Ditiro 3 - Setswana 1970

Petoro le Johane ba fodisa motlhotsi

¹ Petoro le Johane ba ne ba ya kwa Tempeleng ka nako ya thapelo, e bong ka nako ya boraro thapama.

² Ke fa monna mongwe yo o tsetsweng a golafetse maoto a rwalwa a tsisiwa; ba ne ba tle ba mmee ka malatsi otlhe fa mojakong o o bidiwang “O montle” wa Tempele gore a kope dikatso mo go ba ba tsenang mo Tempeleng.

³ Ya re ene a bona Petoro le Johane ba re ba tsena mo Tempeleng, a kopa katso.

⁴ Petoro a mo tlhoma matlho, a na le Johane, a re: “Re lebe!”

⁵ Yoo a ba leba, a solofetse go amogela sengwe mo go bona.

⁶ Mme Petoro a mo raya a re: “Selefera le gouta ga ke na natso; mme se ke nang naso ke a se go naya: Mo leineng la ga Jesu Keresete wa Nasaretha, nanoga o tsamae!”

⁷ A ba a mo tshwara letsogo le le jang, a mo emisa; mme dinao tsa gagwe le malengana tsa akofa tsa tia.

⁸ A ragoga, a ema ka dinao, a tsamaya; a ba a tsena nabo mo Tempeleng, a tsamaya, a tlolaka, a baka Modimo.

⁹ Mme batho botlhe ba mmona a tsamaya, a baka Modimo;

¹⁰ ba bile ba bona gore ke ene yo o ne a tle a nnele dikatso fa mojakong o montle wa Tempele. Ba tlala kgakgamalo le tseano ka ga se se mo dirafaletseng.

¹¹ Ya re a ntse a ngaparetse Petoro le Johane, batho botlhe ba taboga, ba ba kgobokanela kwa leobong le le bidiwang la ga Salomo ba gakgametse thata.

Thero ya ga Petoro ka ga motlhotsi

¹² Ya re Petoro a bona jalo, a simolola go bua le batho a re: “Lona banna ba Iseraele, lo gakgamaleletseng motho yo? Lo tlhometseng matlho mo go rona, jaaka e kete re mo tsamaisitse ka thata gongwe poifo-Modimo ya rona?

¹³ Modimo wa ga Aborahame le Isaka le Jakobe, Modimo wa borraetsho, o galaleditse Jesu, motlhanka wa ona, yo lona lo mo neetseng katlholong, lwa mo itatola fa pele ga sefatlhego sa ga Pilato, ene a ikaeletse go mo golola.

¹⁴ Mme lona lwa itatola Moitshepi le Mosiami, lwa kopa gore lo gololelwe monna wa mmolai,

¹⁵ lwa bolaya Moeteledipele go ya botshelong. Ke ene yo Modimo o mo tsositseng mo baswing, mo re leng basupi ba gona.

¹⁶ Ke ka go dumela mo leineng la gagwe, fa leina la gagwe le tiisitse monna yo, yo lo mmonang, lo mo itseng. Mme tumelo e e tlang ka ene Jesu e mo neile boitekanelo jo bo tletseng jo fa pele ga lona lotlhe.

¹⁷ “Mme jaanong, ba ga etsho, ke itse gore lo dirile jalo ka go tlhoka go itse, fela jaaka le bone balaodi ba lona.

¹⁸ Mme tse Modimo o di boleletseng pele ka melomo ya baporofeti botlhe gore Keresete wa ona o tla bogisega, o di dirafaditse jalo.

¹⁹ Jaanong he, fetogang pelo lo sokologe gore dibe tsa lona di phimolwe,

²⁰ gore go tle go tle metlha ya tapologo e e tswang sefatlhegong sa Morena, mme a rome yo o beilweng go nna Keresete wa lona, e bong Jesu,

²¹ yo legodimo le tshwanetseng go mo tshola go fitlha metlheng ya go siamisa dilo tsotlhe, e Modimo o buileng ka ga yona ka melomo ya baporofeti ba ona ba ba boitshepo go tloga bogologolo.

²² Moše o kile a raya borraetsho a re: ‘Morena, Modimo wa lona, o tla lo tsosetsa moporofeti yo o tshwanang le nna, a tswa mo losikeng lwa lona; ene yoo lo mo reetse mo go tsotlhe tse o tla di buang le lona.

²³ Mme go tla dirafala gore mongwe le mongwe yo o se kitlang a utlwa moporofeti yoo, a bolawe, a kumolwe mo morafeng.’

²⁴ Le bone baporofeti botlhe ba ba buileng go simolola ka Samuele le ba ba tsileng morago, ba boletse ka ga ona malatsi ano.

²⁵ Ke lona bana ba baporofeti le ba kgolagano e Modimo o e dirileng le borraeno, fa o raya Aborahame o re: ‘Ditšhaba tsotlhe tsa lefatshe di tla tshegofadiwa ka losika lwa gago.’

²⁶ Ke lona ba Modimo o lo tsoseditseng Motlhanka wa ona, wa mo romela go tshegofatsa lona pele ka go sokolola mongwe le mongwe wa lona mo bosuleng jwa gagwe.”