengele, mme lwa se ka lwa o tshegetsa.”

Loso lwa ga Setefane

⁵⁴ E rile ba utlwa jalo, ba betwa ke pelo, ba mo phuranyetsa meno.

⁵⁵ Mme ene, ka a tletse Mowa o o Boitshepo, a fela a ntse a leletse kwa legodimong, a bona kgalalelo ya Modimo le Jesu a eme ka fa ntlheng ya le le jang ya Modimo.

⁵⁶ A ba a re: “Lebang, ke bona magodimo a bulegile, le Morwa-Motho a eme ka fa ntlheng ya le le jang ya Modimo.”

⁵⁷ Foo ba goa ka lentswe le legolo, ba ithiba ditsebe, ba mo ragogela ka bongwefela jwa pelo,

⁵⁸ ba mo kgoromeletsa kwa ntle ga motse, ba mo kgobotletsa ka majwe. Basupi ba baya dikobo tsa bone fa dinaong tsa lekau lengwe le le bidiwang Saule.

⁵⁹ Ba kgobotletsa Setefane ka majwe, a ntse a rapela a re: “Morena Jesu, amogela mowa wa me!”

⁶⁰ Jaanong a khubama, a kua ka lentswe le legolo a re: “Morena, o se ka wa ba balela sebe se!” Ya re a sena go bua jalo, a robala.